ਅੱਜ ਕੱਲ ਢੌਂਗੀ ਬਾਬਿਆਂ ਨੇ,
ਕੀਤੀ ਖੂਬ ਚੜ੍ਹਾਈ।
ਭੋਲੀ ਭਾਲੀ ਜਨਤਾ ਇਨ੍ਹਾਂ,
ਆਪਣੇ ਪਿੱਛੇ ਲਾਈ।

ਜਗ੍ਹਾ ਜਗ੍ਹਾ ’ਤੇ ਫਾਂਡਿਆਂ ਵਾਲੇ,
ਖੋਲ੍ਹੇ ਇਨ੍ਹਾਂ ਡੇਰੇ।
ਆਪਣੇ ਆਪ ਨੂੰ ਰੱਬ ਅਖਵਾਉਂਦੇ,
ਕਰਨ ਪਖੰਡ ਬਥੇਰੇ।
ਠੱਗੀ ਠੋਰੀ ਵਾਲੀ ਇਨ੍ਹਾਂ,
ਹੱਟੀ ਖੂਬ ਚਲਾਈ।
ਅੱਜ ਕੱਲ ਢੌਂਗੀ . . .

ਭੂਤ ਪ੍ਰੇਤ ਵਾਲੀਆਂ ਬਾਬੇ,
ਸਾਖੀਆਂ ਖੂਬ ਸੁਣਾਉਂਦੇ।
ਸਿੱਧੇ-ਸਾਦੇ ਲੋਕਾਂ ਨੂੰ ਇਹ,
ਵਹਿਮ-ਭਰਮ ਵਿਚ ਪਾਉਂਦੇ ਨੇ।
ਜੰਤਰ-ਮੰਤਰ ਲਈ ਇਹ ਬਾਬੇ,
ਕਰਦੇ ਨਿੱਤ ਪੜ੍ਹਾਈ।
ਅੱਜ ਕੱਲ ਢੌਂਗੀ . . .

ਕੰਨਾਂ ਦੇ ਵਿਚ ਮਾਰ ਕੇ ਫੂਕਾਂ,
ਹਰੀਆਂ ਲਾਚੀਆਂ ਖਵਾਉਂਦੇ ਨੇ।
ਘੜੇ ’ਚ ਰੱਖਿਆ ਪਾਣੀ ਬਾਬੇ,
ਅੰਮ੍ਰਿਤ ਆਖ ਛਕਾਉਂਦੇ ਨੇ।
ਪੈਰੀਂ ਹੱਥ ਲਵਾ ਕੇ ਬਾਬੇ,
ਮੱਥੇ ਜਾਣ ਟਿਕਾਈ।
ਅੱਜ ਕੱਲ ਢੌਂਗੀ . . .

ਮੜ੍ਹੀ ਮਸਾਣੀ ਢੌਂਗੀ ਬਾਬੇ,
ਦੀਵੇ ਨਿੱਤ ਜਗਾਉਂਦੇ ਨੇ।
ਮੌਲੀ ਰੱਖ ਤਵੀਤ ਬਣਾ ਕੇ,
ਲੋਕਾਂ ਦੇ ਗ਼ਲ ਪਾਉਂਦੇ ਨੇ।
ਧਰਮੀ ਬਾਣਾ ਪਾ ਕੇ ਇਨ੍ਹਾਂ,
ਲੁੱਟ ਹੈ ਬੜੀ ਮਚਾਈ।
ਅੱਜ ਕੱਲ ਢੌਂਗੀ . . .

ਧਰਮ ਦੇ ਨਾਂ ’ਤੇ ਲੋਕਾਂ ਕੋਲੋਂ,
ਖੂਬ ਕਮਾਈ ਕਰਦੇ ਨੇ।
ਵੱਡੇ ਵੱਡੇ ਨਜ਼ਰਾਨੇ ਲੈ ਕੇ,
ਜੇਬਾਂ ਅਪਣੀਆਂ ਭਰਦੇ ਨੇ।
ਪੈਸੇ ਬਦਲੇ ਧਰਮ ਦੀਆਂ,
ਧੱਜੀਆਂ ਜਾਣ ਉਡਾਈ।
ਅੱਜ ਕੱਲ ਢੌਂਗੀ . . .

ਗੁਰੂ ਨਾਨਕ ਦੇ ਉਪਦੇਸ਼ਾਂ ਨੇ ,
ਸਾਨੂੰ ਸੱਚਾ ਮਾਰਗ ਦਿਖਾਇਆ ਏ।
ਅੱਜ ਸੱਚੇ ਗੁਰੂ ਨੂੰ ਛੱਡ ਕੇ ਕਾਹਤੋਂ,
ਥਾਂ-ਥਾਂ ਸੀਸ ਨਿਵਾਇਆ ਏ।
‘ਗੁਰਦੇਵ ਸਿੰਘ’ ਕਹਿੰਦਾ,
ਢੌਂਗੀ ਬਾਬਿਆਂ ਤੋਂ ਹੁਣ,
ਕਰ ਲਓ ਤੋਬਾ ਭਾਈ।
ਹੁਣ ਨਹੀਂ ਢੌਂਗੀ ਬਾਬਿਆਂ ਨੂੰ ਅਸੀਂ,
ਦੇਣੀ ਕਰਨ ਚੜ੍ਹਾਈ।
ਹੁਣ ਨਹੀਂ ਢੌਂਗੀ ਬਾਬਿਆਂ ਨੂੰ ਅਸੀਂ,
ਦੇਣੀ ਕਰਨ ਚੜ੍ਹਾਈ।