ਧਰਤੀ ਅੰਮ੍ਰਿਤਸਰ ਦੀ ਅੱਜ ਵੀ
ਰੋ-ਰੋ ਕਰੇ ਪੁਕਾਰ।
ਜੂਨ ਚੁਰਾਸੀ ਵਿਚ ਫੌਜਾਂ ਨੇ
ਢਾਹ ਦਿੱਤੇ ਦਰਬਾਰ।

ਟੈਂਕਾਂ ਦੇ ਨਾਲ ਤਖਤ ਢਾਹ ਦਿਓ
ਜ਼ਾਲਮ ਨੇ ਹੁਕਮ ਸੁਣਾਇਆ ਸੀ।
ਖ਼ੂਨ ਬੇ-ਦੋਸ਼ੀ ਸੰਗਤ ਦਾ ਉਸ
ਪਾਣੀ ਵਾਂਗ ਵਹਾਇਆ ਸੀ।
ਬਣ ਗਈ ਸੀ ਸਿੱਖਾਂ ਦੀ ਦੁਸ਼ਮਣ
ਦਿੱਲੀ ਦੀ ਸਰਕਾਰ।
ਧਰਤੀ ਅੰਮ੍ਰਿਤਸਰ ਦੀ . . .

ਹਰ ਪਾਸੇ ਸੀ ਧੂੰਏਂ ਉੱਡਦੇ
ਲਾ ਦਿੱਤੀਆਂ ਸੀ ਅੱਗਾਂ।
ਦਿੱਸਣ ਟੋਪੀਆਂ ਵਾਲੇ ਹਰ ਥਾਂ
ਰੁੱਲ ਗਈਆਂ ਸੀ ਪੱਗਾਂ।
ਕਹਿੰਦੇ ਗੋਲੀ ਮਾਰ ਦਿਓ
ਜਿੱਥੇ ਦਿਸਦਾ ਏ ਸਰਦਾਰ।
ਧਰਤੀ ਅੰਮ੍ਰਿਤਸਰ ਦੀ . . .

ਝੂਠੇ ਕੇਸ ਬਣਾ ਸਿੱਖਾਂ ਦਾ
ਕਤਲ-ਏ-ਆਮ ਕਰਵਾਇਆ ਸੀ।
ਖਿਿੜਆ ਫੁੱਲ ਜਵਾਨੀ ਵਾਲਾ
ਕਿਉਂ ਛੇਤੀ ਮੁਰਝਾਇਆ ਸੀ।
ਸਿੱਖ ਕੌਮ ਨੂੰ ਖਤਮ ਕਰਨ ਲਈ
ਕੀਤੇ ਯਤਨ ਹਜ਼ਾਰ।
ਧਰਤੀ ਅੰਮ੍ਰਿਤਸਰ ਦੀ . . .

ਰਲ ਮਿਲ ਕੇ ਮੱਕਾਰਾਂ ਨੇ
ਇਹ ਕੈਸਾ ਕਹਿਰ ਕਮਾਇਆ ਸੀ।
ਗੁਰੂ ਦੀ ਨਗਰੀ ਅੰਮ੍ਰਿਤਸਰ ਨੂੰ
ਖ਼ੂਨੀ ਸ਼ਹਿਰ ਬਣਾਇਆ ਸੀ।
‘ਗੁਰਦੇਵ ਸਿੰਘਾ’ ਅਸੀਂ ਐਸੇ ਉੱਜੜੇ
ਮੁੜ ਨਾ ਖਿੜੀ ਬਹਾਰ।
ਧਰਤੀ ਅੰਮ੍ਰਿਤਸਰ ਦੀ . .