ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ।
ਤੋਪਾਂ ਟੈਂਕਾਂ ਨਾਲ ਅਕਾਲ ਤਖਤ ਸਾਹਿਬ ਢਾਹਿਆ।
ਅਕਾਲ ਤਖਤ ਸਾਹਿਬ ਸਿੱਖਾਂ ਦੀ ਆਨ ਅਤੇ ਸ਼ਾਨ ਹੈ।
ਹੱਸ-ਹੱਸ ਵਾਰ ਦੇਣੀ ਏਸ ਉੱਤੋਂ ਜਾਨ ਹੈ।
ਛੇਵੇਂ ਪਾਤਸ਼ਾਹ ਨੇ ਏਹੋ ਸਬਕ ਪੜਾਇਆ।
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ ।
ਯੋਧਿਆਂ ਨੇ ਲੜੀ ਜਦੋਂ ਹੱਕ ਦੀ ਲੜਾਈ ਸੀ।
ਵੈਰੀਆਂ ਨੇ ਕੀਤੀ ਗੁਰੂ-ਘਰ ’ਤੇ ਚੜ੍ਹਾਈ ਸੀ।
ਸ਼ੇਰਾਂ ਨੂੰ ਸੀ ਘੇਰਾ ਉਦੋਂ ਗਿੱਦੜਾਂ ਨੇ ਪਾਇਆ।
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ ।
ਬੇ-ਕਸੂਰ ਸਿੱਖਾਂ ਉੱਤੇ ਗੋਲੀਆਂ ਚਲਾਈਆਂ ਸੀ।
ਖ਼ੂਨ ਦੀਆਂ ਜ਼ਾਲਮਾਂ ਨੇ ਨਦੀਆਂ ਵਹਾਈਆਂ ਸੀ।
ਪਾਪੀਆਂ ਦੇ ਦਿਲਾਂ ਵਿਚ ਤਰਸ ਨਾ ਆਇਆ।
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ ।
ਗ਼ਲਾਂ ਵਿਚ ਪਾ ਟਾਇਰ ਸੀ ਜਿਊਂਦੇ ਸਿੱਖ ਸਾੜੇ।
ਅੱਜ ਵੀ ਨੇ ਅਜ਼ਾਦ ਪਾਪੀ ਲੈਂਦੇ ਨੇ ਨਜ਼ਾਰੇ।
ਸਿੱਖਾਂ ਦਿਆਂ ਕਾਤਲਾਂ ਨੂੰ ਅਹੁਦਿਆਂ ’ਤੇ ਬਿਠਾਇਆ।
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ।
ਅਜੇ ਵੀ ਚੁਰਾਸੀ ਵਾਲੇ ਜ਼ਖ਼ਮ ਨੇ ਤਾਜ਼ੇ।
ਬੇ-ਕਸੂਰ ਜੇਲਾਂ ਵਿਚ, ਦੋਸ਼ੀ ਬਣੇ ਰਾਜੇ।
ਨਿਰਦੋਸ਼ਾਂ ਨੂੰ ਹੈ ਕਾਹਤੋਂ ਫਾਂਸੀ ’ਤੇ ਚੜਾਇਆ?
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ।
ਗੁਰਦੇਵ ਸਿੰਘਾ ਕਦੋਂ ਮਿਲਣਾ ਏ ਸਾਨੂੰ ਸਾਡਾ ਹੱਕ?
ਸੱਚ ਰਹਿਣਾ ਸੱਚ, ਕੋਈ ਲੁਕਾਵੇ ਭਾਵੇਂ ਲੱਖ।
ਪੈਸੇ ਦੇ ਪੁਜਾਰੀਆਂ ਨੇ ਸੱਚ ਨੂੰ ਦਬਾਇਆ।
ਉਨੀ ਸੌ ਚੁਰਾਸੀ ਸਾਥੋਂ ਜਾਣਾ ਨਹੀਂ ਭੁਲਾਇਆ।