ਜਾਗ! ਗੱਭਰੂਆ ਜਾਗ!
ਨਸ਼ਿਆਂ ਵਾਲੀ ਅੱਗ ’ਚ ਸੜ੍ਹ ਕੇ
ਹੋ ਜਾਵੇਂਗਾ ਰਾਖ ਜਾਗ!
ਗੱਭਰੂਆ ਜਾਗ!
ਦੁੱਧ, ਮਲਾਈਆਂ ਛੱਡ ਕੇ ਤੂੰ
ਨਸ਼ਿਆਂ ਦੇ ਵੱਸ ਪੈ ਗਿਆ ਏਂ
ਰੋਗ ਅਵੱਲਾ ਨਸ਼ਿਆਂ ਵਾਲਾ
ਜਿੰਦ ਨੂੰ ਲਾ ਕੇ ਬਹਿ ਗਿਆ ਏਂ।
ਨਸ਼ਿਆਂ ਨੂੰ ਤੂੰ ਗਲ ਨਾਲ ਲਾ ਕੇ
ਕਰ ਲਏ ਮਾੜੇ ਭਾਗ।
ਜਾਗ! ਗੱਭਰੂਆ ਜਾਗ!
ਨਸ਼ਿਆਂ ਵਾਲੀ ਅੱਗ ’ਚ ਸੜ੍ਹ ਕੇ
ਹੋ ਜਾਵੇਂਗਾ ਰਾਖ
ਘੋਲ ਕਬੱਡੀ ਜਾਨ ਸੀ ਤੇਰੀ
ਸਭ ਤੋਂ ਉੱਚੀ ਸ਼ਾਨ ਸੀ ਤੇਰੀ
ਕਿਸੇ ਉੱਜੜੇ ਹੋਏ ਬਾਗ ਦੇ ਵਾਂਗੂੰ
ਹੋ ਗਈ ਖਤਮ ਜਵਾਨੀ ਤੇਰੀ।
ਨਸ਼ਿਆਂ ਦੀ ਇਸ ਆਦਤ ਨੇ
ਤੈਨੂੰ ਡੱਸਿਆ ਬਣ ਕੇ ਨਾਗ
ਜਾਗ! ਗੱਭਰੂਆ ਜਾਗ!
ਨਸ਼ਿਆਂ ਵਾਲੀ ਅੱਗ ’ਚ ਸੜ੍ਹ ਕੇ
ਹੋ ਜਾਵੇਂਗਾ ਰਾਖ
ਖੇਡਾਂ ਵਿਚ ਮਾਰ ਕੇ ਮੱਲਾਂ
ਤੂੰ ਮੈਡਲ ਗਲ ਵਿਚ ਪਾਏ
ਅੱਜ ਨਸ਼ਿਆਂ ਵਾਲੇ ਜਾਲ ’ਚ ਫਸ ਕੇ
ਤੂੰ ਸਾਰੇ ਫ਼ਰਜ਼ ਭੁਲਾਏ।
ਨਸ਼ਿਆਂ ਦੇ ਵਿਚ ਡੁੱਬ ਕੇ ਲਾਇਆ
ਪਿਉ ਦੀ ਪੱਗ ਨੂੰ ਦਾਗ
ਜਾਗ! ਗੱਭਰੂਆ ਜਾਗ!
ਨਸ਼ਿਆਂ ਵਾਲੀ ਅੱਗ ’ਚ ਸੜ੍ਹ ਕੇ
ਹੋ ਜਾਵੇਂਗਾ ਰਾਖ
ਸੋਹਣੇ ਦੇਸ ਪੰਜਾਬ ਨੂੰ ਮੇਰੇ
ਲੱਗੀਆਂ ਭੈੜੀਆਂ ਨਜ਼ਰਾਂ
ਪੁੱਟ ਰਹੇ ਨੇ ਨਸ਼ੇ ਚ ਗੱਭਰੂ
ਹੱਥੀਂ ਮੌਤ ਦੀਆਂ ਕਬਰਾਂ
‘ਗੁਰਦੇਵ ਸਿੰਘ’ ਨਾ ਵੇਲਾ ਮੁੜਿਆ
ਸਭ ਦੇਵੋ ਨਸ਼ੇ ਤਿਆਗ
ਜਾਗ! ਗੱਭਰੂਆ ਜਾਗ!
ਨਸ਼ਿਆਂ ਵਾਲੀ ਅੱਗ ਵਿਚ ਸੜ੍ਹ ਕੇ
ਹੋ ਜਾਵੇਂਗਾ ਰਾਖ
ਜਾਗ! ਗੱਭਰੂਆ ਜਾਗ!