ਧੰਨ ਧੰਨ ਮੀਰੀ-ਪੀਰੀ ਦੇ ਮਾਲਕ ਸਾਹਿਬ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦੇ ਪਰਮ-ਸੇਵਕ ਧੰਨ ਧੰਨ ਭਾਈ ਰੂਪ ਚੰਦ ਜੀ ਸਿੱਖ ਜਗਤ ਦੀ ਮਹਾਨ ਸ਼ਖ਼ਸੀਅਤ ਬਾਰੇ ਗੱਲ ਕਰਨੀ ਸੌਖੀ ਨਹੀਂ। ਗੁਰੂ ਸਾਹਿਬ ਜਾਂ ਗੁਰੂ ਦੇ ਪਿਆਰਿਆਂ ਦੀ ਗੱਲ ਕਰਨੀ ਸ਼ਬਦਾਂ ਤੋਂ ਪਰੇ ਦੀ ਗੱਲ ਹੈ। ਭਾਈ ਸਾਧੂ ਅਤੇ ਉਨ੍ਹਾਂ ਦਾ ਪੁੱਤਰ ਭਾਈ ਰੂਪ ਚੰਦ ਇਕ ਦਿਨ ਖੇਤਾਂ ਵਿਚ ਕੰਮ ਕਰ ਰਹੇ ਸਨ ਉਨ੍ਹਾਂ ਦਾ ਜਲ ਮਸ਼ਕ ਵਿਚ ਪਾ ਕੇ ਜੰਡ ਦੇ ਦਰੱਖਤ ਉੱਪਰ ਟੰਗਿਆ ਹੋਇਆ ਸੀ।

ਦੋਵਾਂ ਪਿਤਾ-ਪੁੱਤਰ ਨੂੰ ਪਿਆਸ ਲੱਗੀ। ਦੇਖਿਆ ਜਲ ਬਹੁਤ ਠੰਢਾ ਹੈ ਮਨ ਵਿਚ ਵਿਚਾਰ ਬਣਿਆ ਕਿ ਇਹ ਜਲ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦੇ ਛਕਣ ਵਾਲਾ ਹੈ, ਦੋਵੇਂ ਲੱਗ ਗਏ ਮੀਰੀ-ਪੀਰੀ ਦੇ ਮਾਲਕ ਨੂੰ ਯਾਦ ਕਰਨ। ਮੀਰੀ-ਪੀਰੀ ਦੇ ਮਾਲਕ ਸਤਿਗੁਰੂ ਸਾਹਿਬ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਮਹਾਰਾਜ ਆਪਣੇ ਸਾਂਢੂ ਸਾਈਂ ਦਾਸ ਦੇ ਘਰ ਭਾਈ ਕੀ ਡਰੋਲੀ ਬਿਰਾਜਮਾਨ ਸਨ। ਬੱਸ ਫੇਰ ਕੀ ਸੀ, ਦਿਲਾਂ ਦੀਆਂ ਜਾਣਦੇ ਸਤਿਗੁਰੂ ਆਪਣੇ ਪਿਆਰਿਆਂ ਦੀ ਖਿੱਚ ਦੇ ਬੰਨੇ, ਬਿਨਾਂ ਕਿਸੇ ਨੂੰ ਦੱਸੇ ਘੋੜੇ ’ਤੇ ਸਵਾਰ ਹੋ ਕੇ ਪਹੁੰਚ ਗਏ ਆਪਣੇ ਮੁਰੀਦਾਂ ਦੇ ਕੋਲ। ਪਿਆਰਿਆਂ ਦੇ ਪਿਆਰ ਵਾਲਾ ਜਲ ਗੁਰੂ ਸਾਹਿਬ ਨੇ ਆਪ ਛਕਿਆ ਅਤੇ ਦੋਵਾਂ ਪਿਓ-ਪੁੱਤਰਾਂ ਨੂੰ ਛਕਾਇਆ। ਗੁਰੂ ਸਾਹਿਬ ਨੇ ਫ਼ੁਰਮਾਇਆ ਭਾਈ ਅਸੀਂ ਤੁਹਾਡਾ ਨਵਾਂ ਪਿੰਡ ਬੰਨਾਗੇ। ਗੁਰੂ ਸਾਹਿਬ ਨੇ ਉੱਥੋਂ ਤੀਰ ਚਲਾਇਆ ਤਾਂ ਤੀਰ ਛੇ-ਸੱਤ ਕਿਲੋਮੀਟਰ ਦੂਰੀ 'ਤੇ ਜਾ ਕੇ ਡਿੱਗਿਆ, ਉਸ ਅਸਥਾਨ ਤੇ ਮੀਰੀ-ਪੀਰੀ ਦੇ ਮਾਲਕ ਸਤਿਗੁਰੂ ਸਾਹਿਬ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਨੇ ਆਪਣੇ ਕਰ-ਕਮਲਾਂ ਨਾਲ ਮੋੜ੍ਹੀ ਗੱਡੀ ਅਤੇ ਮੁਖੋਂ ਫੁਰਮਾਇਆ ਅੱਜ ਤੁਹਾਡੀਆਂ ਜੜ੍ਹਾਂ ਮੈਂ ਪਤਾਲ ਵਿਚ ਲਗਾ ਦਿੱਤੀਆਂ ਹਨ। ਮਹਾਰਾਜ ਜੀ ਦੀ ਭਾਲ ਕਰਦੇ ਬਾਬਾ ਬਿਧੀ ਚੰਦ ਜੀ ਅਤੇ ਹੋਰ ਗੁਰੂ ਕੇ ਪਿਆਰੇ ਸਿੰਘ ਵੀ ਆ ਗਏ। ਪਿੱਛੇ-ਪਿੱਛੇ ਮਾਤਾ ਦਮੋਦਰੀ ਜੀ ਵੀ ਆ ਗਏ ਗੁਰੂ ਸਾਹਿਬ ਆਪਣੇ ਪਿਆਰਿਆਂ ਅਤੇ ਪਰਵਾਰ ਸਮੇਤ 35000 ਫੌਜ ਨਾਲ ਇਸ ਅਸਥਾਨ ’ਤੇ ਛੇ ਮਹੀਨੇ ਤੋਂ ਵੱਧ ਸਮਾਂ ਰਹੇ। ਇਸ ਪਿੰਡ ਦਾ ਨਾਂ ਗੁਰੂ ਸਾਹਿਬ ਨੇ ਭਾਈ ਰੂਪਾ ਰੱਖਿਆ। ਭਾਈ ਰੂਪ ਚੰਦ ਜੀ ਅਤੇ ਉਨ੍ਹਾਂ ਦੇ ਪਿਤਾ ਸਮੇਤ ਪਰਵਾਰ ਨੇ ਗੁਰੂ ਸਾਹਿਬ ਦੀ ਬਹੁਤ ਸੇਵਾ ਕੀਤੀ। ਸੇਵਾ ਤੋਂ ਖ਼ੁਸ਼ ਹੋ ਕੇ ਮੀਰੀ-ਪੀਰੀ ਦੇ ਮਾਲਕ ਸਾਹਿਬ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਨੇ ਰੂਪ ਚੰਦ ਜੀ ਨੂੰ ਭਾਈ ਦਾ ਖ਼ਿਤਾਬ ਦਿੱਤਾ। ਆਪਣੇ ਬਸਤਰ-ਸ਼ਸਤਰ ਹੋਰ ਬਹੁਤ ਸਾਰੀਆਂ ਨਿਸ਼ਾਨੀਆਂ ਪਰਵਾਰ ਨੂੰ ਬਖਸ਼ੀਆਂ ਅਤੇ ਆਖਿਆ ਤੇਰਾ ਘਰ ਮੇਰਾ ਘਰ ਹੈ। ਪਰਵਾਰ ਅੱਜ ਵੀ ਸਤਿਗੁਰੂ ਜੀ ਦੀਆਂ ਨਿਸ਼ਾਨੀਆਂ ਦੀ ਸਾਂਭ-ਸੰਭਾਲ ਕਰ ਰਿਹਾ ਹੈ। ਮੀਰੀ-ਪੀਰੀ ਦੇ ਮਾਲਕ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦੀਆਂ ਬਖ਼ਸ਼ੀਆਂ ਨਿਸ਼ਾਨੀਆਂ ਭਾਈ ਰੂਪ ਚੰਦ ਜੀ ਨੇ ਅਤੇ ਉਨ੍ਹਾਂ ਦੇ ਪਰਵਾਰ ਨੇ ਆਪਣੇ ਸੀਸ ਉੱਪਰ ਰੱਖ ਲਈਆਂ। ਗੁਰੂ ਸਾਹਿਬ ਨੇ ਫੁਰਮਾਇਆ ਭਾਈ ਰੂਪ ਚੰਦ ਜੀ ਤੁਹਾਨੂੰ ਬਸਤਰ ਅਤੇ ਸ਼ਸਤਰ ਪਹਿਨਣ ਲਈ ਦਿੱਤੇ ਹਨ। ਘੋੜੇ ਘੋੜਸਵਾਰੀ ਲਈ ਦਿੱਤੇ ਹਨ। ਪ੍ਰੰਤੂ ਭਾਈ ਸਾਹਿਬ ਨੇ ਬੇਨਤੀ ਕੀਤੀ ਕਿ ਗੁਰੂ ਜੀ ਜੀ ਅਸੀਂ ਤੁਹਾਡੀਆਂ ਬਖਸ਼ਿਸ਼ਾਂ ਨੂੰ ਤੁਹਾਡਾ ਰੂਪ ਜਾਣ ਕੇ ਸੇਵਾ-ਸੰਭਾਲ ਕਰਾਂਗੇ। ਮੀਰੀ-ਪੀਰੀ ਦੇ ਮਾਲਕ ਬਹੁਤ ਪ੍ਰਸੰਨ ਹੋਏ ਅਤੇ ਕਿਹਾ- ਭਾਈ ਰੂਪ ਚੰਦ ਜੀ ਤੁਹਾਡੀ ਜ਼ੁਬਾਨ ਤਲਵਾਰ ਤੋਂ ਤਿੱਖੀ ਚੱਲੇਗੀ।

ਇਸ ਤਰ੍ਹਾਂ ਭਾਈ ਰੂਪ ਚੰਦ ਜੀ ਦੇ ਪਰਵਾਰ ਨੇ ਮੀਰੀ-ਪੀਰੀ ਦੇ ਮਾਲਕ ਸਾਹਿਬ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਤੋਂ ਦਸਵੇਂ ਪਾਤਸ਼ਾਹ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਮਹਾਰਾਜ ਜੀ ਦੇ ਸਮੇਂ ਤਕ ਗੁਰੂ ਸਾਹਿਬਾਨ ਦੀ ਅਤੇ ਗੁਰੂ-ਘਰ ਦੀ ਸੇਵਾ ਕੀਤੀ। ਧੰਨ-ਧੰਨ ਸਤਿਗੁਰੂ ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਮਹਾਰਾਜ ਜੀ ਅਤੇ ਮਾਤਾ ਜੀਤ ਕੌਰ ਜੀ ਦੇ ਅਨੰਦ ਕਾਰਜ ਦੀ ਸੇਵਾ ਗੁਰੂ ਕੇ ਲਾਹੌਰ ਵਿਖੇ ਭਾਈ ਰੂਪ ਚੰਦ ਜੀ ਨੇ ਕੀਤੀ।

ਭਾਈ ਧਰਮ ਸਿੰਘ ਅਤੇ ਭਾਈ ਪਰਮ ਸਿੰਘ ਜੋ ਕਿ ਭਾਈ ਰੂਪ ਚੰਦ ਜੀ ਦੇ ਸਪੁੱਤਰ ਸਨ,ਨੇ ਦਸਮ ਪਾਤਸ਼ਾਹ ਜੀ ਦੇ ਨਾਲ ਜੰਗਾਂ-ਯੁੱਧਾਂ ਵਿਚ ਸੇਵਾ ਕੀਤੀ। ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਮਹਾਰਾਜ ਜਿੱਥੇ ਵੀ ਠਹਿਰਾਅ ਕਰਦੇ ਸਨ, ਭਾਈ ਧਰਮ ਸਿੰਘ ਅਤੇ ਭਾਈ ਪਰਮ ਸਿੰਘ ਜੀ ਹਰ ਰੋਜ਼ ਨਵਾਂ ਮੰਜਾ ਤਿਆਰ ਕਰਦੇ ਸਨ, ਮਹਾਰਾਜ ਲਈ ਲੰਗਰ ਦੀ ਸੇਵਾ ਅਤੇ ਹੋਰ ਕਈ ਪ੍ਰਕਾਰ ਦੀਆਂ ਸੇਵਾਵਾਂ ਨਿਭਾਉਂਦੇ ਸਨ। ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਮਹਾਰਾਜ ਨੇ ਵੀ ਪਰਵਾਰ ਨੂੰ ਆਪਣੇ ਸ਼ਸਤਰ ਅਤੇ ਹੋਰ ਕਈ ਪ੍ਰਕਾਰ ਦੀਆਂ ਨਿਸ਼ਾਨੀਆਂ ਤੇ ਹੁਕਮਨਾਮੇ ਬਖ਼ਸ਼ੇ। ਭਾਈ ਰੂਪ ਚੰਦ ਜੀ ਦੇ ਪਰਵਾਰ ਦੀ ਹੁਣ ਬਾਰ੍ਹਵੀਂ ਪੀੜ੍ਹੀ ਚੱਲ ਰਹੀ ਹੈ ਜੋ ਕਿ ਅੱਜ ਵੀ ਸਤਿਗੁਰੂ ਦੀਆਂ ਬਖ਼ਸ਼ਿਸ਼ਾਂ ਦੀ ਸੇਵਾ ਕਰ ਰਹੀ ਹੈ। ਮਾਤਾ ਸੁੰਦਰ ਕੌਰ ਜੀ ਅਤੇ ਮਾਤਾ ਸਾਹਿਬ ਕੌਰ ਜੀ ਵੱਲੋਂ ਭਾਈ ਸਾਹਿਬ ਦੇ ਪਰਵਾਰ ਵਿਚ ਹੋਏ ਭਾਈ ਦੁੱਨਾ ਜੀ ਨੂੰ ਹੁਕਮਨਾਮੇ ਭੇਜੇ ਜੋ ਅੱਜ ਵੀ ਪਰਵਾਰ ਕੋਲ ਸਾਂਭੇ ਹੋਏ ਹਨ। ਭਾਈ ਰੂਪ ਚੰਦ ਜੀ ਦੇ ਸੱਤ ਪੁੱਤਰ ਅਤੇ 18 ਪੋਤਰੇ ਹੋਏ। ਲੱਗਭਗ 35 ਦੇ ਕਰੀਬ ਭਾਈ ਕੇ ਪਿੰਡ ਭਾਈਰੂਪਾ ਪਿੰਡ ਦੇ ਆਲੇ-ਦੁਆਲੇ ਮੌਜੂਦ ਹਨ ਅਤੇ ਸਾਰੇ ਹੀ ਪਿੰਡਾਂ ਵਿਚ ਗੁਰੂ ਸਾਹਿਬ ਦੀਆਂ ਪਵਿੱਤਰ ਨਿਸ਼ਾਨੀਆਂ ਬਖਸ਼ਿਸ਼ਾਂ ਮੌਜੂਦ ਹਨ।