ਗੁਰੂ ਗ੍ਰੰਥ ਮਹਾਨ ਮੇਰੇ ਬੱਚਿਓ
ਗੁਰੂ ਗ੍ਰੰਥ ਮਹਾਨ
ਇਸ ਵਿਚ ਛੇ ਗੁਰਾਂ ਦੀ ਬਾਣੀ
ਪੰਦਰਾਂ ਭਗਤ ਸਾਹਿਬਾਨ
ਗੁਰੂ ਗ੍ਰੰਥ ਮਹਾਨ . . .

ਯਾਰਾਂ ਭੱਟਾਂ ਬਾਣੀ ਇਲਾਹੀ
ਵਿਚ ਸਵੱਈਯਾਂ ਗਾਈ
ਸਤੇ ਬਲਵੰਡ ਨੇ ਵਾਰ ਉਚਾਰੀ
ਟਿੱਕੇ ਦੀ ਵਾਰ ਕਹਿਲਾਈ
ਇਸ ਵਿਚ ‘ਸਦੁ’ ਸੁੰਦਰ ਦੀ ਦਿਸਦੀ
ਮਰਦਾਨੇ ਨੂੰ ਬਖ਼ਸ਼ਿਆ ਮਾਨ।
ਗੁਰੂ ਗ੍ਰੰਥ ਮਹਾਨ . . .

ਇਹ ਉਪਕਾਰ ਗੁਰੂ ਅਰਜਨ ਕੀਤਾ
ਭਾਈ ਗੁਰਦਾਸ ਤੋਂ ਬਾਣੀ ਲਿਖਵਾਈ
ਰਾਮਸਰ ਦੀ ਧਰਤੀ ਸੁਹਣੀ
ਜਿੱਥੇ ਬੀੜ ਬਣਾਈ
ਇਕੱਤੀ ਰਾਗ ਇਸ ਵਿਚ ਸਾਰੇ
ਕੀਤੀ ਆਪ ਸੁਧਾਈ
ਗੁਰੂ ਗ੍ਰੰਥ ਸੰਪੂਰਨ ਹੋਇਆ
ਦਿੱਤਾ ਉੱਚ ਅਸਥਾਨ।
ਗੁਰੂ ਗ੍ਰੰਥ ਮਹਾਨ . . .

ਬਾਬਾ ਬੁੱਢਾ ਨਿਯਤ ਕੀਤਾ
ਪਹਿਲਾ ਮੁੱਖ ਗ੍ਰੰਥੀ
ਨਾਮ ਦਾਨ ਇਸ਼ਨਾਨ ਦ੍ਰਿੜਾਇਆ
ਨੀਂਹ ਪੰਥ ਦੀ ਰੱਖੀ
ਸ਼ਬਦ ਗੁਰੂ ਨੂੰ ਗੁਰੂ ਥਾਪਿਆ
ਹੋਵੇ ਵਿਸ਼ਵ ਕਲਿਆਨ।
ਗੁਰੂ ਗ੍ਰੰਥ ਮਹਾਨ . . .

ਨਾ ਕੋ ਬੈਰੀ ਨਹੀਂ ਬਿਗਾਨਾ
ਇਹ ਗੁਰੂ ਦਾ ਫੁਰਮਾਨ
ਗੁਰੂ ਗ੍ਰੰਥ ਮਹਾਨ . . .

ਜਾਤ ਪਾਤ ਅਸੀਂ ਕੋਈ ਨਾ ਮੰਨੀਏ
ਊਚ ਨੀਚ ਨਾ ਕੋਈ
ਸਿੱਖ ਧਰਮ ਵਿਚ ਕਰਮ ਕਾਂਡ ਲਈ
ਦਿਸੇ ਥਾਂ ਨਾ ਕੋਈ
ਨਾ ਕੋਈ ਪੂਜਾ ਅਰਚਾ ਵਾਲਾ
ਵਾਧੂ ਕੋਈ ਬੰਧਾਨ
ਗੁਰੂ ਗ੍ਰੰਥ ਮਹਾਨ . . .

ਅਮਨ ਸ਼ਾਂਤੀ ਅਸੀਂ ਲੋਚੀਏ
ਸਭ ਦੀ ਸੁਖ ਮਨਾਈਏ।
ਜਾਤ ਜਨਮ ਦੀਆਂ ਵੰਡੀਆਂ ਦੇ ਵਿਚ
ਅਸੀਂ ਮੂਲ ਨਾ ਜਾਈਏ।
ਪੂਰਬ ਪੱਛਮ ਉੱਤਰ ਦੱਖਣ
ਬੰਦੇ ਇਕ ਸਮਾਨ
ਗੁਰੂ ਗ੍ਰੰਥ ਮਹਾਨ . . .

ਗੁਰੂ ਗ੍ਰੰਥ ਹੈ ਗੁਰਬਾਣੀ ਦਾ
ਇਕ ਅਨਮੋਲ ਖਜ਼ਾਨਾ
ਪੜ੍ਹਿਆ ਮਨ ਵਿਚ ਚਾਨਣ ਹੁੰਦਾ
ਮਿਟਦਾ ਭਰਮ ਅਗਿਆਨਾਂ
ਸੇਵਾ ਸਿਮਰਨ ਬੰਦਗੀ ਸਾਨੂੰ
ਜੁਗਤਿ ਇਹੀ ਸਮਝਾਣ
ਗੁਰੂ ਗ੍ਰੰਥ ਮਹਾਨ . . .

ਗੁਰੂ ਗ੍ਰੰਥ ਨੂੰ ਗੁਰੂ ਥਾਪਿਆ
ਗੁਰੂ ਦਸਮੇਸ਼ ਪਿਆਰੇ
ਗੁਰੂ ਗ੍ਰੰਥ ਨੂੰ ਗੁਰੂ ਜਾਣਨਾ
ਉਨ੍ਹਾਂ ਨੇ ਬਚਨ ਉਚਾਰੇ
ਲੋਕ ਪ੍ਰਲੋਕ ਸੁਧਰਣਗੇ ਸਾਰੇ
ਦਿੱਤਾ ਇਹ ਵਰਦਾਨ
ਗੁਰੂ ਗ੍ਰੰਥ ਮਹਾਨ ਮੇਰੇ ਬੱਚਿਓ
ਗੁਰੂ ਗ੍ਰੰਥ ਮਹਾਨ।