ਹੋਈ ਅਕਾਲ ਪੁਰਖ ਦੀ ਅਪਾਰ ਕਿਰਪਾ,
ਮਨੁੱਖਾ ਜਨਮ ਤੂੰ ਜਗ ’ਤੇ ਧਾਰ ਆਇਆ।
ਚੌਰਾਸੀ ਲੱਖ ਜੂਨਾਂ ਭੋਗ ਕੇ ਤੇ,
ਸਭ ਜੂਨਾਂ ਦਾ ਬਣ ਸਰਦਾਰ ਆਇਆ।
ਹੀਰਾ ਜਨਮ ਤੇਰੇ ਜਨਮ ਨੂੰ ਕਹੇ ਬਾਣੀ ,
ਔਖੀਆਂ ਘਾਟੀਆਂ ਕਰ ਤੂੰ ਪਾਰ ਆਇਆ।
ਜਾਮਾ ਧਾਰ ਕੇ ਰੱਬੀ ਮਨੁੱਖਤਾ ਦਾ,
ਇਸ ਸੁਹਣੇ ਵਿਚ ਸੰਸਾਰ ਆਇਆ।
ਸਿਮਰਨ ਕਰ ਕੇ ਉਸ ਪਰਮਾਤਮਾ ਦਾ,
ਕਰ ਕੇ ਜਨਮ ਸਫ਼ਲਾ ਸਦਾ ਲਈ ਪਾਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।

ਕਰਦਾ ਨਹੀਂ ਤੂੰ ਸ਼ੁਕਰ ਪਰਮਾਤਮਾ ਦਾ,
ਭੰਗ ਦੇ ਭਾੜੇ ਜੀਵਨ ਗਵਾ ਰਿਹਾ ਏਂ।
ਝੂਠੇ ਨਸ਼ਿਆਂ ਦੀ ਮਸਤੀ ਵਿਚ ਮਸਤ ਹੋ ਕੇ,
ਸੁਹਣੇ ਸਰੀਰ ਨੂੰ ਰੋਗੀ ਬਣਾ ਰਿਹਾ ਏਂ।
ਔਖੇ ਵੇਲੇ ਤੇਰਾ ਕਿਸੇ ਨਹੀਂ ਸਾਥ ਦੇਣਾ
ਐਵੇਂ ਕੂੜ ਸੰਗ ਮਿੱਤ੍ਰਤਾ ਪਾ ਰਿਹਾ ਏਂ।
ਜੋ ਵੀ ਆਇਆ ਹੈ ਸਭ ਨੇ ਚਲੇ ਜਾਣਾ,
ਐਵੇਂ ਪਾਪਾਂ ਦੀ ਖੱਟੀ ਵੱਲ ਜਾ ਰਿਹਾ ਏਂ।
ਛੱਡ ਕੇ ਬਦੀਆਂ ਤੇ ਮਾੜੀਆਂ ਆਦਤਾਂ ਨੂੰ,
ਸੀਤਲ ਨਾਮ ਜਪ ਕੇ ਠੰਢਾ ਠਾਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।

ਸੱਚ ਬੋਲ ਕੇ ਧਰਮ ਦੀ ਕਿਰਤ ਕਰ ਕੇ,
ਵੰਡ ਛਕ ਕੇ ਸਿੱਖੀ ਕਮਾਈ ਜਾਂਦੀ।
ਪੜ੍ਹ ਕੇ ਬਾਣੀ ਨੂੰ ਸੱਚਾ ਗਿਆਨ ਹੁੰਦਾ,
ਸੱਚੀ ਜਗ ਵਿਚ ਸਾਂਝ ਹੈ ਪਾਈ ਜਾਂਦੀ।
ਕਿਤੇ ਆਰੇ ਹੇਠ ਚੀਰੀ, ਕਿਤੇ ਬੰਦ-ਬੰਦ ਕੱਟੇ,
ਨੀਹਾਂ ਵਿਚ ਹੈ ਸਿੱਖੀ ਅਜ਼ਮਾਈ ਜਾਂਦੀ।
ਧਰ ਕੇ ਤਲੀ ’ਤੇ ਸੀਸ ਜੰਗ ਅੰਦਰ,
ਬਾਜ਼ੀ ਮੌਤ ਦੀ ਸਦਾ ਹੈ ਲਾਈ ਜਾਂਦੀ।
ਆਸ ਛੱਡ ਕੇ ਸਦਾ ਜਿਊਣ ਵਾਲੀ,
ਪਹਿਲਾਂ ਮਰਨ ਲਈ ਸਿੱਖਾ ਤਿਆਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।

ਕਰ ਕੇ ਬੰਦਗੀ ਇਕ ਪਰਮਾਤਮਾ ਦੀ,
ਸ਼ੁਰੂ ਦਿਨ ਦਾ ਸਫ਼ਰ ਤੂੰ ਕਰ ਬੰਦੇ।
ਨਾਮ ਜਪਿਆ ਹੀ ਕਾਰਜ ਨੇ ਰਾਸ ਹੁੰਦੇ,
ਖ਼ਜ਼ਾਨੇ ਨਾਮ ਦੇ ਸਦਾ ਹੀ ਭਰ ਬੰਦੇ।
ਕਰ ਕੇ ਸੰਗਤ ਭਗਤਾਂ ਸਤਿਸੰਗੀਆਂ ਦੀ,
ਵਾਂਗ ਚੰਦਨ ਦੇ ਸਦਾ ਹੀ ਠਰ ਬੰਦੇ।
ਸੱਚ ਕਿਹਾ ਪਿਤਾ ਦਸਮੇਸ਼ ਜੀ ਨੇ,
ਸੱਚੇ ਪ੍ਰੇਮ ਦੇ ਨਾਲ ਤੂੰ ਤਰ ਬੰਦੇ।
ਪੰਜਾਂ ਬਦੀਆਂ ਦਾ ਦਿਲੋਂ ਤਿਆਗ ਕਰ ਕੇ,
ਇਸ ਫ਼ਾਨੀ ਸੰਸਾਰ ਤੋਂ ਪਾਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।

ਆਪਣੇ ਆਪੇ ਨੂੰ ਭੁੱਲ ਕੇ ਅੱਜ ਵੀਰਾ,
ਝੂਠੇ ਡੇਰਿਆਂ ਵੱਲ ਤੂੰ ਜਾ ਰਿਹਾ ਏਂ।
ਛੱਡ ਕੇ ਗੁਰੂ ਗ੍ਰੰਥ ਸਾਹਿਬ ਦਾ ਰਾਹ ਸੱਚਾ,
ਐਵੇਂ ਮਨ ਨੂੰ ਭੁਲੇਖਿਆਂ ਵਿਚ ਪਾ ਰਿਹਾ ਏਂ।
ਮਗਰ ਲੱਗ ਕੇ ਝੂਠੇ ਪਖੰਡੀਆਂ ਦੇ,
ਆਪਣਾ ਕੀਮਤੀ ਸਮਾਂ ਗਵਾ ਰਿਹਾ ਏਂ।
ਗੁਰਮਤਿ ਪ੍ਰਕਾਸ਼ 190 ਜਨਵਰੀ 2017
ਕੋਈ ਕਿਸੇ ਨੂੰ ਕੁਝ ਨਹੀਂ ਦੇ ਸਕਦਾ,
ਐਵੇਂ ਕਬਰਾਂ ’ਤੇ ਦੀਵੇ ਜਗਾ ਰਿਹਾ ਏਂ।
ਡੁੱਲੇ ਬੇਰਾਂ ਦਾ ਅਜੇ ਕੁਝ ਵਿਗੜਿਆ ਨਹੀਂ,
ਨਾਮ ਜਪ ਕੇ ਭਵਜਲ ਤੋਂ ਪਾਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।

ਦੇਸ਼ ਕੌਮ ਲਈ ਜਿਹੜੇ ਕੁਰਬਾਨ ਹੁੰਦੇ,
ਨਾਉਂ ਉਹਨਾਂ ਦਾ ਉੱਚਾ ਜਹਾਨ ਹੁੰਦਾ।
ਉੱਚਾ ਹੁੰਦਾ ਸਾਰਾ ਪਰਵਾਰ ਪਹਿਲਾਂ,
ਫਿਰ ਸਾਰਾ ਹੀ ਉੱਚਾ ਖ਼ਾਨਦਾਨ ਹੁੰਦਾ।
ਕਰਕੇ ਬੰਦਗੀ ਉਸ ਪਰਮਾਤਮਾ ਦੀ,
ਰੱਬੀ ਬਾਣੀ ਦਾ ਉੱਚਾ ਗਿਆਨ ਹੁੰਦਾ।
ਬਾਣੀ ਜਪ ਕੇ ਹੀ ਜਗ ਵਿਚ ਮਾਣ ਮਿਲਦਾ,
ਸੱਚਖੰਡ ਵਿਚ ਵੀ ਪ੍ਰਵਾਨ ਹੁੰਦਾ।
ਭੁਲੇਖੇ ਮਨ ਦੇ ਵਿੱਚੋਂ ਕੱਢ ਸਾਰੇ,
ਸਿੰਘ ਸਜਣ ਲਈ ਤਿਆਰ ਹੋ ਜਾ।
ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਤੇ,
ਦਸਮੇਸ਼ ਪਿਤਾ ਦਾ ਸਿੰਘ ਸਰਦਾਰ ਹੋ ਜਾ।