ਪੀਡੀਆਂ ਗੰਢਾਂ ਖੋਲ੍ਹ ਵਿਖਾਵਾਂ ਇਹ ਔਕਾਤ ਨਹੀਂ
ਜੋ ਚਿਤ ਆਵੇ ਖਿਆਲ ਤਾਂ ਆਖ ਸੁਨਾਉਣਾ ਚਾਹੀਦੈ।

ਪਿਆਰੇ ਪੰਥ ਦੇ ਪੈਂਡੇ ਭਖੜੇ ਸੰਘਣੇ ਹੋ ਚਲੇ
ਰਾਹੀਂ ਡਿੱਗਿਆ ਕੰਡਾ ਦੂਰ ਹਟਾਉਣਾ ਚਾਹੀਦੈ।

ਇਕ ਦੂਜੇ ਦੇ ਲੀੜੇ ਲਾਹ ਕੇ ਬਹੁਤ ਵੇਖਿਆ ਏ
ਨੁਸਖਾ ਪਾਟੇ ਕੱਜਣ ਦਾ ਅਜ਼ਮਾਉਣਾ ਚਾਹੀਦੈ।

ਚੰਗਾ ਹੋਵੇ ਸੁਣਨੇ ਕਹਿਣੇ ਵਾਲੀ ਬਾਤ ਤੁਰੇ
ਸਾਂਝੀ ਗੱਲ ’ਤੇ ਹਾਂ ਵਿਚ ਸੀਸ ਹਿਲਾਉਣਾ ਚਾਹੀਦੈ।

ਅੱਜ ਜੋ ਮੈਨੂੰ ਢਾਹੁੰਦੇ ਕਲ੍ਹ ਨੂੰ ਤੈਨੂੰ ਢਾਹੁਣਗੇ
ਔਖੇ ਵੇਲੇ ਸੱਜਣਾ ਸਾਥ ਨਿਭਾਉਣਾ ਚਾਹੀਦੈ।

ਸਾਰਾ ਬਾਗ਼ ਮੁਕੱਦਸ ਇੱਕੋ ਰੱਬ ਨੇ ਸਾਜਿਆ ਏ
ਵੱਖੋ ਵੱਖਰੇ ਰੰਗ ਦਾ ਫੁੱਲ ਸਲਾਹੁਣਾ ਚਾਹੀਦੈ।

ਸਤਿਗੁਰ! ਤੇਰੇ ਨਾਂ 'ਤੇ ਆਖਰੀ ਸਾਹ ਤਕ ਜੂਝਾਂਗੇ
ਸੁੱਚੇ ਵਕਤੀਂ ਕੀਤਾ ਕਉਲ ਪੁਗਾਉਣਾ ਚਾਹੀਦੈ।