ਸਾਬਤ ਸੂਰਤ ਦਸਤਾਰ ਸਜਾ ਕੇ।
ਪੰਜ ਕਕਾਰ ਸ਼ਿੰਗਾਰ ਬਣਾ ਕੇ।
ਨਿਆਰੀ ਹੋਂਦ, ਪਹਿਚਾਣ ਬਣਾਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।

ਸ਼ਬਦ ਗੁਰੂ ਦੇ ਲੱਗਕੇ ਚਰਨੀਂ।
ਗੁਰ-ਦਰਸਾਈ ਕਰੀਏ ਕਰਨੀ।
ਕੇਵਲ ਇਕ ਅਕਾਲ ਧਿਆਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।

ਬਣ ਜਾਈਏ ਅਨੰਦਪੁਰ ਦੇ ਵਾਸੀ।
ਵਹਿਮ ਭਰਮ ਤੋਂ ਹੋਏ ਖਲਾਸੀ।
ਵਿਕਾਰ, ਨਿਘਾਰ, ਹੰਕਾਰ ਭਜਾਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।

ਸਮਝ ਵਿਚਾਰ ਕੇ ਪੜ੍ਹੀਏ ਬਾਣੀ।
ਸੁਲਝ ਜਾਏਗੀ ਉਲਝੀ ਤਾਣੀ।
ਭਾਉ-ਭਗਤੀ ਨਾਲ ਪ੍ਰਭ ਨੂੰ ਪਾਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।

ਮਾਤਾ ਸਾਹਿਬ ਕੌਰ ਨੂੰ ਕਹਿ ਕੇ।
ਪਿਤਾ ਪਿਆਰ ਦਸਮੇਸ਼ ਤੋਂ ਲੈ ਕੇ।
ਅਕਾਲ ਪੁਰਖ ਕੀ ਫੌਜ ਕਹਾਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।

ਊਚ-ਨੀਚ ਵਿਰੋਧ ਤੋਂ ਉੱਚਾ।
ਲਾਲਚ ਮੁਕਤ ਕੋ੍ਰਧ ਤੋਂ ਉੱਚਾ।
ਔਗੁਣ ਛੱਡ ਗੁਣ-ਸਾਂਝ ਬਣਾਈਏ।
ਖਾਲਸਾ-ਸਾਜਣਾ ਦਿਵਸ ਮਨਾਈਏ।

ਪਾਹੁਲ ਅਸੀਂ ਖੰਡੇ-ਧਾਰ ਲਵਾਂਗੇ।
ਦੁਰਲੱਭ ਜਨਮ ਸੰਵਾਰ ਲਵਾਂਗੇ।
ਗੁਰਬਾਣੀ ਪੜ੍ਹੀਏ, ਬਾਣਾ ਪਾਈਏ।
ਖਾਲਸਾ ਸਾਜਣਾ ਦਿਵਸ ਮਨਾਈਏ।