ਸ਼ਬਦ ਕੀ ਧੂਨੈ ਕਿਹਾ ਇੱਕ-ਓ-ਅੰ-ਕਾਰ ਹੈ,
ਗੁਰੂ ਨਾਨਕ ਦੀ ਜੋਤ ਵਿਚ, ਆਪ ਨਿਰੰਕਾਰ ਹੈ,
ਗਿਆਨ ਦੀ ਉਦਾਸੀ ਧਾਰ, ਕੀਤਾ ਜਗਤ ਉੱਧਾਰ ਹੈ,
ਨਾਮ ਜਪ, ਵੰਡ ਛਕ, ਦਿੱਤਾ ਕਿਰਤੀ ਦਾ ਸਾਰ ਹੈ,
ਗੁਰੂ ਨਾਨਕ ਦੀ ਜੋਤ ਵਿਚ, ਆਪ ਨਿਰੰਕਾਰ ਹੈ। ਲਹਣੇ ਕੀਤਾ ਅੰਗ-ਸੰਗ, ਗੁਰੂ ਅੰਗਦ ਨਿਹਾਲ ਹੈ,
ਤਿਨਾ ਦੀ ਸੁਰਤ, ਗੁਰ ਸ਼ਬਦ ਹੀ ਨਾਲ ਹੈ,
ਕਰਤਾਰ ਦੀ ਪ੍ਰੀਤ ਹੈ, ਖਡੂਰ ਵਸਾਇਆ ਹੈ,
ਗੁਰਮੁਖੀ ਲੇਖਣੀ ਦਾ, ਚਾਨਣਾ ਵੀ ਪਾਇਆ ਹੈ,
ਗੁਰਮੁਖੀ ਲੇਖਣੀ ਦਾ, . . . | ਸੇਵਾ ਅਤੇ ਸਿਮਰਨ ਦੀ ਗਾਗਰ ਵਗਾਈ ਹੈ,
ਬਿਰਦ ਅਵਸਥਾ ਦੀ ਵੱਡੀ ਕਮਾਈ ਹੈ,
ਤੀਜੇ ਪਾਤਸ਼ਾਹ ਦੀ ਸੇਵਾ, ਨਿਥਾਵਿਆਂ ਨੂੰ ਥਾਂਵ ਹੈ,
ਅਕਥ ਦੀ ਕਥਾ ਦੇ ਵਿਚ, ਭਾਰੀ ਸ਼ਬਦਾਂ ਦੀ ਘਾਲ ਹੈ,
ਅਕਥ ਦੀ ਕਥਾ ਦੇ ਵਿਚ . . . l ਜਲ ਅੰਮ੍ਰਿਤ ਹੈ ਪਾਇਆ, ਗੁਰੂ ਆਪ ਵਰਸਾਇਆ ਹੈ,
ਸਰੂਪ ਚਉਥੇ ਪਾਤਸ਼ਾਹ, ਗੁਰੂ ਨਾਨਕ ਕਹਾਇਆ ਹੈ,
ਗੁਰੂ ਰਾਮਦਾਸ ਜੀ ਨੂੰ ਮਿਲੀ ਹੈ ਬਡਾਈ, ਦਿੱਤਾ ਸ੍ਰਿਸ਼ਟੀ ਨੂੰ ਤਾਰ ਹੈ,
ਜੋਗ ਅਤੇ ਜੁਗਤੀ ਦਾ ਮਾਰਗ ਦਿਖਾਇਆ, ਗੁਰ ਸੰਗਤ ਨਿਹਾਲ ਹੈ,
ਜੋਗ ਅਤੇ ਜੁਗਤੀ ਦਾ ਮਾਰਗ ਦਿਖਾਇਆ, ਗੁਰ . . . । ਸ੍ਰੀ ਗੁਰੂ ਅਰਜਨ ਹੈ ਬੋਹਿਥਾ, ਗੁਰੂ ਜੀ ਕਾ ਦੋਹਿਤਾ,
ਹਰਿਮੰਦਰ ਹੈ ਸਾਜਿਆ, ਪਰਮੇਸਰ ਕਾ ਜੋ ਥਾਨ ਹੈ,
ਤਖ਼ਤ ਹੈ ਗੁਰੂ ਜੀ ਦਾ, ਤੱਤੀ ਤਵੀ ਉੱਤੇ ਲੱਗਿਆ,
“ਤੇਰਾ ਕੀਆ ਮੀਠਾ ਲਾਗੈ” ਮੁਖਹੁ ਇਹੀ ਕੱਢਿਆ,
“ਤੇਰਾ ਕੀਆ ਮੀਠਾ ਲਾਗੈ” . . . । ਛੇਵੇਂ ਗੁਰੂ ਫੌਜ ਸਾਜ, ਡਰ, ਜ਼ੁਲਮ ਨੂੰ ਪਾਇਆ ਹੈ,
ਹਰਿਗੋਬਿੰਦ ਸਾਹਿਬ ਵਿਚ, ਗੁਰੂ, ਅਰਜਨ ਜੀ ਆਇਆ ਹੈ,
ਮੀਰੀ ਅਤੇ ਪੀਰੀ ਸਾਜ, ਗੁਰੂ, ਪਾਤਸ਼ਾਹ ਕਹਾਇਆ ਹੈ,
ਅਕਾਲ ਦਾ ਵੀ ਬੁੰਗਾ, ਅਕਾਲ ਨੇ ਸਜਾਇਆ ਹੈ,
ਅਕਾਲ ਦਾ ਵੀ ਬੁੰਗਾ, . . . | ਨਿਰੰਕਾਰ ਦਾ ਧਿਆਨ ਧਰ, ਗੁਰ ਸ਼ਬਦ ਧਿਆਇਆ ਹੈ,
ਗੁਰੂ ਹਰਿਰਾਇ ਜੀ, ਨਿਰਵੈਰ ਦ੍ਰਿੜਾਇਆ ਹੈ,
ਗੁਰੂ ਪਿਤਾ ਸੰਗ ਉਨ੍ਹਾਂ, ਗੁਰਸਿੱਖੀ ਨੂੰ ਵਧਾਇਆ ਹੈ,
ਨਿਰਭਉ ਦਾ ਰੂਪ ਹੋ ਕੇ, ਗੁਰੂ ਬਚਨ ਕਮਾਇਆ ਹੈ,
ਨਿਰਭਉ ਦਾ ਰੂਪ ਹੋ ਕੇ, . . .। ਲੋੜ ਪਈ ਦੁਖਿਆਰਿਆਂ, ਗੁਰੂ ਆਪ ਚੱਲ ਆਏ ਨੇ,
ਦੋਖ, ਦੁੱਖ, ਪਾਪ ਸਭ ਪਲਾਂ 'ਚ ਛਡਾਏ ਨੇ,
ਡਿਠਿਆ ਐ ਹਰਿਕ੍ਰਿਸ਼ਨ ਜੀ ਨੇ, ਗੁਰੂ ਹਰਿਰਾਇ ਜੀ ਨੂੰ,
ਗੁਰ ਵਿੱਦਿਆ ਨਿਪੁੰਨ, ਬਾਲਾ ਪ੍ਰੀਤਮ ਕਹਾਏ ਨੇ,
ਗੁਰ ਵਿੱਦਿਆ ਨਿਪੁੰਨ, . . .। ਤੇਗ ਦੇ ਨੇ ਧਨੀ, ਜਿਨ੍ਹਾਂ ਬੰਦਗੀ ਨੂੰ ਸਾਜਿਆ,
ਤੇਗ ਅਤੇ ਬੰਦਗੀ, ਗੁਰਿਆਈ ਨੂੰ ਨਿਵਾਜਿਆ,
ਸਰੂਪ ਨੌਵੇਂ ਪਾਤਸ਼ਾਹ, ਗੁਰਿਆਈ ਵਿਚ ਆਇਆ ਹੈ,
ਵਾਰ ਦਿੱਤਾ ਸੀਸ ਉਨ੍ਹਾਂ ਧਰਮ ਵੀ ਬਚਾਇਆ ਹੈ,
ਵਾਰ ਦਿੱਤਾ ਸੀਸ ਉਨ੍ਹਾਂ . . . । ਪੂਜਾ ਹੈ ਅਕਾਲ ਦੀ, ਪ੍ਰੇਮ ਹੀ ਯਕੀਨ ਹੈ,
ਗੁਰ, ਪਾਤਸ਼ਾਹੀ ਦਸਵੀਂ, ਸੂਰਬੀਰਤਾ ਪਰਬੀਨ ਹੈ,
ਖਾਲਸਾ ਹੈ ਪੰਥ ਸਦਾ ਗੁਰੂ ਗ੍ਰੰਥ ਮੇਂ ਯਕੀਨ ਹੈ
ਖਾਲਸੇ 'ਚ ਗੁਰੂ, ਗੁਰੂ ਖਾਲਸੇ 'ਚ ਲੀਨ ਹੈ,
ਖਾਲਸੇ 'ਚ ਗੁਰੂ, ਗੁਰੂ ਖਾਲਸੇ 'ਚ ਲੀਨ ਹੈ। |
