ਪ੍ਰਭ ਹਰਿਮੰਦਰ ਜੋਤ ਇਲਾਹੀ
ਗੁਰ-ਸਬਦ ਗੁਰੂ ਰੁਸ਼ਨਾਈ,
ਧੰਨ ਸ੍ਰੀ ਗੁਰੂ ਰਾਮਦਾਸ ਤੋਂ
ਸ੍ਰੀ ਗੁਰੂ ਅਰਜਨ ਇਹ ਬਿਧ ਆਈ।
ਤੀਜੇ ਪਹਿਰੇ ਸੰਤ ਜਨਾ ਸੰਗ
ਹਰਿ ਹਰਿ ਹਰਿ ਧੁਨ ਗਾਈ,
ਰਾਗੁ ਮਲਾਰ ਜਿਉਂ ਸਾਵਣ
ਵਰਖਾ ਅੰਮ੍ਰਿਤ ਧਾਰ ਵਰਸਾਈ।
ਚਉਥੇ ਪਹਿਰ 'ਚ ਆਸਾ ਚਿਤ
ਲੈ ਦਰਸ਼ਨ ਤਾਈਂ ਪ੍ਰਗਟਾਈ ਹੈ,
ਸੋਭ ਸਿੰਘਾਸਨ ਸਤਿਗੁਰ ਬਾਣੀ
ਜੀ ਧੁਰ ਦਰਗਾਹੋਂ ਆਈ ਹੈ।
ਪ੍ਰਭਾਤ ਚੜ੍ਹੀ ਬਹੁ ਖੁਸ਼ੀਆਂ ਲੈ
ਕੇ ਜੋ ਨਾਦ ਬਿਲਾਵਲੁ ਗਾਇਆ,
ਭੈਰਉ, ਪ੍ਰਭਾਤੀ, ਰਾਮਕਲੀ ਵਿਚ
ਸਬਦ ਇਲਾਹੀ ਆਇਆ।
ਦੂਜੇ ਪਹਿਰੇ ਜਿਉਂ ਮਉਲੀ ਰੁੱਤੇ
ਓਹ ਚੇਤ ਬਸੰਤੁ ਚਿਤ ਪਾਇਆ,
ਦੇਵਗੰਧਾਰੀ, ਗੌਂਡ, ਗੂਜਰੀ ਟੋਡੀ,
ਸੂਹੀ ਮਿਲ ਗਾਇਆ।
ਚਾਨਣ ਹੋਇਆ ਤੀਜੇ ਪਹਿਰੇ
ਸਾਰਗ, ਸਾ-ਰੰਗ ਪਾਇਆ,
ਰਾਗੁ ਤਿਲੰਗ, ਵਡਹੰਸੁ, ਧਨਾਸਰੀ
ਮਾਰੂ ਸੰਗ ਰੁਸ਼ਨਾਇਆ।
ਚਉਥੇ ਪਹਿਰ 'ਚ ਮਾਲੀਗਉੜਾ
ਬੈਰਾੜੀ ਨਾਦ ਮਿਲਾਇਆ,
ਰਾਗੁ ਤੁਖਾਰੀ ਸੰਗ ਜੈਤਸਰੀ
ਗਉੜੀ ਹਰਿ ਗੁਣ ਗਾਇਆ।
ਫਿਰ ਸਾਂਝ ਪਈ ਉਸ ਸੱਚੇ ਤਾਂਈਂ
ਜਿਉਂ ਰਾਗ ਸੁਰੰਗੜਾ ਆਇਆ,
ਸਿਰੀ ਰਾਗੁ ਰਾਗਨ ਮੇਂ ਰਾਜਾ
ਮਿਲ ਮਾਝ ਵੀ ਹਰਿ ਰੰਗ ਰਾਇਆ।
ਦਰ, ਸੋਦਰ ਦੀ ਅਕਥ ਕਥਾ ਸੁਣ
ਸਭ ਨਾਨਕੁ ਨਾਮ ਧਿਆਇਆ,
ਛੇੜ ਰਬਾਬ ਜਿਉਂ ਅਨਹਤ ਨਾਦੋਂ
ਭਾਈ ਮਰਦਾਨੇ ਨਾਦ ਵਜਾਇਆ।
ਰਾਤ ਦੇ ਪਹਿਰੇ ਲੋਅ ਸਬਦ ਦੀ
ਕੇਦਾਰਾ, ਕਲਿਆਨ ਜਗਾਇਆ,
ਨਟ ਨਾਰਾਇਨ, ਜੈਜਾਵੰਤੀ ਮਿਲ
ਸਾਚਾ ਸਬਦ ਸੁਹਾਇਆ।
ਦੂਜੇ ਪਹਿਰੇ ਅੱਧੀ ਰਾਤੀ ਸੋਰਠਿ
ਪ੍ਰੀਤ ਚਿਤ ਲਾਇਆ ਰਾਗੁ ਕਾਨੜਾ,
ਬਿਹਾਗੜਾ ਸੰਗੇ ਸੱਚਖੰਡ ਨਾਦ ਸਮਾਇਆ।
ਜਿਉਂ ਦੇਵਪੁਰੀ ਗਗਨੰਤਰ ਮਹਿ
ਇੱਕ ਸਾਚਾ ਸਬਦ ਸੁਹਾਇਆ ।