ਤੀਸਰੇ ਪਾਤਸ਼ਾਹ ਸ੍ਰੀ ਗੁਰੂ ਅਮਰਦਾਸ ਜੀ ਦੇ 450-ਸਾਲਾ ਜੋਤੀ ਜੋਤਿ ਦਿਵਸ ਅਤੇ ਚੌਥੇ ਪਾਤਸ਼ਾਹ ਸ੍ਰੀ ਗੁਰੂ ਰਾਮਦਾਸ ਜੀ ਦੇ 450-ਸਾਲਾ ਗੁਰਿਆਈ ਦਿਵਸ ਨੂੰ ਸਮਰਪਿਤ:-

ਧੁਰਾ ਸਿੱਖੀ ਦਾ ਗੋਇੰਦਵਾਲ
ਜਾਣਾ ਉੱਥੇ ਹੈ ਹਰ ਹਾਲ।

ਗੁਰਿਆਈ ਚੌਥੇ ਗੁਰਾਂ ਦੀ
ਹੋ ਗਏ ਸਾਢੇ ਚਾਰ ਸੌ ਸਾਲ।

ਤੀਜੇ ਗੁਰਾਂ ਦਾ ਜੋਤੀ ਜੋਤਿ
ਦਿਵਸ ਮਨਾਇਆ ਜਾਣਾ ਨਾਲ।

ਘੱਤ ਵਹੀਰਾਂ ਚਲੋ ਪੁੱਜੋ ਉੱਥੇ
ਸੰਗਤ ਦੇ ਤਾਈਂ ਲੈ ਕੇ ਨਾਲ।

ਕੌਮ ਇਕੱਠੀ ਹੋਵੇਗੀ ਸਾਰੀ
ਮਿਹਰ ਕਰੇਗਾ ਪੁਰਖ ਅਕਾਲ।

ਜਿੱਥੇ ਸਤਿਗੁਰਾਂ ਬਾਉਲੀ ਲਾਈ
ਆਪਣੇ ਕਰ ਕਮਲਾਂ ਦੇ ਨਾਲ।

ਪਹਿਲੇ ਪੰਗਤ ਪਾਛੈ ਸੰਗਤ
ਦਿੱਤੀ ਗੁਰਾਂ ਸਿੱਖਿਆ ਬਾਕਮਾਲ।

ਏਕੇ ਦਾ ਗੁਰਾਂ ਪਾਠ ਪੜ੍ਹਾਇਆ
ਲਾਈ ਖਲਕਤ ਗਲ ਦੇ ਨਾਲ।

ਸਮਾਜ ਦੇ ਵਿਚ ਕੁਰੀਤੀਆਂ ਸਨ ਜੋ
ਗਲ਼ ਦਾ ਸੀ ਬਣੀਆਂ ਜੰਜਾਲ।

ਗੁਰ ਘਰ ਦੀ ਸਿੱਖਿਆ ਨੇ ਤੋੜਿਆ
ਵਹਿਮਾਂ ਭਰਮਾਂ ਦਾ ਵਿਛਿਆ ਜਾਲ।

ਪਰਉਪਕਾਰਾਂ ਦੀ ਝੜੀ ਲਗਾਈ
ਮਨੁੱਖੀ ਹੱਕ ਕਰ ਦਿੱਤੇ ਬਹਾਲ

ਬਾਣੀ ਕਰਦੀ ਜ਼ਿੰਦਗੀ ਸੁਰ ਮਈ
ਤਾਲ ਦੇ ਨਾਲ ਮਿਲਾ ਕੇ ਤਾਲ।

ਜਾਂਦੇ ਹਾਂ ਜਦ ਗੁਰਾਂ ਦੇ ਦਰ 'ਤੇ
ਕਰ ਦਿੰਦੇ ਗੁਰੂ ਜੀ ਮਾਲਾ ਮਾਲ।

ਗੁਰਮਤਿ ਦੇ ਚਲੋ ਪਾਂਧੀ ਬਣੀਏ
ਗੁਰਸਿੱਖੀ ਦੀ ਚਲੀਏ ਚਾਲ।

‘ਰਹੀਮਪੁਰੀ’ ਕਰ ਗੁਰਾਂ ਦਾ ਦਰਸ਼ਨ
ਜਾਂਦੇ ਨੇ ਤਨ ਮਨ ਹੋ ਨਿਹਾਲ।

ਧੁਰਾ ਸਿੱਖੀ ਦਾ ਗੋਇੰਦਵਾਲ
ਜਾਣਾ ਉੱਥੇ ਹੈ ਹਰ ਹਾਲ।