ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ। ਬੰਦਾ ਸਿੰਘ ਨੰਦੇੜ ਤੋਂ ਵੱਲ ਪੰਜਾਬ ਦੇ ਆਇਆ ਏ।
ਗੁਰੂ ਲਾਲਾਂ ਦਾ ਲੈ ਬਦਲਾ ਸੂਬਾ ਮਾਰ ਮੁਕਾਇਆ ਏ। ਸਰਹਿੰਦ ਫਤਿਹ ਦੀ ਚਪੜਚਿੜੀ ’ਚ ਯਾਦ ਸੁਹਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਸਿੱਖ ਰਾਜ ਦਾ ਬਾਨੀ ਉਹ ਯੋਧਾ ਸਿੰਘ ਸੂਰਾ ਏ। ਜਰਨੈਲ ਅਨੋਖਾ ਧਰਮੀ ਉਹ ਕਰਨੀ ਦਾ ਪੂਰਾ ਏ।
ਫੌਜ ਉਸਦੀ ਕੌਮ ਲਈ ਜਾਨ ਦੀ ਬਾਜ਼ੀ ਲਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ।
ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ। ਪੰਜਾਬ ਦੇ ਵਾਸੀ ਰਾਜ ਭਾਗ ਦੇ ਮਾਲਕ ਹੋ ਗਏ ਸੀ।
ਹਿੱਕਾਂ ਤਾਣ, ਉਹ ਬੰਦਾ ਸਿੰਘ ਦੇ ਨਾਲ ਖਲੋ ਗਏ ਸੀ।
ਨਾਮ ਸਿੰਘਾਂ ਦਾ ਸੁਣ ਕੇ ਹੁਣ ਦਿੱਲੀ ਭੈਅ ਖਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ।
ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ। ਗਹਿਗੱਚ ਮੁਕਾਬਲਾ ਵਿਚ ਮੈਦਾਨ-ਏ-ਜੰਗ ਦੇ ਹੋਇਆ ਏ।
ਚੱਪਾ ਚੱਪਾ ਧਰਤ ’ਤੇ ਖ਼ੂਨ ਸਿੰਘਾਂ ਦਾ ਚੋਇਆ ਏ। ਫੌਜ ਵੈਰੀ ਦੀ ਨੰਗਲ ਗੜੀ ਨੂੰ ਘੇਰਾ ਪਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ।
ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ। ਗੁਰਦਾਸ ਨੰਗਲ ਤੋਂ ਕੈਦ ਕਰ ਲਿਆ ਸਿੰਘ ਸੂਰਿਆਂ ਨੂੰ।
ਗੱਡਿਆਂ ਉੱਤੇ ਲੱਦ ਲਿਆ ਸੰਗਲਾਂ ਵਿਚ ਨੂੜਿਆਂ ਨੂੰ।
ਬਰਾਤ ਸਿੰਘਾਂ ਦੀ ਮੌਤ ਵਿਆਹਵਣ ਦਿੱਲੀ ਜਾ ਰਹੀ ਏ।
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਸਿੰਘਾਂ ਦੇ ਸਿਰ ਵੱਢ ਕੇ ਜ਼ਾਲਮਾਂ ਢੇਰ ਲਗਾ ਲਏ ਨੇ।
ਨੇਜਿਆਂ ਉੱਤੇ ਟੰਗ ਲਏ ਪੰਡਾਂ ਵਿਚ ਪਾ ਲਏ ਨੇ।
ਮੁਗ਼ਲ ਫੌਜ ਪਿਆ ਲਗਦੈ ਸਿੰਘਾਂ ਤਾਈਂ ਡਰਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਸਿੱਖੀ ਦੀ ਜ਼ਾਲਮਾਂ ਦਿੱਲੀ ਦੇ ਵਿਚ ਖਿੱਲੀ ਉਡਾਈ ਏ।
ਈਨ ਮਨਾਉਣੀ ਸਿੰਘਾਂ ਨੂੰ ਪੂਰੀ ਵਾਹ ਲਾਈ ਏ।
ਮੁਗ਼ਲਾਂ ਦੀ ਟੋਲੀ ਕਦਮ ਕਦਮ ’ਤੇ ਮੂੰਹ ਦੀ ਖਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ।
ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਸਿੱਖੀ ਤੇ ਦ੍ਰਿੜ੍ਹਤਾ ਦੀ ਅਜਬ ਇਕ ਘਟਨਾ ਹੋਈ ਏ।
ਕਹਿ, ਸਿੱਖ ਬੱਚੇ ਠੁਕਰਾ ਦਿੱਤੀ ਮਾਂ ਦੀ ਅਰਜੋਈ ਏ।
“ਮੈਂ ਹਾਂ ਸਿੰਘ” ਮਾਂ ਝੂਠ ਬੋਲਦੀ ਟਪਲਾ ਖਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
700 ਸਿੰਘ ਸ਼ਹੀਦ ਅੱਖਾਂ ਦੇ ਸਾਹਮਣੇ ਹੋਇਆ ਏ।
ਪੁੱਤ ਅਜੈ ਸਿੰਘ ਦੀ ਵਾਰੀ ਆਈ ਰਤਾ ਦਰਦ ਨਾ ਹੋਇਆ ਏ।
ਨਾਮ ਬਾਣੀ ਦੀ ਮਸਤੀ ਸਿੰਘ ਦੇ ਮੁਖ ’ਤੇ ਛਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਕੱਢ ਕਾਲਜਾ ਪੁੱਤ ਦਾ ਉਸਦੇ ਮੂੰਹ ਵਿਚ ਪਾਇਆ ਏ।
ਪਹਿਲਾ ਬਾਪ ਅਨੋਖਾ ਜਿਸ ਨਾਂ ਸਿਦਕ ਡੁਲਾਇਆ ਏ।
ਪੁੱਤਰ ਦੇ ਦਿਲ ’ਚੋਂ ਕਹੇ ਸੁਗੰਧ ਸਿੱਖੀ ਦੀ ਆ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਪੁੱਤ ਵਾਰਿਆ ਜਿਸ ਲਈ, ਉਹ ਪੁੱਤਰਾਂ ਦਾ ਦਾਨੀ ਏ।
ਜਿਸ ਲਈ ਜ਼ਿੰਦਗੀ ਦੀ ਜੋਤ ਬੁਝੂ, ਉਹ ਜੋਤ ਲਾਸਾਨੀ ਏ।
ਕਹੇ ਦਈਂ ਚਰਨਾਂ ਵਿਚ ਥਾਂ, ਆਤਮਾ ਚਰਨੀਂ ਆ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਨਾਲ ਜੰਬੂਰਾਂ ਨੋਚਿਆ, ਗਰਮ ਸਲਾਖਾਂ ਕੋਹਿਆ ਏ।
ਜ਼ਾਲਮਾਂ ਹੱਦ ਮੁਕਾ ਦਿੱਤੀ ਭੈ ਭੀਤ ਨਾ ਹੋਇਆ ਏ।
ਕਸ਼ਟ ਸਰੀਰ ’ਤੇ ਸਹਿ ਲਏ ਜੀਭਾ ਬਾਣੀ ਗਾ ਰਹੀ ਏ,
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ।
ਬੰਦਾ ਸਿੰਘ ਦਾ ਪਰਵਾਰ, ਕੌਮ ਲਈ ਜਾਨਾਂ ਵਾਰ ਗਿਆ।
“ਰਹੀਮਪੁਰੀ” ਹੋਈ ਜਿੱਤ ਧਰਮ ਦੀ ਜ਼ਾਲਮ ਹਾਰ ਗਿਆ।
ਉਸ ਦੀ ਕੁਰਬਾਨੀ ਅੱਗੇ ਕੌਮ ਪਈ ਸੀਸ ਝੁਕਾ ਰਹੀ ਏ।
ਤਿੰਨ ਸੌ ਸਾਲਾ ਯਾਦ ਸ਼ਹੀਦੀ, ਕੌਮ ਮਨਾ ਰਹੀ ਏ। ਬੰਦਾ ਸਿੰਘ ਬਹਾਦਰ ਯੋਧੇ ਦੇ ਗੁਣ ਗਾ ਰਹੀ ਏ। | 
