ਧੰਨ ਗੁਰੂ ਨਾਨਕ ਧੰਨ ਗੁਰੂ ਨਾਨਕ ਕਹਿੰਦੀ ਸਭ ਲੋਕਾਈ ਏ।
ਗੁਰੂ ਨਾਨਕ ਜੀ ਦੀ ਜੋਤ ਇਲਾਹੀ ਨਨਕਾਣੇ ਵਿਚ ਆਈ ਏ।

ਵੰਡੀ ਤਲ, ਤਲਵੰਡੀ ਵਿਚ ਗੁਰੂ ਨਾਨਕ ਜੀ ਦਾ ਆਣਾ ਹੋਇਆ ਏ।
ਪ੍ਰਕਾਸ਼ ਹੋਇਆ ਜਦ ਸਤਿਗੁਰ ਦਾ ਉਹ ਥਾਂ ਨਨਕਾਣਾ ਹੋਇਆ ਏ।
ਗੁਰੂ ਨਾਨਕ ਜੀ ਦੇ ਪ੍ਰਕਾਸ਼ ਪੁਰਬ ਦੀ ਸਭ ਨੂੰ ਲੱਖ ਵਧਾਈ ਏ।
ਪਿਤਾ ਕਾਲੂ, ਮਾਂ ਤ੍ਰਿਪਤਾ ਦੇ ਘਰ ਜੋਤ ਅਗੰਮੀ ਆਈ ਏ।

ਕਿਰਨ ਆਸ ਦੀ ਬਣਕੇ ਸਭ ਲਈ ਗੁਰੂ ਨਾਨਕ ਜੀ ਆਏ ਨੇ।
ਦੱਬੇ ਕੁਚਲੇ ਬੇਸਹਾਰਾ ਲੋਕੀਂ ਸਭ ਗਲ਼ ਨਾਲ ਲਾਏ ਨੇ।

ਗੁਰੂ ਨਾਨਕ ਨੇ ਏਕੰਕਾਰ (ੴ) ਦਾ ਸਭ ਨੂੰ ਸਬਕ ਪੜ੍ਹਾਇਆ ਏ।
ਅਕਾਲ ਪੁਰਖ ਹੈ ਮਾਲਕ ਸਭ ਦਾ, ਏਕਸ ਦੇ ਲੜ ਲਾਇਆ ਏ।
ਦੁਨੀਆ ਉੱਪਰ ਉੱਚਾ ਸੁੱਚਾ ਦਰ ਏ ਬਾਬੇ ਨਾਨਕ ਦਾ।
ਸਰਬ ਸਾਂਝਾ ਸਭ ਦੁਨੀਆ ਦੇ ਲਈ ਘਰ ਏ ਬਾਬੇ ਨਾਨਕ ਦਾ।

ਰੂਪ ਰੱਬ ਦਾ ਧੰਨ ਗੁਰੂ ਨਾਨਕ ਨਨਕਾਣੇ ਵਿਚ ਆਏ ਨੇ।
ਗੁਰਮਤਿ ਰੂਪੀ ਇਨਕਲਾਬ ਦੇ ਸਭ ਨੂੰ ਰਾਹ ਦਰਸਾਏ ਨੇ।

ਹੱਕ ਸੱਚ ਤੇ ਧਰਮ ਦਾ ਰਾਹ ਗੁਰੂ ਨਾਨਕ ਜੀ ਦਿਖਲਾਇਆ ਏ।
ਗੁਰਮਤਿ ਦੇ ਚੱਲੋ ਪਾਂਧੀ ਬਣੀਏ ਸ਼ਬਦ ਗੁਰੂ ਲੜ ਲਾਇਆ ਏ।
ਪ੍ਰਕਾਸ਼ ਦਿਹਾੜਾ ਸਾਢੇ ਪੰਜ ਸੌ ਸਾਲਾ ਇੰਝ ਮਨਾਉਣਾ ਏ।
ਸੰਦੇਸ਼ ਸ੍ਰੀ ਗੁਰੂ ਨਾਨਕ ਜੀ ਦਾ ਘਰ ਘਰ ਵਿਚ ਪਹੁੰਚਾਉਣਾ ਏ।

ਪ੍ਰਕਾਸ਼ ਪੁਰਬ ਗੁਰੂ ਨਾਨਕ ਜੀ ਦਾ ਰਲ ਮਿਲ ਸਭ ਮਨਾ ਲਈਏ।
ਦੁਨੀਆ ਦੇ ਹਰ ਕੋਨੇ ਵਿਚ ਸਿੱਖੀ ਦੀ ਗੱਲ ਚਲਾ ਲਈਏ।

ਅਕਲਾਂ ਤੇ ਕਲਮਾਂ ਵਾਲਿਓ ਇੰਝ ਪ੍ਰਕਾਸ਼ ਦਾ ਪੁਰਬ ਮਨਾ ਲਈਏ।
ਗੁਰੂ ਨਾਨਕ ਨਾਮ ਲੇਵਾ ਸਭ ਹੋਵਣ ਐਸੀ ਜੁਗਤ ਬਣਾ ਲਈਏ।
ਸਾਢੇ ਪੰਜ ਸੌ ਸਾਲਾ ਪ੍ਰਕਾਸ਼ ਦਿਹਾੜਾ ਉੱਨ੍ਹੀ ਵਿਚ ਮਨਾਉਣਾ ਏ।
ਗੁਰੂ ਨਾਨਕ ਦੀ ਸਿੱਖੀ ਤਾਈਂ ਦੁਨੀਆ ਵਿੱਚ ਪਹੁੰਚਾਉਣਾ ਏ।

‘ਰਹੀਮਪੁਰੀ’ ਮਿਲ ਸੰਗਤ ਸਾਰੀ ਧੰਨ ਗੁਰੂ ਨਾਨਕ ਗਾ ਰਹੀ ਏ।
ਸਾਢੇ ਪੰਜ ਸੌ ਸਾਲਾ ਪ੍ਰਕਾਸ਼ ਦਿਹਾੜਾ ਸ਼ਰਧਾ ਨਾਲ ਮਨਾ ਰਹੀ ਏ।