ਸ੍ਰੀ ਅਨੰਦਪੁਰ ਸਾਹਿਬ ਨੂੰ, ਗੁਰਾਂ ਨੇ ਆਪ ਵਸਾਇਆ ਏ,
ਮਾਖੋਵਾਲ ਦੀ ਧਰਤੀ ਨੂੰ, ਹੱਥੀਂ ਭਾਗ ਲਗਾਇਆ ਏ।
ਸਾਢੇ ਤਿੰਨ ਸੌ ਸਾਲਾ ਸਥਾਪਨਾ ਦਿਵਸ ਮਨਾਉਣਾ ਏ,
ਅਨੰਦਪੁਰ ਦੇ ਵਾਸੀ ਬਣ ਕੇ, ਆਪਣਾ ਫਰਜ਼ ਨਿਭਾਉਣਾ ਏ।

ਕਲਗੀਆਂ ਵਾਲੇ ਪਿਤਾ ਅਸਾਡੇ, ਸਹਿਬ ਕੌਰ ਜੀ ਮਾਤਾ ਏ,
ਸਾਡਾ ਹੈ ਪਰਵਾਰ ਖਾਲਸਾ, ਸ਼ਬਦ ਗੁਰੂ ਹੀ ਦਾਤਾ ਏ।
ਸਾਹਿਬਜ਼ਾਦੇ ਨੇ ਵੀਰ ਅਸਾਂ ਦੇ, ਅਸੀਂ ਗੁਰਾਂ ਦੇ ਲਾਲ ਹਾਂ,
ਗੁਰਾਂ ਦੇ ਦਰ ’ਤੇ ਪ੍ਰਣ ਕਰੋ, ਸਭ ਅਸੀਂ ਪੰਥ ਦੇ ਨਾਲ ਹਾਂ।
ਪਾਹੁਲ ਖੰਡੇ ਦੀ ਲੈ ਕੇ, ਜੀਵਨ ਸਫ਼ਲ ਬਣਾਉਣਾ ਏ।

ਨਿਵੇਕਲਾ ਸਾਡਾ ਬਾਣਾ ਜਗ ’ਤੇ, ਗਹਿਣੇ ਪੰਜ ਕਕਾਰ ਨੇ,
ਜਗ ’ਤੇ ਮਾਣ ਵਧਾਇਆ ਗੁਰਾਂ ਦੀ, ਬਖਸ਼ੀ ਇਸ ਦਸਤਾਰ ਨੇ।
‘ਸਾਬਤ ਸੂਰਤ ਦਸਤਾਰ ਸਿਰਾ’, ਗੁਰਬਾਣੀ ਦਾ ਫੁਰਮਾਣ ਹੈ,
ਸਿੱਖੀ ਸਰੂਪ ਸੰਭਾਲ ਕੇ ਆਖੋ, ਸਿੱਖ ਹੋਣ ’ਤੇ ਮਾਣ ਹੈ।
ਸਭ ਮਾਣ ਕਰਨ ਇਤਿਹਾਸ ’ਤੇ, ਇੰਝ ਕਿਰਦਾਰ ਬਣਾਉਣਾ ਏ।

ਸਿੱਖੀ ਸਰੂਪ ਏ ਅਸਲੀ ਰੂਪ, ਇਹ ਇਕ ਅਟੱਲ ਸੱਚਾਈ ਹੈ,
ਸਾਬਤ ਸੂਰਤ ਚਿਹਰੇ ਉੱਤੇ, ਦਿੱਸਦੀ ਸਾਫ ਖੁਦਾਈ ਹੈ।
ਸਿੱਖੀ ਸਰੂਪ ਹੈ ਅਸਲੀ ਰੂਪ, ਅਸਲ ਰੂਪ ਇਨਸਾਨ ਦਾ,
ਆਪਾਂ ਕਦੇ ਨਹੀਂ ਭਾਗੀ ਬਣਨਾ, ਸਿੱਖੀ ਦੇ ਨੁਕਸਾਨ ਦਾ।
ਪਤਿਤਪੁਣੇ ਦੀ ਮਾਰ ਪਈ ਜੋ, ਉਸ ਨੂੰ ਮਾਰ ਮਕਾਉਣ ਏ।

ਕੇਸਗੜ੍ਹ ਦਾ ਹੈ ਇਹੋ ਸੁਨੇਹਾ, ਸਭ ਕੇਸਾਂ ਦੀ ਸੰਭਾਲ ਕਰੋ,
ਸਿੱਖੀ ਸਰੂਪ ਮੇਰਾ ਅਸਲੀ ਰੂਪ, ਪ੍ਰਚਾਰ ਇਹੋ ਹਰ ਹਾਲ ਕਰੋ।
ਕੇਸ ਗੁਰੂ ਦੀ ਮੋਹਰ ਹੈ ਸਿੱਖੋ, ਸਿੱਖ ਹੋਣ ਤੇ ਮਾਣ ਕਰੋ,
ਸਿੱਖੀ ਸਰੂਪ ਮੇਰਾ ਅਸਲ ਰੂਪ, ਇਹ ਹਰ ਥਾਂ ’ਤੇ ਗੁਣਗਾਣ ਕਰੋ।
ਰਹੀਮਪੁਰੀ ਵਿਚ ਦੁਨੀਆ, ਇਹ ਸੰਦੇਸ਼ ਪਹੁੰਚਾਉਣਾ ਏ।