ਅਜੋਕਾ ਸਿੱਖ ਜਗਤ, ਸਿੱਖ ਨੌਜਵਾਨ ਪੀੜ੍ਹੀ ਭਿਆਨਕ ਦੌਰ ਵਿੱਚੋਂ ਗੁਜ਼ਰ ਰਹੀ ਹੈ। ਇਸ ਵਕਤ ਨੌਜਵਾਨ ਪਤਿਤਪੁਣਾ ਤੇ ਨਸ਼ੇ ਪਿੱਛੇ ਲੱਗ ਕੇ ਆਪਣੇ ਗੌਰਵਮਈ ਵਿਰਸੇ ਪ੍ਰਤੀ ਅਵੇਸਲਾ ਹੋਇਆ ਪਿਆ। ਵਰਤਮਾਨ ਵਿਚ ਨੌਜਵਾਨ ਪੀੜ੍ਹੀ ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਰਹਿਨੁਮਾਈ ਦੀ ਸਖ਼ਤ ਜ਼ਰੂਰਤ ਹੈ।

ਸਾਡਾ ਅਟੱਲ ਵਿਸ਼ਵਾਸ ਹੈ ਕਿ ਜੇਕਰ ਅਸੀਂ ਆਪਣੇ ਵਿਰਸੇ ਨੂੰ ਤੇ ਆਪਣੀ ਹੋਂਦ ਨੂੰ ਬਚਾਉਣਾ ਹੈ ਤਾਂ ਸਾਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਅੱਗੇ ਸਮਰਪਿਤ ਹੋ ਕੇ ਪ੍ਰਣ ਕਰਨਾ ਪਵੇਗਾ ਕਿ ਅਸੀਂ ਸਮਾਜਿਕ ਬੁਰਾਈਆਂ ਦਾ ਡਟ ਕੇ ਮੁਕਾਬਲਾ ਕਰਨਾ ਹੈ। ਇਤਿਹਾਸ ਗਵਾਹ ਹੈ ਕਿ ਅੱਜ ਤਕ ਜੋ ਵੀ ਲਹਿਰ ਇਸ ਪਵਿੱਤਰ ਅਸਥਾਨ ਸ਼ੁਰੂ ਹੋਈ ਹੈ, ਉਹ ਜ਼ਰੂਰ ਸਫਲ ਹੋਈ ਹੈ। ਤੋਂ

ਸਾਰੀ ਦੁਨੀਆ ਵਿੱਚੋਂ ਇਹੋ ਹੀ ਇੱਕੋ-ਇਕ ਐਸਾ ਅਸਥਾਨ ਹੈ ਜੋ ਆਪਣੇ ਲਈ ਨਹੀਂ, ਸਗੋਂ ਹੋਰਾਂ ਦੇ ਦੁੱਖਾਂ, ਤਕਲੀਫਾਂ, ਧਰਮਾਂ ਪ੍ਰਤੀ ਹੁੰਦੇ ਹਮਲਿਆਂ ਜ਼ਬਰਜ਼ੁਲਮ ਦੇ ਖ਼ਿਲਾਫ਼ ਲੜਦਾ ਰਿਹਾ ਤੇ ਅੱਗੋਂ ਵੀ ਲੜਦਾ ਰਹੇਗਾ, ਕਿਉਂਕਿ ਇਸ ਅਸਥਾਨ ਦੀ ਸਿਰਜਣਾ ਦਾ ਮੂਲ-ਸਿਧਾਂਤ ਹੀ ਹੱਕ-ਸੱਚ-ਨਿਆਂ ਲਈ ਜੰਗ ਹੈ। ਪੰਚਮ ਪਾਤਸ਼ਾਹ ਸ੍ਰੀ ਗੁਰੂ ਅਰਜਨ ਦੇਵ ਜੀ ਦੀ ਸੱਚ, ਨਿਆਂ ਲਈ ਹੋਈ ਸ਼ਾਂਤਮਈ ਸ਼ਹਾਦਤ ਨੇ ਪੰਜਾਬ ਵਿਚ ਹੀ ਨਹੀਂ ਬਲਕਿ ਪੂਰੇ ਹਿੰਦੁਸਤਾਨ ਵਿਚ ਇਕ ਰੋਸਮਈ ਲਹਿਰ ਪੈਦਾ ਕਰ ਦਿੱਤੀ ਸੀ। ਉਸ ਵਕਤ ਉਹ ਨੌਜਵਾਨ ਜਿਨ੍ਹਾਂ ਨੇ ਇਸ ਸ਼ਹਾਦਤ ਦੇ ਸੰਦਰਭ ਵਿਚ ਵਿਚਾਰਿਆ ਤੇ ਉਨ੍ਹਾਂ ਅੰਦਰ ਇਨਕਲਾਬੀ ਲਹਿਰ ਠਾਠਾਂ ਮਾਰਨ ਲੱਗੀ। ਹਿੰਦੁਸਤਾਨ ਵਿਚ ਇਹ ਚਰਚਾ ਛਿੜ ਪਈ ਕਿ ਜੇ ਐਸੇ ਮਹਾਂਪੁਰਸ਼ ਜੋ ਸਿਰਫ਼ ਮਨੁੱਖਤਾ ਪ੍ਰਤੀ ਸਮਰਪਿਤ ਸਨ, ਉਨ੍ਹਾਂ ਨੂੰ ਅਤਿਅੰਤ ਤਸੀਹੇ ਦੇ ਕੇ ਸ਼ਹੀਦ ਕਰ ਦਿੱਤਾ ਹੈ ਤਾਂ ਹੁਣ ਨੇਕ ਪੁਰਸ਼ਾਂ, ਸੰਤਾਂ, ਮਹਾਤਮਾਂ, ਸੂਫੀ ਫਕੀਰਾਂ ਤੇ ਆਮ ਲੋਕਾਈ ਮਜ਼ਲੂਮਾਂ ਦਾ ਕੌਣ ਰਾਖਾ ਹੈ? ਸਾਰੇ ਹਿੰਦੁਸਤਾਨ ਵਿਚ ਐਸੇ ਨੌਜਵਾਨਾਂ ਦਾ ਸਰਕਾਰ ਪਾਸੋਂ ਗੁਰੂ ਸਾਹਿਬ ਦੀ ਸ਼ਹਾਦਤ ਦਾ ਬਦਲਾ ਲੈਣ ਲਈ ਰੋਹ ਜਾਗ ਰਿਹਾ ਸੀ। ਉਧਰ ਦੂਜੇ ਪਾਸੇ ਛੇਵੇਂ ਪਾਤਸ਼ਾਹ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਨੇ ਸੱਚ ਤੇ ਸ਼ਾਂਤੀ ’ਤੇ ਹੋਏ ਜ਼ੁਲਮ ਦੇ ਖ਼ਿਲਾਫ਼ ਕਿਰਪਾਨ ਚੁੱਕ ਲਈ।

ਉਦੋਂ ਗੁਰੂ ਜੀ ਨੇ ਸਿੱਖ-ਜਗਤ ਹੀ ਨਹੀਂ ਸਗੋਂ ਹਿੰਦੁਸਤਾਨ ਦੀ ਸਾਰੀ ਜਨਤਾ ਨੂੰ ਲਲਕਾਰ ਪਾਈ ਕਿ ਆਓ! ਜਿਨ੍ਹਾਂ ਨੇ ਸੱਚ, ਹੱਕ, ਅਨਿਆਂ ਦੇ ਖ਼ਿਲਾਫ਼ ਜੰਗ ਲੜਨੀ ਹੈ ਸਿਰ ਤਲੀ ’ਤੇ ਧਰ ਕੇ ਆਵੋ। ਉਸ ਵਕਤ ਮੀਰੀ-ਪੀਰੀ ਦੇ ਮਾਲਕ ਨੇ ਇਹ ਵਿਚਾਰ ਪ੍ਰਮੁੱਖ ਸਿੱਖਾਂ- ਬਾਬਾ ਬੁੱਢਾ ਜੀ, ਭਾਈ ਗੁਰਦਾਸ ਜੀ ਆਦਿ ਹੋਰ ਵੀ ਸਿੱਖਾਂ ਨਾਲ ਸਾਂਝੀ ਕੀਤੀ ਕਿ ਜ਼ਾਲਮ ਤੇ ਝੂਠੇ ਤਖ਼ਤ ਨਾਲ ਸੱਚ ਅਤੇ ਤਖ਼ਤ ਤੋਂ ਬਗੈਰ ਨਹੀਂ ਲੜਿਆ ਜਾ ਸਕਦਾ। ਗੁਰੂ ਸਾਹਿਬ ਜੀ ਨੇ ਫੁਰਮਾਇਆ ਅਸੀਂ ਐਸਾ ਸੱਚ ਦਾ ਤਖ਼ਤ ਸਿਰਜਾਂਗੇ ਜਿਸ ਦੇ ਅੱਗੇ ਜ਼ਾਲਮ ਦੇ ਝੂਠੇ ਅਨਿਆਂਕਾਰੀ ਤਖ਼ਤ ਝੁਕ ਜਾਣਗੇ।

ਸਭ ਪ੍ਰਮੁੱਖ ਸਿੱਖਾਂ ਦੀ ਸਹਿਮਤੀ ਨਾਲ ਸਤਿਗੁਰੂ ਜੀ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ (ਅਕਾਲ ਬੁੰਗਾ) ਨੂੰ ਸਿਰਜਣ ਲਈ ਦਿਨ ਨਿਯਤ ਕੀਤਾ। ਅਕਾਲ ਤਖ਼ਤ ਸਾਹਿਬ ਦਾ ਥੜ੍ਹਾ ਬਣਾਉਣ ਲਈ ਸਿਰਫ ਪ੍ਰਮੁੱਖ ਸਿੱਖਾਂ ਨੇ ਹੀ ਹਿੱਸਾ ਪਾਇਆ। ਬਾਬਾ ਬੁੱਢਾ ਜੀ, ਭਾਈ ਗੁਰਦਾਸ ਜੀ ਤੇ ਖ਼ੁਦ ਛੇਵੇਂ ਪਾਤਸ਼ਾਹ ਨੇ ਹੱਥੀਂ ਸੇਵਾ ਕਰ ਕੇ ਇਹ घ ਤਿਆਰ ਕੀਤਾ। ਸੱਚੇ ਪਾਤਸ਼ਾਹ ਨੇ ਕਲਗੀ ਸਜਾ ਕੇ, ਮੀਰੀ ਤੇ ਪੀਰੀ ਦੇ ਖੜਗ ਪਹਿਨ ਇਸ ਤਿਆਰ ਕੀਤੇ ਸ੍ਰੀ ਅਕਾਲ ਤਖਤ ਸਾਹਿਬ 'ਤੇ ਦੀਵਾਨ ਸਜਾਇਆ। ਢਾਡੀਆਂ ਨੇ ਪਾਤਸ਼ਾਹ ਦੀ ਉਸਤਤਿ ਗਾਈ ਅਤੇ ਵਾਰਾਂ ਰਾਹੀਂ ਇਹ ਦਰਸਾਇਆ ਕਿ ਇਸ ਸੱਚੇ ਤਖ਼ਤ ਦੇ ਮੁਕਾਬਲੇ ਦੁਨਿਆਵੀ ਤਖ਼ਤ ਸਭ ਝੂਠੇ ਹਨ। ਹੁਣ ਹਿੰਦੁਸਤਾਨ ਨੂੰ ਸੱਚਾ ਪਾਤਸ਼ਾਹ ਮਿਲਿਆ ਹੈ ਜੋ ਹੱਕ, ਸੱਚ ਤੇ ਨਿਆਂ ਦੀ ਪ੍ਰਾਪਤੀ ਲਈ ਲੜੇਗਾ ਤੇ ਜ਼ਾਲਮ ਸਰਕਾਰ ਦਾ ਮੂੰਹ ਭੰਨ ਦੇਵੇਗਾ। ਸੰਤਾਂ ਦਾ ਰਾਖਾ ਤੇ ਜ਼ਾਲਮਾਂ ਨੂੰ ਸੋਧਣ ਵਾਲਾ ਸੱਚਾ ਪਾਤਸ਼ਾਹ ਸ੍ਰੀ ਅਕਾਲ ਤਖ਼ਤ ਸਾਹਿਬ 'ਤੇ ਬਿਰਾਜਮਾਨ ਹੋਇਆ ਹੈ। ਗੁਰੂ ਸਾਹਿਬ ਦੀ ਮਨਸ਼ਾ ਦੇ ਮੁਤਾਬਿਕ ਢਾਡੀਆਂ ਨੇ ਬੀਰ-ਰਸੀ ਵਾਰਾਂ ਗਾਈਆਂ ਤੇ ਗੁਰੂ ਸਾਹਿਬ ਦੇ ਸੰਦੇਸ਼ ਨੂੰ ਹਿੰਦੁਸਤਾਨ ਦੇ ਅਵਾਮ ਲਈ ਪ੍ਰਚਾਰਿਆ ਤੇ ਪ੍ਰਸਾਰਿਆ।

ਪੰਚਮ ਪਾਤਸ਼ਾਹ ਦੀ ਸ਼ਹਾਦਤ ਨੇ ਇਨਕਲਾਬ ਬਖ਼ਸ਼ਿਆ। ਇਸ ਇਨਕਲਾਬ ਨੇ ਕੀ-ਕੀ ਰੰਗ ਲਿਆਂਦੇ ਇਸ ਨਾਲ ਸਾਰਾ ਇਤਿਹਾਸ ਭਰਿਆ ਪਿਆ ਹੈ। ਛੇਵੇਂ ਪਾਤਸ਼ਾਹ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜੋ ਸਿਧਾਂਤ ਉਲੀਕੇ ਅੱਜ ਤਕ ਕੋਈ ਉਨ੍ਹਾਂ ਸਿਧਾਂਤਾਂ ਨੂੰ ਚੁਣੌਤੀ ਨਹੀਂ ਦੇ ਸਕਿਆ। ਇਤਿਹਾਸ ਗਵਾਹ ਹੈ ਕਿ ਅੱਜ ਤਕ ਜਿਸ ਨੇ ਵੀ ਇਸ ਤਖ਼ਤ ਦੇ ਸਾਹਮਣੇ ਧੌਣ ਅਕੜਾਣ ਦੀ ਜੁਰਅਤ ਕੀਤੀ ਉਸ ਦਾ ਹਸ਼ਰ ਬਹੁਤ ਮਾੜਾ ਹੋਇਆ।

ਸਮੇਂ-ਸਮੇਂ ਜ਼ਾਲਮ ਹਕੂਮਤਾਂ ਜ਼ੁਲਮ ਦੀਆਂ ਹਨੇਰੀਆਂ ਚੁੱਕਦੀਆਂ ਰਹੀਆਂ, ਇਨ੍ਹਾਂ ਦਾ ਮੂੰਹ ਮੋੜਿਆ ਤਾਂ ਸਿਰਫ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਸ਼ੁਰੂ ਹੋਈਆਂ ਲਹਿਰਾਂ/ਮੋਰਚਿਆਂ ਨੇ। ਅੱਜ ਭਾਰਤ ਦਾ ਜੋ ਜਾਹ-ਓ-ਜਲਾਲ ਅਸੀਂ ਵੇਖਦੇ ਪਏ ਹਾਂ ਇਹ ਸਿਰਫ਼ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਿਰਜੇ ਮਰਜੀਵੜਿਆਂ ਦੀ ਖ਼ਾਤਰ ਹੀ ਭਾਰਤ ਦੀ ਰਾਖੀ ਤੇ ਇਸ ਦੀ ਆਨ-ਸ਼ਾਨ ਲਈ ਬੇਅੰਤ ਕੁਰਬਾਨੀਆਂ ਦਿੱਤੀਆਂ। ਜਦੋਂ ਜ਼ੁਲਮੀ ਹਨੇਰੀਆਂ ਵਗੀਆਂ ਤਾਂ ਸਾਰੇ ਭਾਰਤ ਨੂੰ ਹਕੂਮਤ ਨੇ ਖਾਮੋਸ਼ ਕਰ ਦਿੱਤਾ। ਸਿਰਫ ਸ੍ਰੀ ਅਕਾਲ ਤਖ਼ਤ ਸਾਹਿਬ ਹੀ ਸੀ ਜਿਸ ਦੀ ਛਤਰ-ਛਾਇਆ ਹੇਠ ਜ਼ੁਲਮ ਦੇ ਖ਼ਿਲਾਫ਼ ਅਵਾਜ਼ ਬੁਲੰਦ ਰਹੀ। ਚਾਹੇ ਬਾਹਰੀ ਹਮਲਾਵਰ ਨਾਦਰਸ਼ਾਹ ਜਾਂ ਅਬਦਾਲੀ ਵਰਗੇ ਜਾਂ ਆਪਣੀਆਂ ਸਰਕਾਰਾਂ, ਕਿਸੇ ਅੱਗੇ ਵੀ ਇਸ ਤਖ਼ਤ ਦੇ ਜਾਏ ਝੁਕੇ ਨਹੀਂ, ਸਗੋਂ ਆਪਣੀ ਈਨ ਮਨਵਾਉਂਦੇ ਰਹੇ।

ਸ੍ਰੀ ਅਕਾਲ ਤਖ਼ਤ ਸਾਹਿਬ ’ਤੇ ‘ਸਰਬੱਤ ਖਾਲਸਾ” ਦੇ ਇਕੱਠ ਹੁੰਦੇ ਤੇ ਸਮੇਂਸਮੇਂ ਆਉਂਦੀਆਂ ਸਮੱਸਿਆਵਾਂ ਦੇ ਪ੍ਰਤੀ ਵਿਚਾਰ ਕਰ ਕੇ ਹੱਲ ਕੱਢੇ ਜਾਂਦੇ। ਇਹ ਸਿਲਸਿਲਾ ਬੀਤੀਆਂ ਸਦੀਆਂ ਤੋਂ ਚੱਲਿਆ ਆ ਰਿਹਾ ਹੈ। ਇਸ ਤਖ਼ਤ ਤੋਂ ਪਿਛਲੀਆਂ ਸਦੀਆਂ ਵਿਚ ਹਥਿਆਰਬੰਦ ਸੰਘਰਸ਼ ਅਰੰਭਿਆ ਤਾਂ ਦੁਨੀਆ ਦੇ ਲੋਕ ਵੇਖ ਕੇ ਹੈਰਾਨ ਹੋ ਗਏ ਕਿ ਐਸੀ ਕੌਮ ਜਿਸ ਦਾ ਜਿਗਰਾ ਇਤਨਾ ਵੱਡਾ ਹੈ। ਅਤਿਅੰਤ ਕਸ਼ਟ ਸਹਿ ਕੇ ਵੀ ਫ਼ਤਹ ਹਾਸਲ ਕੀਤੀ।

ਕੋਈ ਬਹੁਤਾ ਸਮਾਂ ਨਹੀਂ ਹੋਇਆ ਗੁਰਦੁਆਰਾ ਪ੍ਰਬੰਧ ਸੁਧਾਰ ਲਹਿਰ, ਜੈਤੋ ਦਾ ਮੋਰਚਾ, ਗੁਰੂ ਕੇ ਬਾਗ ਦਾ ਮੋਰਚਾ ਆਦਿ ਕਈ ਘਟਨਾਕ੍ਰਮਾਂ ਨੂੰ ਵਾਪਰਿਆਂ ਜਿਨ੍ਹਾਂ ਨੇ ਜ਼ਾਲਮ ਹਕੂਮਤਾਂ ਦੇ ਮੂੰਹ ਮੋੜ ਦਿੱਤੇ। ਇਹ ਸਭ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਰਹਿਨੁਮਾਈ ਲੈ ਕੇ ਮੂਵਮੈਂਟਾਂ ਚੱਲੀਆਂ ਸਨ।

ਇਸ ਅਸਥਾਨ ’ਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਿਧਾਂਤਾਂ ਦੇ ਪਹਿਰੇਦਾਰ ਦੇ ਰੂਪ ਵਿਚ ਐਸੇ-ਐਸੇ ਮਹਾਨ ਸੂਰਬੀਰ ਯੋਧੇ ਆਏ ਜੋ ਆਪਣੀ ਮਿਸਾਲ ਆਪ ਸਨ। ਭਾਈ ਮਨੀ ਸਿੰਘ ਜੀ ਵਰਗੇ ਜਿਨ੍ਹਾਂ ਨੇ ਆਪਣਾ ਬੰਦ-ਬੰਦ ਕਟਵਾ ਲਿਆ ਪਰ ਇਸ ਅਸਥਾਨ ਦੀ ਮਾਣ-ਮਰਿਆਦਾ ਨੂੰ ਆਂਚ ਨਾ ਆਉਣ ਦਿੱਤੀ। ਬਚਨ ਦੇ ਬਲੀ ਤੇ ਮਹਾਨ ਯੋਧੇ ਅਕਾਲੀ ਫੂਲਾ ਸਿੰਘ ਜੀ ਜਿਨ੍ਹਾਂ ਅੱਗੇ ਪੰਜਾਬ ਦੇ ਬਾਦਸ਼ਾਹ ਨੇ ਸਿਰ ਝੁਕਾਇਆ। ਅੱਜ ਤਕ ਕੋਈ ਵੀ ਐਸਾ ਨਾਮ ਸਾਹਮਣੇ ਨਹੀਂ ਆਉਂਦਾ ਸਿੱਖ ਜਗਤ ਵਿੱਚੋਂ ਜਿਸ ਨੇ ਇਸ ਤਖ਼ਤ ਦੀ ਸਰਵ-ਉੱਚਤਾ ਨੂੰ ਨਾ ਮੰਨਿਆ ਹੋਵੇ। ਇਸ ਹੁਕਮ ਅੱਗੇ ਸਭ ਸਿਰ ਝੁਕਾਉਂਦੇ ਹਨ। ਚਾਹੇ ਕੋਈ ਕਿਸੇ ਵੀ ਮਹਾਨ ਪਦਵੀ ’ਤੇ ਕਿਉਂ ਨਾ ਹੋਵੇ।

ਐਸਾ ਸੱਚਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਸਾਡੇ ਕੋਲ ਹੈ। ਪਰੰਤੂ ਅਜੋਕੇ ਸਮੇਂ ਵਿਰੋਧੀ ਸ਼ਕਤੀਆਂ ਇਸ ਦੀ ਮਾਣ-ਮਰਿਆਦਾ ਤੇ ਸਿਧਾਂਤਾਂ ਨੂੰ ਢਾਹ ਲਾਉਣ ਦੀਆਂ ਕੋਸ਼ਿਸ਼ਾਂ ਵਿਚ ਹਨ।

ਸਮੇਂ ਦੀਆਂ ਹਕੂਮਤਾਂ ਨੇ ਜਿਸ ਵਕਤ ਜਾਣ ਲਿਆ ਕਿ ਸਿੱਖਾਂ ਪਾਸ ਸ਼ਕਤੀ ਦਾ ਪ੍ਰਤੀਕ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਇਸ ਦੇ ਸਿਧਾਂਤ ਹਨ, ਉਤਨਾ ਚਿਰ ਤਕ ਸਿੱਖਾਂ ਨੂੰ ਦਬਾਇਆ ਨਹੀਂ ਜਾ ਸਕਦਾ। ਹਰ ਇਕ ਸਿੱਖ ਦੇ ਜਜ਼ਬਾਤ ਇਸ ਨਾਲ ਜੁੜੇ ਹੋਏ ਹਨ। ਐਸੇ ਹਾਲਾਤ ਪੈਦਾ ਕਰ ਦਿੱਤੇ ਗਏ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ’ਤੇ ਹਮਲਾਵਰ ਹੋ ਕੇ ਤਖ਼ਤ ਦੀ ਇਮਾਰਤ ਨੂੰ ਖੰਡਰ ਬਣਾ ਦਿੱਤਾ। ਸਮੇਂ ਨਾਲ ਫਿਰ ਤੋਂ ਨਵੀਂ ਇਮਾਰਤ ਤਖ਼ਤ ਸਾਹਿਬ ਦੀ ਤਿਆਰ ਹੋ ਗਈ। ਤਖ਼ਤ ਸਾਹਿਬ ਦੇ ਸਿਧਾਂਤ ਕਾਇਮ ਸਨ, ਹਰ ਸਿੱਖ ਦੇ ਜਜ਼ਬਾਤ ਇਸ ਨਾਲ ਜੁੜੇ ਹੋਏ ਸਨ, ਹਰ ਸਿੱਖ ਇਸ ਅੱਗੇ ਸਮਰਪਿਤ ਸੀ। ਪਰੰਤੂ ਸਰਕਾਰਾਂ ਨੇ ਉਸ ਵਕਤ ਜਾਣਿਆ ਕਿ ਤਖ਼ਤ ਸਾਹਿਬ ਨੂੰ ਖੰਡਰ ਬਣਾ ਕੇ ਨਹੀਂ ਬਲਕਿ ਇਸ ਦੇ ਸਿਧਾਂਤ ਤੋੜ ਕੇ ਸਿੱਖਾਂ ਨੂੰ ਹਾਨੀ ਪਹੁੰਚਾਈ ਜਾਵੇ, ਜਿਸ ਨਾਲ ਇਹ ਆਪੇ ਹੀ ਸ਼ਕਤਹੀਣ ਹੋ ਜਾਣਗੇ।

ਸੋ, ਆਓ! ਮੀਰੀ-ਪੀਰੀ ਦੇ ਪਾਤਸ਼ਾਹ ਦੇ ਸਿਰਜੇ ਸੱਚੇ ਤਖ਼ਤ ਅੱਗੇ ਸਮੁੱਚੀ ਕੌਮ ਸਮਰਪਿਤ ਹੋ ਕੇ ਪ੍ਰਣ ਕਰੇ ਕਿ ਅਸਾਂ ਨੇ ਸਮਾਜਿਕ ਬੁਰਾਈਆਂ ਖਿਲਾਫ਼ ਲੜਨਾ ਹੈ। ਜਿੰਨਾ ਖ਼ਤਰਾ ਅੱਜ ਕੌਮ ਨੂੰ ਪੈਦਾ ਹੋ ਗਿਆ ਹੈ ਇੰਨਾ ਪਹਿਲੇ ਭਾਰੀ ਔਖਿਆਂ ਸਮਿਆਂ ਵਿਚ ਵੀ ਨਹੀਂ ਸੀ ਹੋਇਆ। ਕੌਮ ਦੀ ਨੌਜਵਾਨ ਪੀੜ੍ਹੀ ਪਤਿਤਪੁਣੇ ਤੇ ਨਸ਼ਿਆਂ ਵਿਚ ਰੁੜ੍ਹੀ ਜਾ ਰਹੀ ਹੈ।ਜੇਕਰ ਹੁਣ ਵੀ ਕੌਮ ਨਾ ਜਾਗੀ ਤਾਂ ਆਉਂਦੇ ਕੁਝ ਸਾਲਾਂ ਤਕ ਵਜੂਦ ਨੂੰ ਭਾਰੀ ਸੰਕਟ ਆ ਪਵੇਗਾ। ਆਪਣਾ ਆਪ ਸੰਭਾਲਣਾ ਮੁਸ਼ਕਲ ਹੋ ਜਾਵੇਗਾ। ਅੱਗੋਂ ਆਉਣ ਵਾਲੀ ਪੀੜ੍ਹੀ ਦੇ ਅਸੀਂ ਜਵਾਬਦੇਹ ਹੋਵਾਂਗੇ। ਸਾਡੀ ਹੁਣ ਦੀ ਕੀਤੀ ਹੋਈ ਗ਼ਲਤੀ ਬੜਾ ਭਿਆਨਕ ਰੂਪ ਅਖਤਿਆਰ ਕਰੇਗੀ। ਆਪਣੇ ਫ਼ਰਜ਼ ਨੂੰ ਪਹਿਚਾਣੋ! ਗੁਰੂ ਦਸਮ ਪਾਤਸ਼ਾਹ ਨੇ ਤਾਂ ਖਾਸ ਕਰਕੇ ਖਾਲਸਾ-ਪੰਥ ਨੂੰ ਜ਼ਿੰਮੇਵਾਰੀ ਸੌਂਪੀ ਹੋਈ ਹੈ ਕਿ ਸੰਸਾਰ ਵਿੱਚੋਂ ਸਮਾਜਿਕ ਬੁਰਾਈਆਂ ਖ਼ਤਮ ਕਰਕੇ ਨਿਰੋਲ ਖਾਲਸਾ ਰਾਜ ਕਾਇਮ ਕਰਨਾ ਹੈ। ਫੁਰਮਾਨ ਹੈ:

ਸਕਲ ਜਗਤ ਮੋ ਖਾਲਸਾ ਪੰਥ ਗਾਜੈ।
ਜਗੈ ਧਰਮ ਹਿੰਦੂਨ ਸਕਲ ਦੁੰਦ ਭਾਜੈ॥
ਨ ਛਾਡਉ ਕਹੂੰ ਦੁਸ਼ਟ ਅਸੁਰਨ ਨਿਸ਼ਾਨੀ।
ਚਲੇ ਸਭ ਜਗਤ ਮਾਹਿ ਧਰਮ ਕੀ ਕਹਾਨੀ॥ (ਉਗ੍ਰਦੰਤੀ)

ਖਾਲਸੇ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਅਗਵਾਈ ਲੈ ਕੇ ਜ਼ਾਲਮਾਂ ਨੂੰ ਸੋਧ ਕੇ ਧਰਮ ਦਾ ਰਾਜ ਕਾਇਮ ਕਰਨਾ ਹੈ। ਸਮਾਜਿਕ ਬੁਰਾਈਆਂ ਨੂੰ ਜੜ੍ਹੋਂ ਪੁੱਟ ਦੇਣਾ ਹੈ। ਦੁਨੀਆ ਵਿਚ ਉਤਨਾ ਚਿਰ ਤਕ ਅਮਨ ਦੀ ਸਥਾਪਨਾ ਨਹੀਂ ਹੋ ਸਕਦੀ ਜਿੰਨਾ ਚਿਰ ਤਕ ਖਾਲਸਾ ਪੰਥ ਆਪਣਾ ਫ਼ਰਜ਼ ਪਹਿਚਾਣਦੇ ਹੋਏ ਸ੍ਰੀ ਅਕਾਲ ਤਖ਼ਤ ਸਾਹਿਬ ਅੱਗੇ ਸਮਰਪਿਤ ਹੋ ਕੇ ਪ੍ਰਣ ਨਹੀਂ ਕਰਦਾ। ਜੇਕਰ ਦੁਨੀਆ ਨੂੰ ਭਿਆਨਕ ਆਉਣ ਵਾਲੀਆਂ ਤਬਾਹੀਆਂ ਤੋਂ ਕੋਈ ਬਚਾ ਸਕਦਾ ਹੈ ਤਾਂ ਉਹ ਕੇਵਲ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਖਾਲਸਾ ਪੰਥ ਹੈ।