ਜ਼ਾਲਮਾਂ ਨੂੰ ਮਾਰਨਾ ਸਿਖਾਇਆ ਬਾਜਾਂ ਵਾਲੇ ਨੇ,
ਡੁੱਬ ਰਹੀ ਖਲਕਤ ਨੂੰ ਬਚਾਇਆ ਬਾਜਾਂ ਵਾਲੇ ਨੇ,
ਤੇਗ ਵਿੱਚੋਂ ਖਾਲਸਾ ਸਜਾਇਆ ਬਾਜਾਂ ਵਾਲੇ ਨੇ,
ਹੋਲੀਆਂ ਤੋਂ ਹੋਲੇ ਨੂੰ ਬਣਾਇਆ ਬਾਜਾਂ ਵਾਲੇ ਨੇ। ਬੜਾ ਚੰਗਾ ਮੰਨਦੇ ਹੋਲੀ ਦਾ ਦਿਹਾੜਾ ਏ,
ਇਸ ਨੂੰ ਮਨਾਉਣ ਦਾ ਤਰੀਕਾ ਬੜਾ ਮਾੜਾ ਹੈ,
ਇਕ ਦੂਜੇ ਉੱਤੇ ਗੋਹਾ ਮਿੱਟੀ ਪਾਉਂਦੇ ਨੇ,
ਇਹ ਕਾਹਦੀ ਖੁਸ਼ੀ ਲੋਕੀਂ ਜੋ ਮਨਾਉਂਦੇ ਨੇ,
ਭੈੜੇ ਭੈੜੇ ਕੰਮਾਂ ਤੋਂ ਹਟਾਇਆ ਬਾਜਾਂ ਵਾਲੇ ਨੇ,
ਹੋਲੀਆਂ ਤੋਂ ਹੋਲੇ ਨੂੰ ਬਣਾਇਆ ਬਾਜਾਂ ਵਾਲੇ ਨੇ। ਫੱਗਣ ਮਹੀਨੇ ਵਾਲੀ ਰੁੱਤ ਜਦੋਂ ਆਈ ਸੀ,
ਦਸਵੇਂ ਗੁਰਾਂ ਮਰਿਆਦਾ ਨਵੀਂ ਹੀ ਚਲਾਈ ਸੀ,
ਕਿਸੇ ਉੱਤੇ ਗੰਦ ਨਹੀਂ ਪਾਊ ਮੇਰਾ ਖਾਲਸਾ,
ਹਥਿਆਰਾਂ ਨਾਲ ਹੋਲੇ ਨੂੰ ਮਨਾਊ ਮੇਰਾ ਖਾਲਸਾ,
ਕਰਤੇ ਦੇ ਲੜ ਸਾਨੂੰ ਲਾਇਆ ਬਾਜਾਂ ਵਾਲੇ ਨੇ,
ਹੋਲੀਆਂ ਤੋਂ ਹੋਲੇ ਨੂੰ ਬਣਾਇਆ ਬਾਜਾਂ ਵਾਲੇ ਨੇ। ਖਾਲਸੇ ਦੇ ਦੋ ਥਾਈਂ ਜਥੇ ਜੋ ਬਣਾਏ ਸੀ,
ਹੱਥਾਂ ਵਿਚ ਗੁਰੂ ਜੀ ਹਥਿਆਰ ਵੀ ਫੜਾਏ ਸੀ,
ਹੋਲਗੜ੍ਹ ਕਿਲ੍ਹੇ ਉੱਤੇ ਹੱਲਾ ਤੁਸੀਂ ਬੋਲਣਾ,
ਤੀਰਾਂ ਤੇ ਬੰਦੂਕਾਂ ਵਾਲਾ ਮੂੰਹ ਨਹੀਂਓ ਖੋਲ੍ਹਣਾ,
ਮਨਸੂਈ ਜੰਗ ਨੂੰ ਲੜਾਇਆ ਬਾਜਾਂ ਵਾਲੇ ਨੇ,
ਹੋਲੀਆਂ ਤੋਂ ਹੋਲੇ ਨੂੰ ਬਣਾਇਆ ਬਾਜਾਂ ਵਾਲੇ ਨੇ। ਜਿੱਤ ਗਿਆ ਖਾਲਸਾ ਕੀਤਾ ਸਨਮਾਨ ਸੀ,
ਖਾਲਸਾ ਤਾਂ ਗੁਰੂ ਵਾਲੀ ਜਿੰਦ ਅਤੇ ਜਾਨ ਸੀ,
ਆਸਾ ਜੀ ਦੀ ਵਾਰ ਵਾਲਾ ਭੋਗ ਜਦੋਂ ਪਾਉਂਦੇ ਸੀ,
ਕਵੀਆਂ ਦਾ ਖਾਸ ਕਰ ਦਰਬਾਰ ਉਦੋਂ ਲਾਉਂਦੇ ਸੀ,
‘ਜਸਵੰਤ ਸਿੰਘ’ ਰੁਤਬਾ ਵਧਾਇਆ ਬਾਜਾਂ ਵਾਲੇ ਨੇ,
ਹੋਲੀਆਂ ਤੋਂ ਹੋਲੇ ਨੂੰ ਬਣਾਇਆ ਬਾਜਾਂ ਵਾਲੇ ਨੇ। |
