ਪਾਣੀ ਜੋ ਮਹਾਨ ਹੈ, ਸਾਡੀ ਜਿੰਦ ਜਾਨ ਹੈ।
ਰੱਬ ਨੇ ਹੈ ਤੋਹਫਾ ਦਿੱਤਾ, ਸੋਹਣਾ ਵਰਦਾਨ ਹੈ।

ਬਾਣੀ ਵਿਚ ਗੁਰੂ ਵੇਖੋ ਪਿਤਾ ਏਹਨੂੰ ਕਹਿੰਦੇ ਨੇ।
ਜੀਅ-ਜੰਤ ਰੁੱਖ ਏਹਦੇ, ਆਸਰੇ ਹੀ ਰਹਿੰਦੇ ਨੇ।
ਇਹੋ ਸਾਰੇ ਆਖਦੇ ਨੇ, ਜਲ ਭਗਵਾਨ ਹੈ।
ਪਾਣੀ ਜੋ ਮਹਾਨ ਹੈ . . . . .

ਫ਼ਸਲਾਂ ਤੇ ਘਰ ਵਿਚ ਹਰ ਸਮੇਂ ਲੋੜ ਹੈ।
ਅੱਜਕਲ੍ਹ ਪਾਣੀ ਵਾਲੀ ਹੁੰਦੀ ਜਾਂਦੀ ਥੋੜ ਹੈ।
ਸਾਡੀ ਅਣਗਿਹਲੀ ਕਰੂ ਸਾਡਾ ਨੁਕਸਾਨ ਹੈ।
ਪਾਣੀ ਜੋ ਮਹਾਨ ਹੈ . . . . .

ਸੋਚਦਾ ਨਾ ਕੋਈ ਕਰਦਾ ਕੀ ਬੰਦਾ ਹੈ?
ਦਿਨੋਂ ਦਿਨ ਪਾਣੀ ਤਾਈਂ ਕਰੀ ਜਾਵੇ ਗੰਦਾ ਹੈ।
ਪੜ੍ਹ ਲਿਖ ਦੋਸ਼ ਕਰੇ ਕਾਹਦਾ ਇਹ ਗਿਆਨ ਹੈ।
ਪਾਣੀ ਜੋ ਮਹਾਨ ਹੈ . . . . .

ਹੌਲੀ-ਹੌਲੀ ਧਰਤੀ ਦੀ ਸੁੱਕ ਜਾਣੀ ਕੁੱਖ ਹੈ।
ਆਉਣ ਵਾਲੀ ਪੀੜ੍ਹੀ ਲਈ ਇਹੋ ਵੱਡਾ ਦੁੱਖ ਹੈ।
ਇਸ ਪਾਸੇ ਲਾਈਏ ਆਪਾਂ ਸਾਰਾ ਹੀ ਧਿਆਨ ਹੈ।
ਪਾਣੀ ਜੋ ਮਹਾਨ ਹੈ . . . . .

ਕਰਦੇ ਸੰਭਾਲ ਤੇ ਪਾਣੀ ਜੋ ਬਚਾਉਂਦੇ ਨੇ।
ਇਹੋ ਜਿਹੇ ਬੰਦੇ ਰੱਬ ਰੂਪ ਅਖਵਾਉਂਦੇ ਨੇ।
ਜਾਵੇ ‘ਜਸਵੰਤ ਸਿੰਘ’ ਸਦਾ ਏਦਾਂ ਕੁਰਬਾਨ ਹੈ।
ਪਾਣੀ ਜੋ ਮਹਾਨ ਹੈ . . . . .