ਆ ਨੀ ਵੈਸਾਖੀਏ, ਆ ਨੀ ਵੈਸਾਖੀਏ,
ਗੁਰੂ ਵਾਲੇ ਸਾਨੂੰ ਵੀ ਬਣਾ ਨੀ ਵੈਸਾਖੀਏ!

ਭੁੱਲੀ ਜਾਈਏ ਗੁਰੂ ਤਾਂਈਂ ਅਸੀਂ ਹੁਣ ਸਾਰੇ ਨੀ।
ਕਿੱਦਾਂ ਸੀਸ ਮੰਗੇ, ਕਿੱਦਾਂ ਸਾਜੇ ਸੀ ਪਿਆਰੇ ਨੀ,
ਉਦੋਂ ਵਾਲੀ ਗੱਲ ਤੂੰ ਸੁਣਾ ਨੀ ਵੈਸਾਖੀਏ!
ਆ ਨੀ ਵੈਸਾਖੀਏ.. ... ...

ਕੱਟ ਲਏ ਕੇਸ ਅਤੇ ਕੱਟ ਲਈਆਂ ਦਾਹੜੀਆਂ।
ਗੁਰੂ ਦੀਆਂ ਬੀਜੀਆਂ ਫਸਲਾਂ ਉਜਾੜੀਆਂ।
ਵਾੜ ਲਾ ਕੇ ਫਸਲਾਂ ਬਚਾ ਨੀ ਵੈਸਾਖੀਏ!
ਆ ਨੀ ਵੈਸਾਖੀਏ.. ... ...

ਮਾਰ ਲਿਆ ਇਕ ਸਾਨੂੰ ਚੌਧਰਾਂ ਦੀ ਭੁੱਖ ਨੇ।
ਕਿਹੜੇ ਮੈਂ ਸੁਣਾਵਾਂ ਸਾਨੂੰ ਕਿੰਨੇ ਲੱਗੇ ਦੁੱਖ ਨੇ?
ਦੁੱਖਾਂ ਵੱਲੋਂ ਖਹਿੜਾ ਤੂੰ ਛੁਡਾ ਨੀ ਵੈਸਾਖੀਏ!
ਆ ਨੀ ਵੈਸਾਖੀਏ.. ... ...

ਕਰੇ ‘ਜਸਵੰਤ ਸਿੰਘ’ ਇਹੋ ਅਰਜ਼ੋਈ ਨੀ!
ਗੁਰੂ ਤੋਂ ਬਗੈਰ ਕਿਤੇ ਮਿਲਦੀ ਨਾ ਢੋਈ ਨੀ!
ਬਾਂਹ ਸਾਡੀ ਗੁਰੂ ਨੂੰ ਫੜਾ ਨੀ ਵੈਸਾਖੀਏ!
ਆ ਨੀ ਵਿਸਾਖੀਏ, ਆ ਨੀ ਵੈਸਾਖੀਏ,
ਗੁਰੂ ਵਾਲੇ ਸਾਨੂੰ ਵੀ ਬਣਾ ਨੀ ਵੈਸਾਖੀਏ!