ਇਕ ਗੱਲ ਮਨ ਵਿਚ ਰੱਖਣੀ, ਇਹ ਗੱਲ ਬੜੀ ਖਾਸ ਬੱਚਿਓ
ਭਲਕੇ ਪ੍ਰੀਖਿਆ ਹੈ ਹੋਣੀ, ਹੋਣਾ ਤੁਸੀਂ ਪਾਸ ਬੱਚਿਓ

ਮਹਿਲਾਂ ਤੇ ਮਨਾਰਿਆਂ ਦੇ, ਲਾਲਚ ਉਹ ਦੇਣਗੇ
ਸੁਰਗਾਂ ਦੇ ਲਾਰਿਆਂ ਦੇ, ਲਾਲਚ ਉਹ ਦੇਣਗੇ
ਮਖਮਲੀ ਸੇਜ ਤੇ ਕਰਾਉਣਗੇ ਤੁਹਾਡਾ ਉਹ ਨਿਵਾਸ ਬੱਚਿਓ
ਭਲਕੇ ਪ੍ਰੀਖਿਆ ਹੈ ਹੋਣੀ, ਹੋਣਾ ਤੁਸੀਂ ਪਾਸ ਬੱਚਿਓ

ਘੁੱਟ ਕੇ ਤੁਹਾਨੂੰ ਉਹ, ਕਲਾਵੇ ਵਿਚ ਲੈਣਗੇ
ਹੋਜੋਂਗੇ ਹੈਰਾਨ ਏਨਾ, ਪਿਆਰੇ ਸਾਰੇ ਦੇਣਗੇ
ਉਨ੍ਹਾਂ ਦਿਆਂ ਬੋਲਾ ਵਿਚ ਹੋਊਗੀ ਅੰਤਾਂ ਦੀ ਮਿਠਾਸ ਬੱਚਿਓ
ਭਲਕੇ ਪ੍ਰੀਖਿਆ ਹੈ ਹੋਣੀ, ਹੋਣਾ ਤੁਸੀਂ ਪਾਸ ਬੱਚਿਓ

ਥੋਡੇ ਅੱਗੇ ਸੋਨੇ ਦੀਆਂ, ਮੋਹਰਾਂ ਉਹ ਵਿਛਾਉਣਗੇ
ਹਰ ਹੀਲੇ ਦੇਖਿਓ ਤੁਹਾਨੂੰ, ਪਰਚਾਉਣਗੇ
ਛਲ ਅਤੇ ਕਪਟੀ ਤੋਂ ਹੁੰਦੀ ਹਰ ਗੱਲ ਦੀ ਹੈ ਆਸ ਬੱਚਿਓ
ਭਲਕੇ ਪ੍ਰੀਖਿਆ ਹੈ ਹੋਣੀ, ਹੋਣਾ ਤੁਸੀਂ ਪਾਸ ਬੱਚਿਓ

ਮੰਨੇ ਨਾ ਜੇ ਤੁਸੀਂ, ਫੇਰ ਅੱਖਾਂ ਉਹ ਦਿਖਾਉਣਗੇ
ਨੇਜ਼ੇ, ਤਲਵਾਰਾਂ ਸਿਰਾਂ ਉੱਤੇ, ਲਹਿਰਾਉਣਗੇ
ਜਿਨ੍ਹਾਂ ਦੀ ਬੁਝਾਉਣੀ ਹਰ ਹੀਲੇ ਤੁਸਾਂ ਨੇ ਪਿਆਸ ਬੱਚਿਓ
ਭਲਕੇ ਪ੍ਰੀਖਿਆ ਹੈ ਹੋਣੀ, ਹੋਣਾ ਤੁਸੀਂ ਪਾਸ ਬੱਚਿਓ