ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ
ਜਿਗਰਾ ਪਹਾੜ ਜਿੱਡਾ ਮਿਲੇ ਨਾ ਮਿਸਾਲ
ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ ਰੱਖੇ ਸੀ ਹਮੇਸ਼ਾਂ ਜਿਹੜੇ ਗਲ ਨਾਲ ਲਾ ਕੇ
ਲੋਰੀਆਂ ਸੀ ਦਿੱਤੀਆਂ ਪਿੱਠ ਨੂੰ ਥਪਾਕੇ
ਜਾਨ ਨਾਲੋਂ ਵੱਧ ਜਿਹੜੇ ਰੱਖੇ ਸੀ ਸੰਭਾਲ
ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ ਤੁਰਦੇ ਸੀ ਦਾਦੀ ਨਾਲ ਉਂਗਲੀਆਂ ਫੜ ਕੇ
ਖੇਡਦੇ ਸੀ ਦਾਦੀ ਨਾਲ ਮੋਢਿਆਂ ’ਤੇ ਚੜ ਕੇ
ਸੋਚ ਕੇ ਵੀ ਆ ਜਾਂਦਾ ਹੈ ਚਿੱਤ 'ਚ ਭੁਚਾਲ
ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ ਨਿੱਕੇ ਨਿੱਕੇ ਬੱਚਿਆਂ ਦੇ ਨਿੱਕੇ ਨਿੱਕੇ ਹਾਸਿਆਂ ਨੂੰ
ਕੌਣ ਨਹੀਂ ਚਾਹੁੰਦਾ ਮਜ਼ਲੂਮਾਂ ਦੇ ਦਿਲਾਸਿਆਂ ਨੂੰ
ਆਂਦਰਾਂ ਦੇ ਬਿਨਾਂ ਜੀਣਾ ਹੋ ਜਾਵੇ ਮੁਹਾਲ
ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ ਧੰਨ ਸੀ ਉਹ ਲਾਲ ਕਰ ਗਏ ਕੁਰਬਾਨੀਆਂ
ਕਿੰਨੀਆਂ ਸੀ ਕੀਮਤੀ ਉਹ ਦੋਵੇਂ ਜ਼ਿੰਦਗਾਨੀਆਂ
ਸਿਦਕ ਦਿਖਾਇਆ ਹਰ ਹੀਲੇ ਹਰ ਹਾਲ
ਕਿਵੇਂ ਤੋਰੇ ਹੋਣਗੇ ਮਾਤਾ ਗੁਜਰੀ ਨੇ ਲਾਲ | 
