ਅਕਾਲ ਪੁਰਖ ਦੇ ਅਲੌਕਿਕ ਪ੍ਰਕਾਸ਼ ਦਾ ਹੈ ਜੋ ਪ੍ਰਕਾਸ਼।
ਉਹੀ ਤਾਂ ਹੈ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਅਲੌਕਿਕ ਪ੍ਰਕਾਸ਼।
ਆ ਜਾਣ ਉਹ ਪ੍ਰਾਣੀ ਇਸਦੀ ਸ਼ਰਣ ’ਚ ਜੋ ਹੋਣ ਨਿਰਾਸ਼।
ਮਿਟਾ ਦਿੰਦਾ ਏ ਹਰ ਨਿਰਾਸ਼ਾ ਦਾ ਹਨੇਰਾ ਇਸਦਾ ਪ੍ਰਕਾਸ਼।
ਕਿਉਂ ਕੋਈ ਹੁੰਦਾ ਹੈ ਦੁੱਖਾਂ-ਕਲੇਸ਼ਾਂ, ਕਸ਼ਟਾਂ ਕਾਰਨ ਉਦਾਸ?
ਅਣਗਿਣਤ ਸੁਖ ਦਿੰਦਾ ਹੈ ਗੁਰੂ ਗ੍ਰੰਥ ਦਾ ਅਲੌਕਿਕ ਪ੍ਰਕਾਸ਼।
ਮਨ ਦੀ ਸੱਚੀ ਭਾਵਨਾ ਨਾਲ ਕਰੇ ਜੋ ਪੂਰਨ ਵਿਸ਼ਵਾਸ।
ਉਸ ਦੇ ਸਭ ਕਾਰਜ ਆਵਣ ਇਸ ਦੀ ਮਿਹਰ ਸਦਕਾ ਰਾਸ।
ਜੋ ਪ੍ਰਾਣੀ ਗਾਵਣ ਜਾਂ ਸੁਣਨ ਗੁਰਬਾਣੀ ਸੁਆਸ-ਸੁਆਸ।
ਤਨ-ਮਨ ਉਨ੍ਹਾਂ ਦੇ ਦਮਕ ਉੱਠਣ ਜਿਉਂ ਹੋਵਣ ਫੁੱਲ ਪਲਾਸ਼।
ਕਦੇ ਨਹੀਂ ਕਰਦੇ ਗੁਰੂ ਗ੍ਰੰਥ ਉਨ੍ਹਾਂ ਨੂੰ ਨਿਰਾਸ਼।
ਪਰਮ ਸੰਤੋਖ, ਪਰਮ-ਆਨੰਦ, ਮੁਕਤੀ ਦੀ ਜਿਨ੍ਹਾਂ ਨੂੰ ਤਲਾਸ਼।
ਤੋੜ ਦੇਵੇ ਕਾਮ, ਕ੍ਰੋਧ, ਲੋਭ, ਮੋਹ, ਹੰਕਾਰ ਦੇ ਜਾਲ-ਜੰਜਾਲ।
ਰੋਸ਼ਨ ਕਰ ਦੇਵੇ ਦਿਲ ਦੇ ਦੀਵੇ ਇਸਦਾ ਅਲੌਕਿਕ ਪ੍ਰਕਾਸ਼।
ਗੁਰੂ ਅਰਜਨ ਦੇਵ ਜੀ ਇਸਦੇ ਪਹਿਲੇ ਸੰਪਾਦਕ ਨੇ ਖਾਸ।
ਹਰਿਮੰਦਰ ਗੁਰੂ ਗ੍ਰੰਥ ਸਾਹਿਬ ਦਾ ਪਹਿਲਾ ਪਵਿੱਤਰ ਨਿਵਾਸ।
ਗੁਰੂਆਂ, ਭੱਟਾਂ, ਭਗਤਾਂ, ਗੁਰਸਿੱਖਾਂ ਦੀ ਬਾਣੀ ਦਾ ਇਸ ਵਿਚ ਪ੍ਰਕਾਸ਼।
ਸ਼ਕਤੀ ਅਤੇ ਭਗਤੀ ਦੇ ਨਾਲ ਦੇਵੇ ਇਹ ਮੁਕਤੀ ਦਾ ਪ੍ਰਸਾਦਿ।
ਭੇਦ-ਭਾਵ, ਊਚ-ਨੀਚ, ਜਾਤ-ਪਾਤ ਦਾ ਇਸ ਵਿਚ ਖੰਡਨ ਖਾਸ।
ਚਿੰਤਾ, ਸੋਗ, ਅਗਿਆਨ, ਵਹਿਮਾਂ-ਭਰਮਾਂ ਦਾ ਇਹ ਕਰੇ ਵਿਨਾਸ਼।
ਅਕਾਲ ਪੁਰਖ ਦੇ ਅਲੌਕਿਕ ਪ੍ਰਕਾਸ਼ ਦਾ ਹੈ ਜੋ ਪ੍ਰਕਾਸ਼।
ਉਹੀ ਤਾਂ ਹੈ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਅਲੌਕਿਕ ਪ੍ਰਕਾਸ਼।