ਰਗਾਂ ਦੇ ਖ਼ੂਨ ਨੂੰ ਗ਼ੈਰਤ ਦੀ ਤਿੱਖੀ ਪਾਣ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਕਿਹਾ ਦਸ਼ਮੇਸ਼ ਨੇ ਮੈਂ ਜ਼ੁਲਮ ਬਿਲਕੁਲ ਹੋਣ ਨਹੀਂ ਦੇਣਾ।
ਕਿਸੇ ਬੇਦੋਸ਼ੇ ਦਾ ਵੀ ਖ਼ੂਨ ਹੁਣ ਮੈਂ ਚੋਣ ਨਹੀਂ ਦੇਣਾ।
ਕਿਸੇ ’ਤੇ ਜ਼ੁਲਮ ਢਾਹੋ ਹੁਕਮ ਰੱਬ ਦਾ ਹੋ ਨਹੀਂ ਸਕਦਾ।
ਜ਼ੁਲਮ ਦਾ ਦਾਗ ਮੱਥੇ ਤੋਂ ਕੋਈ ਜਲ ਧੋ ਨਹੀਂ ਸਕਦਾ।
ਜ਼ੁਲਮ ਰੋਕਣ ਲਈ ਹੀ ਹੱਥ ’ਚ ਕਿਰਪਾਨ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਕਿਸੇ ਮਜ਼ਲੂਮ ਦਾ ਮਜ਼ਹਬ ਜਾਂ ਕੋਈ ਜਾਤ ਨਹੀਂ ਹੁੰਦੀ।
ਉਹੀ ਮਜ਼ਲੂਮ ਹੁੰਦਾ ਏ ਜਿਹਦੀ ਔਕਾਤ ਨਹੀਂ ਹੁੰਦੀ।
ਅਕਾਲ ਪੁਰਖ ਦੀ ਸ਼ਕਤੀ ਤਾਂ ਹੀ ਮਦਦਗਾਰ ਹੁੰਦੀ ਹੈ।
ਜਦੋਂ ਬੰਦੇ ਦੇ ਆਪਣੇ ਹੱਥ ਵਿਚ ਕਿਰਪਾਨ ਹੁੰਦੀ ਹੈ।
ਇਸੇ ਕਿਰਪਾਨ ਨੂੰ ਅੰਮ੍ਰਿਤ ਦੀ ਤਿੱਖੀ ਪਾਣ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਦਸਾਂ ਨਹੁੰਆਂ ਦੀ ਕਰਕੇ ਕਿਰਤ ਖਾਣਾ, ਹੁਕਮ ਸਤਿਗੁਰ ਦਾ।
ਤੇ ਤੋੜੋ ਜਾਤਾਂ-ਪਾਤਾਂ ਦਾ ਇਹ ਤਾਣਾ, ਹੁਕਮ ਸਤਿਗੁਰ ਦਾ।
ਹੈ ਜੋ ਵੀ ਧਰਤ ’ਤੇ ਆਇਆ ਉਹ ਸੱਚੇ ਰੱਬ ਦਾ ਜੀਅ ਹੈ।
ਕਿਸੇ ਵੀ ਜਾਤ ਦੀ ਹੋਵੇ ਤੁਹਾਡੀ ਆਪਣੀ ਧੀ ਹੈ।
ਛੁਡਾਈਆਂ ਕੁੜੀਆਂ ਅਬਦਾਲੀ ਤੋਂ ਆਪਣੀ ਜਾਨ ਦੇ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਗੁਰੂ ਦਸ਼ਮੇਸ਼ ਦਾ ਸਿੱਖ ਜ਼ੁਲਮ ਕੋਈ ਸਹਿ ਨਹੀਂ ਸਕਦਾ।
ਮਦਦ ਮਜ਼ਲੂਮ ਦੀ ਕਰਨੋਂ ਕਦੀ ਵੀ ਰਹਿ ਨਹੀਂ ਸਕਦਾ।
ਹਮੇਸ਼ਾਂ ਆਸਰਾ ਮਿਲਦਾ ਹੈ ਇਸ ਨੂੰ ਰੱਬੀ ਬਾਣੀ ਤੋਂ।
ਤੇ ਮਿਲਦੀ ਪ੍ਰੇਰਨਾ ਇਤਿਹਾਸ ਦੀ ਹਰ ਇਕ ਕਹਾਣੀ ਤੋਂ।
ਉਸੇ ਗੌਰਵਮਈ ਇਤਿਹਾਸ ਨੇ ਹੀ ਸ਼ਾਨ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਗੁਰੂ ਦੇ ਸਿੱਖ ਅੱਗੇ ਜ਼ੁਲਮ ਦੇ ਝੁਕਦੇ ਨਹੀਂ ਵੇਖੇ।
ਇਹ ਸੱਚੇ ਰਾਹ ਦੇ ਰਾਹੀ ਕਦੇ ਰੁਕਦੇ ਨਹੀਂ ਵੇਖੇ।
ਧਰਮ ਈਮਾਨ ਦੀ ਖਾਤਰ ਇਹ ਆਪਣੇ ਸਿਰ ਕਟਾ ਲੈਂਦੇ।
ਤੇ ਛੋਟੇ-ਛੋਟੇ ਬੱਚਿਆਂ ਨੂੰ ਵੀ ਨੇਜ਼ੇ ’ਤੇ ਟੰਗਾ ਲੈਂਦੇ।
ਅਸਾਂ ਜਿੰਦ-ਜਾਨ ਆਪਣੀ ਦੂਜਿਆਂ ਲਈ ਦਾਨ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। ਰਗਾਂ ਦੇ ਖ਼ੂਨ ਨੂੰ ਗ਼ੈਰਤ ਦੀ ਤਿੱਖੀ ਪਾਣ ਦਿੱਤੀ ਹੈ।
ਗੁਰੂ ਦਸ਼ਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਅਲੱਗ ਪਹਿਚਾਣ ਦਿੱਤੀ ਹੈ। | 
