ਰਗ਼ਾਂ ਦੇ ਖ਼ੂਨ ਨੂੰ ਗ਼ੈਰਤ ਦੀ ਤਿੱਖੀ ਪਾਣ ਦਿੱਤੀ ਹੈ।
ਗੁਰੂ ਦਸਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਨਵੀਂ ਪਹਿਚਾਨ ਦਿੱਤੀ ਹੈ।
ਕਿਹਾ ਦਸਮੇਸ਼ ਨੇ ਮੈਂ ਜ਼ੁਲਮ ਬਿਲਕੁਲ ਹੋਣ ਨਹੀਂ ਦੇਣਾ।
ਕਿਸੇ ਨਿਰਦੋਸ਼ ਬੰਦੇ ਦਾ ਲਹੂ ਹੁਣ ਚੋਣ ਨਹੀਂ ਦੇਣਾ।
ਕਿਸੇ ’ਤੇ ਜ਼ੁਲਮ ਢਾਹੋ ਹੁਕਮ ਰੱਬ ਦਾ ਹੋ ਨਹੀਂ ਸਕਦਾ।
ਜ਼ੁਲਮ ਦਾ ਦਾਗ਼ ਮੱਥੇ ਤੋਂ ਕੋਈ ਜਲ ਧੋ ਨਹੀਂ ਸਕਦਾ।
ਜ਼ੁਲਮ ਰੋਕਣ ਲਈ ਹੀ ਹੱਥ ਵਿਚ ਕਿਰਪਾਨ ਦਿੱਤੀ ਹੈ।
ਗੁਰੂ ਦਸਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਨਵੀਂ ਪਹਿਚਾਨ ਦਿੱਤੀ ਹੈ।
ਦਸਾਂ ਨਹੁੰਆਂ ਦੀ ਕਰ ਕੇ ਕਿਰਤ ਖਾਣਾ ਹੁਕਮ ਸਤਿਗੁਰ ਦਾ।
ਤੇ ਜਾਤਾਂ ਦਾ ਵੀ ਤੋੜੋ ਤਾਣਾ-ਬਾਣਾ ਹੁਕਮ ਸਤਿਗੁਰ ਦਾ।
ਜੋ ਇਸ ਧਰਤੀ ’ਤੇ ਆਇਆ ਹੈ ਉਹ ਸੱਚੇ ਰੱਬ ਦਾ ਜੀਅ ਹੈ।
ਕਿਸੇ ਵੀ ਧਰਮ ਦੀ ਹੋਵੇ ਸਾਡੀ ਆਪਣੀ ਧੀ ਹੈ।
ਛੁਡਾਈਆਂ ਬੀਬੀਆਂ ਮੁਗ਼ਲਾਂ ਤੋਂ ਸਿੱਖਾਂ ਜਾਨ ਦਿੱਤੀ ਹੈ।
ਗੁਰੂ ਦਸਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਨਵੀਂ ਪਹਿਚਾਨ ਦਿੱਤੀ ਹੈ।
ਗੁਰੂ ਦੇ ਸਿੱਖ ਅੱਗੇ ਜ਼ੁਲਮ ਦੇ ਝੁਕਦੇ ਨਹੀਂ ਵੇਖੇ।
ਇਹ ਸੱਚੇ ਪੰਥ ਦੇ ਰਾਹੀ ਕਦੇ ਰੁਕਦੇ ਨਹੀਂ ਵੇਖੇ।
ਇਹ ਆਪਣੇ ਧਰਮ ਦੀ ਖਾਤਿਰ ਤਾਂ ਆਪਣੇ ਸਿਰ ਕਟਾ ਲੈਂਦੇ।
ਤੇ ਛੋਟੇ-ਛੋਟੇ ਬੱਚਿਆਂ ਨੂੰ ਵੀ ਨੇਜ਼ਿਆਂ ’ਤੇ ਟੰਗਾ ਲੈਂਦੇ।
ਜਿਨ੍ਹਾਂ ਨੇਜ਼ਿਆਂ ਤੋਂ ਵੀ ਜ਼ੱਲਾਦ ਨੂੰ ਮੁਸਕਾਨ ਦਿੱਤੀ ਹੈ।
ਗੁਰੂ ਦਸਮੇਸ਼ ਸਾਨੂੰ ਖਾਲਸਾਈ ਸ਼ਾਨ ਦਿੱਤੀ ਹੈ।
ਨਵੀਂ ਪਹਿਚਾਨ ਦਿੱਤੀ ਹੈ।