ਹੈ ਅਕਾਲ ਪੁਰਖ ਦੀ ਕਿਰਪਾ ਅਪਾਰ ਖਾਲਸੇ ਦੀ ਕਿਰਪਾਨ।
ਕਲਗ਼ੀਧਰ ਪਿਤਾ ਜੀ ਦਾ ਉਪਕਾਰ ਖਾਲਸੇ ਦੀ ਕਿਰਪਾਨ।
ਬੇਵੱਸ ਮਜ਼ਲੂਮਾਂ ਤੇ ਗ਼ਰੀਬਾਂ ਦੀ ਇਹ ਡਟ ਕੇ ਰੱਖਿਆ ਕਰੇ,
ਹੰਕਾਰੀਆਂ ਤੇ ਜ਼ਾਲਿਮਾਂ ਤੋਂ ਇਹ ਬਿਲਕੁਲ ਕਦੇ ਨਾ ਡਰੇ,
ਮਿਟਾ ਦੇਵੇ ਬਦੀ ਤੇ ਅਤਿਆਚਾਰ ਖਾਲਸੇ ਦੀ ਕਿਰਪਾਨ। ਦੁਸ਼ਟਾਂ ਅਤੇ ਬਦਕਾਰਾਂ ਨੂੰ ਸੋਧਾ ਲਾਉਣ ਦਾ ਕੰਮ ਕਰੇ,
ਦੀਨ, ਧਰਮ, ਹੱਕ ਅਤੇ ਸੱਚ ਲਈ ਇਹ ਅੜੇ,
ਅਧਰਮ, ਝੂਠ, ਕੱਟੜਤਾ ’ਤੇ ਕਰੇ ਵਾਰ ਖਾਲਸੇ ਦੀ ਕਿਰਪਾਨ
ਸੰਤਾਂ, ਮਹਾਂਪੁਰਖ਼ਾਂ, ਪ੍ਰਭੂ-ਪਿਆਰਿਆਂ ਨੂੰ ਸੁੱਖ ਦੇਣ ਵਾਲੀ,
ਮਸਕੀਨਾਂ ਅਤੇ ਦੁਖੀਆਂ ਦੇ ਦੁੱਖ-ਦਰਦ ਹਰ ਲੈਣ ਵਾਲੀ,
ਧਰਮੀਆਂ ਦੀ ਬੋਲੇ ਜੈ-ਜੈਕਾਰ ਖਾਲਸੇ ਦੀ ਕਿਰਪਾਨ। ਗੁਰੂ ਦੇ ਸਿੰਘਾਂ ਅੰਦਰ ਚੜ੍ਹਦੀ ਕਲਾ ਦਾ ਜਜ਼ਬਾ ਤੇ ਜੋਸ਼ ਭਰੇ,
ਸਿੱਖ ਪੰਥ ਦੀ ਆਨ, ਬਾਨ, ਸ਼ਾਨ, ਵਧਾਉਣ ਦਾ ਕੰਮ ਕਰੇ,
ਕਦੇ ਨਾ ਮੰਨੇ ਈਨ ਅਤੇ ਹਾਰ ਖ਼ਾਲਸੇ ਦੀ ਕਿਰਪਾਨ।
ਅਣਖ ਨਾਲ ਜੀਣ ਲਈ ਇਸ ਨੇ ਸਾਨੂੰ ਕਾਬਿਲ ਬਣਾਇਆ।
ਮਾਣ-ਮਰਯਾਦਾ ਨਾਲ ਜੀਣ ਦਾ ਸਾਨੂੰ ਸਲੀਕਾ ਸਿਖਾਇਆ,
ਗ਼ੁਲਾਮੀ ਸਹਿਣ ਤੋਂ ਕਰੇ ਇਨਕਾਰ ਖਾਲਸੇ ਦੀ ਕਿਰਪਾਨ। ਗਿੱਦੜੋਂ ਸ਼ੇਰ ਕਰੇ ਤੇ ਮੁਰਦਾ ਰੂਹਾਂ ਵਿਚ ਨਵਾਂ ਜੋਸ਼ ਭਰੇ,
ਨਾ ਕੋਈ ਵੈਰੀ, ਨਾ ਕੋਈ ਬਿਗ਼ਾਨਾ ਦਾ ਫ਼ਲਸਫ਼ਾ ਪੇਸ਼ ਕਰੇ,
ਦੱਸੇ ਨਿਰਭਉ, ਨਿਰਵੈਰ ਦਾ ਵਿਚਾਰ ਖਾਲਸੇ ਦੀ ਕਿਰਪਾਨ।
ਹਿੰਦੁਸਤਾਨ ਦੇ ਲੋਕਾਂ ’ਤੇ ਇਸ ਨੇ ਕੀਤੇ ਕਈ ਉਪਕਾਰ,
ਲੈ ਕੇ ਦਿੱਤਾ ਹਿੰਦੁਸਤਾਨੀਆਂ ਨੂੰ ਆਜ਼ਾਦੀ ਦਾ ਅਧਿਕਾਰ,
ਹੁਣ ਵੀ ਹਰ ਕੁਰਬਾਣੀ ਲਈ ਤਿਆਰ ਖਾਲਸੇ ਦੀ ਕਿਰਪਾਨ। ਜਦੋਂ ਸੁਲ੍ਹਾ-ਸਫ਼ਾਈ ਕਰਨ ਦਾ ਕੋਈ ਵੀ ਰਸਤਾ ਨਾ ਬਚੇ,
ਜਦੋਂ ਕੋਈ ਇਨਸਾਨੀਅਤ ਦਾ ਵੈਰੀ ਸਾਜ਼ਿਸ਼ ’ਤੇ ਸਾਜ਼ਿਸ਼ ਰਚੇ,
ਉਦੋਂ ਉੱਠਦੀ ਏ ਬਣ ਕੇ ਲਲਕਾਰ ਖਾਲਸੇ ਦੀ ਕਿਰਪਾਨ।
ਜੰਗ ਦੇ ਮੈਦਾਨ ’ਚ ਨਿਸਚੈ ਹੀ ਕਰ ਆਪਣੀ ਜੀਤ ਕਰੇ,
ਜਾਣਦਾ ਪੂਰਾ ਜਹਾਨ ਸ਼ੁਭ ਕਰਮਨ ਤੋਂ ਇਹ ਕਦੇ ਨਾ ਡਰੇ,
ਹੈ ਕ੍ਰਾਂਤੀਆਂ ਦੀ ਸ਼ਾਹ-ਅਸਵਾਰ ਖਾਲਸੇ ਦੀ ਕਿਰਪਾਨ। ਫ਼ਿਰਕਾਪ੍ਰਸਤੀ ਤੇ ਨਫ਼ਰਤ ਦੁਨੀਆ ’ਚੋਂ ਮਿਟਾਉਣ ਲਈ,
ਸੱਚਾਈ ਨੇਕੀ ਅਤੇ ਮੁਹੱਬਤ ਹਰ ਜਗ੍ਹਾ ਫੈਲਾਉਣ ਲਈ,
ਦੇਂਦੀ ਏ ਹੋਕਾ ਬਾਹਾਂ ਉਲਾਰ ਖਾਲਸੇ ਦੀ ਕਿਰਪਾਨ।
ਹਿੰਦ ਦੀ ਇੱਜ਼ਤ ਨੂੰ ਸ਼ਰੇਆਮ ਨੀਲਾਮ ਹੋਣ ਤੋਂ ਬਚਾਇਆ,
ਲੁਟੇਰੇ ਅਬਦਾਲੀ ਤੋਂ ਬਾਈ ਸੌ ਇਸਤਰੀਆਂ ਨੂੰ ਛੁਡਾਇਆ,
ਬਚਾਈ ਲੱਜ ਹੋਣ ਤੋਂ ਸ਼ਰਮਸਾਰ ਖਾਲਸੇ ਦੀ ਕਿਰਪਾਨ। ਛੂਆ-ਛੂਤ, ਜਾਤ-ਪਾਤ ਦਾ ਇਸ ਨੇ ਕਲੰਕ ਮਿਟਾਇਆ।
ਸਮਾਜਵਾਦ ਤੇ ਭਾਈਚਾਰੇ ਦਾ ਗੁਲਸ਼ਨ ਮਹਿਕਾਇਆ,
ਬਣਾਇਆ ਜੀਣ ਲਾਇਕ ਸੰਸਾਰ ਖਾਲਸੇ ਦੀ ਕਿਰਪਾਨ।
ਪਤਾ ਨਹੀਂ ਕਦ ਤਕ ਹਿੰਦੁਸਤਾਨ ਗ਼ੁਲਾਮੀ ਦਾ ਬੋਝ ਢੋਂਦਾ?
ਨਾ ਇਹ ਲੋਕਤੰਤਰ ਹੁੰਦਾ, ਨਾ ਆਪਣਾ ਸੰਵਿਧਾਨ ਹੁੰਦਾ,
ਜੇ ਨਾ ਹੁੰਦੀ ਦੇਸ਼ ਦੀ ਪਹਿਰੇਦਾਰ ਖਾਲਸੇ ਦੀ ਕਿਰਪਾਨ। ਕੋਈ ਵੀ ਭੁਲਾ ਨਹੀਂ ਸਕਦਾ ਖਾਲਸੇ ਦੀਆਂ ਕੁਰਬਾਨੀਆਂ,
ਦਰਜ ਨੇ ਇਤਿਹਾਸ ’ਚ ਇਸਦੇ ਲਹੂ ਨਾਲ ਲਿਖੀਆਂ ਕਹਾਣੀਆਂ,
ਰਚਿਆ ਇਤਿਹਾਸ ਸੁਨਹਿਰੀ-ਸ਼ਾਨਦਾਰ ਖਾਲਸੇ ਦੀ ਕਿਰਪਾਨ।
ਹੈ ਅਕਾਲ ਪੁਰਖ ਦੀ ਕਿਰਪਾ ਅਪਾਰ ਖਾਲਸੇ ਦੀ ਕਿਰਪਾਨ।
ਕਲਗ਼ੀਧਰ ਪਿਤਾ ਜੀ ਦਾ ਉਪਕਾਰ ਖਾਲਸੇ ਦੀ ਕਿਰਪਾਨ। |
