ਪੱਤਿਆਂ ਤੋਂ ਬਿਨਾਂ
ਮਨੁੱਖਤਾ ਦਾ ਪੱਤਾ ਕੱਟਿਆ ਜਾਵੇਗਾ
ਧਰਤੀ ਤੋਂ ਉਸ ਦਾ ਅਤਾ-ਪਤਾ ਮਿੱਟ ਜਾਵੇਗਾ
ਰੁੱਖਾਂ ਤੋਂ ਬਿਨਾਂ ਸਭ ਕੁਝ ਮਿੱਟੀ ’ਚ ਮਿਲ ਜਾਵੇਗਾ
ਪੱਤਿਆਂ ਤੋਂ ਪਤਾ ਚਲਦਾ ਹੈ
ਕੁਦਰਤ ਦੇ ਪਤੇ ਟਿਕਾਣੇ ਦਾ
ਪੱਤਿਆਂ ਤੋਂ ਪਛਾਣਿਆ ਜਾ ਸਕਦੈ ਪਰਮ-ਪਿਤਾ ਪਰਮਾਤਮਾ ਦਾ ਚਿਹਰਾ
ਪੱਤਿਆਂ ਰਾਹੀਂ ਬਣਿਆ ਰਹਿ ਸਕਦੈ
ਕਾਇਨਾਤ ਨਾਲ ਇਨਸਾਨ ਦਾ ਰਿਸ਼ਤਾ
ਕੋਈ ਪ੍ਰਾਣੀ ਜਿਊਂਦਾ ਨਹੀਂ ਰਹਿ ਸਕਦਾ
ਪੌਣ, ਪਾਣੀ ਤੇ ਇਨ੍ਹਾਂ ਬੂਟਿਆਂ ਤੋਂ ਬਿਨਾ ਜ਼ਿੰਦਗੀ ਹਰੀ-ਭਰੀ ਨਹੀਂ ਰਹਿ ਸਕਦੀ ਜੰਗਲਾਂ ਤੋਂ ਬਿਨਾ।
ਟਾਹਣੀ ਨਾਲੋਂ ਵਿਛੜਨ ਲੱਗਿਆਂ ਪੱਤੇ
ਹਿਲਦੇ ਹੱਥਾਂ ਵਾਂਗ ਅਲਵਿਦਾ ਨੇ ਆਖਦੇ
ਕਿਸੇ ਘੜੀ ਤੋਂ ਟੁੱਟਣ ਵਾਲੇ ਪਲਾਂ ਦੇ
ਇਹ ਪੱਤੇ ਗਵਾਹ ਨੇ ਬਣਦੇ ਇਹ ਆਪਣੀ ਠੰਡੀ-ਹਰੀ ਛਾਂ
ਸਾਡੇ ਸਿਰਾਂ ’ਤੇ ਨੇ ਤਾਣਦੇ
ਜਦੋਂ ਇਹ ਪੀਲੇ ਪੈ ਜਾਵਣ
ਉਦੋਂ ਆਪਣੀ ਮੌਤ ਦਾ ਪਤਾ ਬਿਆਨਦੇ
ਪੱਤਿਆਂ ’ਤੇ ਚਮਕਦੀਆਂ ਤਰੇਲ ਦੀਆਂ ਬੂੰਦਾਂ ਜਾਪਦੀਆਂ ਹੱਸਦੀ ਜ਼ਿੰਦਗੀ ਦੀਆਂ ਹੱਸਦੀਆਂ ਅੱਖਾਂ
ਪੱਤਿਆਂ ਤੋਂ ਬਿਨ੍ਹਾਂ ਕੋਈ ਜ਼ਿੰਦਗੀ ਨਹੀਂ
ਸੁੰਦਰਤਾ ਨਾਲ ਭਰੀ ਕੋਈ ਤਾਜ਼ਗੀ ਨਹੀਂ
ਪੱਤਿਆਂ, ਫੁੱਲਾਂ, ਫਲਾਂ, ਪਾਣੀ ਤੋਂ ਬਿਨਾਂ
ਕੁਦਰਤ ਦੀ ਸੁਣਾਈ ਜਾ ਸਕੇ ਦਾਸਤਾਨ ਨਹੀਂ। | 
