ਹੱਥ ਜੋੜ ਕੇ ਗਲ਼ ਵਿਚ ਪਾ ਪੱਲਾ, ਤੇਰੇ ਚਰਨਾਂ ਵਿਚ ਕਰਾਂ ਅਰਦਾਸ ਦਾਤਾ,
ਫ਼ੈਲ ਚੁੱਕੀ ਜੋ ਦੁਨੀਆ ’ਤੇ ਮਹਾਂਮਾਰੀ, ਕਰੋਨਾ ਵਾਇਰਸ ਨੂੰ ਕਰ ਦਿਓ ਨਾਸ਼ ਦਾਤਾ।
ਦੁਖਾਂ ਵਿਚ ਹੈ ਘਿਰੀ ਮਨੁੱਖਤਾ ਜੋ, ਲਾ ਕੇ ਨਾਮ ਵਾਲਾ ਚੱਪੂ ਕਰ ਪਾਰ ਦਾਤਾ,
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਮਿਹਰ ਹੋਵੇ ਤਾਂ ਚੜੇ ਪਹਾੜ ਪਿੰਗਲਾ, ਗੂੰਗਾ ਵਾਂਗਰਾਂ ਤੋਤੇ ਦੇ ਬੋਲਦਾ ਏ,
ਜਿਸ ਨੂੰ ਆਪਣੇ-ਆਪ ਦੀ ਸਮਝ ਕੋਈ ਨਾ, ਗੁੱਝੇ ਭੇਦ ਸੰਸਾਰ ਦੇ ਖੋਲ੍ਹਦਾ ਏ।
ਤੈਨੂੰ ਭੁੱਲ ਗਏ ਬਹੁਤ ਹੀ ਦੁਖ ਪਾਏ, ਬਖ਼ਸ਼ਣ ਹਾਰਿਆ ਬਖਸ਼ ਇੱਕ ਵਾਰ ਦਾਤਾ।
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਸਾਇੰਸਦਾਨਾਂ ਦੀ ਸਾਇੰਸ ਅੱਜ ਫੇਲ ਹੋ ਗਈ, ਸਭੇ ਗਏ ਵਿਗਿਆਨੀ ਵੀ ਹੰਭ ਦਾਤਾ,
ਲੁਕ ਗਏ ਛਲ, ਕਪਟ, ਧੋਖ਼ੇਬਾਜ਼ ਸਾਰੇ, ਆਇਆ ਤੇਰਾ ਦਰਬਾਰ ਅੱਜ ਕੰਮ ਦਾਤਾ।
ਤੰਦਰੁਸਤੀ ਦੀ ਚਾਬੀ ਹੈ ਕੋਲ ਤੇਰੇ, ਲਾ ਕੇ ਖੋਲ੍ਹ ਦਿਉ ਬੰਦ ਕਵਾੜ ਦਾਤਾ,
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਲੋਭ ਈਰਖਾ ਦੇ ਨਸ਼ੇ ਵਿਚ ਖੰਘਦੇ ਜੋ, ਖੰਘ ਆਉਣ ’ਤੇ ਵੀ ਹੁਣ ਨਹੀਂ ਖੰਘਦੇ ਉਹ,
ਦਾਅਵੇ ਕਰਦੇ ਸੀ ਜੋ ਰੱਬ ਮਿਲਾਉਣ ਵਾਲੇ, ਤੰਦਰੁਸਤੀ ਅੱਜ ਤੇਰੇ ਤੋਂ ਮੰਗਦੇ ਉਹ।
ਚੀਨ, ਕਨੇਡਾ, ਅਮਰੀਕਾ ਜੋ ਦੇਸ਼ ਵੱਡੇ, ਤੇਰੀ ਸਿੱਖੀ ਨੂੰ ਕਰਨ ਨਮਸਕਾਰ ਦਾਤਾ,
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਸੂਰਜ ਚੰਦ ਤਾਰੇ ਸਭੇ ਪੌਣ ਪਾਣੀ, ਤੇਰੇ ਇੱਕ ਇਸ਼ਾਰੇ ਨਾਲ ਚੱਲਦੇ ਨੇ,
ਤੇਰੇ ਸਾਹਮਣੇ ਕਰੋਨਾ ਦੀ ਅਹਿਮੀਅਤ ਕੀ, ਸ਼ਾਂਤ ਹੋਣ ਸਮੁੰਦਰ ਜੋ ਛਲਦੇ ਨੇ।
ਤੇਰੇ ਦਰ ਤੋਂ ਕਾਂ ਨੇ ਹੰਸ ਬਣਦੇ, ਲਈ ਕੋਹੜਿਆਂ ਜਿੰਦ ਸਵਾਰ ਦਾਤਾ,
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਤੇਰੀ ਗੋਲਕ ਤੇ ਲੰਗਰਾਂ ਤਾਈਂ ਦਾਤਾ, ਰਹੇ ਭੰਡਦੇ ਨਾਸਤਿਕ ਲੱਭਦੇ ਨਹੀਂ,
ਸ਼੍ਰੋਮਣੀ ਕਮੇਟੀ ਦੇ ਸੇਵਾਦਾਰ ਦਿਨੇਂ ਰਾਤੀ, ਦਰਦ ਵੰਡਾਂਵਦੇ ਦਾਤਿਆ ਥੱਕਦੇ ਨਹੀਂ।
ਘਰੋਂ-ਘਰੀਂ ਪੁਚਾਇਆ ਫਸੇ ਯਾਤਰੀ ਜੋ, ਖੋਲ੍ਹੇ ਚੌਵ੍ਹੀ ਘੰਟੇ ਲੰਗਰ ਭੰਡਾਰ ਦਾਤਾ,
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। ਕੁੱਲ ਆਲਮ ਪਿਆ ਤੈਨੂੰ ਡੰਡਉਤ ਕਰਦਾ, ਆਜਾ ਦਰਦੀਆ ਦਰਦ ਵੰਡਾ ਆ ਕੇ,
ਮਲਕੀਤ ਸਿੰਘ ਦੀ ਬਿਨੇ ਕਬੂਲ ਕਰ ਲੈ, ਮੀਂਹ ਰਹਿਮਤਾਂ ਵਾਲਾ ਬਰਸਾ ਆ ਕੇ।
ਗੁਰਿੰਦਰ ਅਤੇ ਜਗਬੀਰ ਸਿੰਘ ਸਭ ਸੁਖੀ ਵੱਸਣ, ਖਿੜ ਜਾਏ ਅੱਜ ਨਵੀਂ ਬਹਾਰ ਦਾਤਾ।
ਸੁਖੀ ਵੱਸਣ ਸੰਸਾਰ ਦੇ ਲੋਕ ਸਾਰੇ, ਹੋ ਜਾਏ ਕਰੋਨਾ ਦੀ ਹਾਰ ਦਾਤਾ। |
