ਰਣਜੀਤ ਸਿੰਘ ਮਹਾਰਾਜੇ ਦੇ ਰਾਜ ਵੇਲੇ, ਗੁਰਦੁਆਰਿਆਂ ਨੂੰ ਸੋਨੇ ਦੇ ਨਾਲ ਮੜ੍ਹਿਆ,
ਗੁਰੂ ਘਰਾਂ ਨੂੰ ਦਿੱਤੀਆਂ ਜਾਇਦਾਦਾਂ, ਹੀਰੇ, ਮੋਤੀ, ਜਵਾਹਰਾਤ ਦੇ ਨਾਲ ਜੜਿਆ।
ਹੋਈ ਮੌਤ ਮਹਾਰਾਜੇ ਦੀ ਹਨੇ੍ਹਰ ਛਾਇਆ, ਸੂਰਜ ਮੁਖ ’ਤੇ ਬੰਨ੍ਹੀਆਂ ਪੱਟੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਛੂਰੀ ਪਿੱਠ ’ਚ ਡੋਗਰਿਆਂ ਮਾਰ ਦਿੱਤੀ, ਉੱਧਰ ਮਹੰਤ ਕੁਕਰਮ ਕਰਾਉਣ ਲੱਗੇ,
ਗੁਰੂ-ਘਰਾਂ ’ਚ ਨਸ਼ਿਆਂ ਦੇ ਦੌਰ ਚੱਲੇ, ਬਾਣੀ ਭੁੱਲ ਗਏ ਨਾਚ ਨਚਾਉਣ ਲੱਗੇ।
ਅੰਗਰੇਜ਼ਾਂ ਨਾਲ ਰਲ ਗਏ ਲਾਲਚ ਵੱਸ ਹੋ ਕੇ, ਕਬਜ਼ੇ ਕਰ ਲਏ ਧੋਖੇ ਨਾਲ ਡੰਮੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਨੀਵੀਂ ਜਾਤ ਨੂੰ ਗੁਰੂ-ਘਰੋਂ ਰੋਕ ਦਿੱਤਾ, ਕੜਾਹ ਪ੍ਰਸ਼ਾਦ ਤੇ ਲੰਗਰ ’ਤੇ ਰੋਕ ਲਾਈ,
ਬੇਅਦਬੀ ਵੇਖ ਕੇ ਮਰਦ ਨਿੱਤਰੇ, ਜ਼ੁਲਮ ਰੋਕਣ ਲਈ ਰਲੇ ਸਭ ਭਾਈ ਭਾਈ।
ਪੰਥਕ ਧਿਰਾਂ, ਸਿੰਘ ਸਭਾ, ਚੀਫ਼ ਖਾਲਸਾ ਨੇ, ਇਕੱਠੇ ਹੋਏ ਦੂਰ ਕੀਤੀਆਂ ਕਮੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਨੀਂਦ ਚੈਨ ਦੀ ਸਿੰਘਾਂ ਨੂੰ ਆਂਵਦੀ ਨਹੀਂ, ਕਹਿੰਦੇ ਅਜ਼ਾਦ ਗੁਰਧਾਮ ਕਰਾਵਾਂਗੇ ਹੁਣ,
ਭਾਵੇਂ ਸਿਰਾਂ ਦੀ ਤਾਰਨੀ ਫੀਸ ਪੈ ਜਾਏ, ਹੱਸ-ਹੱਸ ਸ਼ਹੀਦੀਆਂ ਪਾਵਾਂਗੇ ਹੁਣ।
ਹੱਕ ਲੈਣ ਲਈ ਜ਼ੁਲਮ ਵਿਰੁੱਧ ਖੜਦੇ, ਭਾਵੇਂ ਝੱਲ ਲੈਂਦੇ ਲੱਖਾਂ ਹੀ ਤੰਗੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਸਿੰਘ ਅਕਾਲ ਤਖ਼ਤ ’ਤੇ ਹੋਏ ਇਕੱਠੇ, ਮਹੰਤ ਭੱਜ ਗਏ ਝੰਡੇ ਫਿਰ ਚਾੜ ਦਿੱਤੇ,
ਦਿੱਤਾ ਸਾਥ ਪ੍ਰਸ਼ਾਸਨ ਵਿਰੋਧੀਆਂ ਦਾ, 9 ਮੈਂਬਰ ਸਰਕਾਰੀ ਵਿਚ ਵਾੜ ਦਿੱਤੇ।
ਨਹੀਂ ਮੰਨਿਆ ਹੁਕਮ ਸਰਕਾਰ ਵਾਲਾ, ਇਜਲਾਸ ਸੱਦ ਲਿਆ ਜਥੇਬੰਦੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਉਨੀਂ ਸੌ ਵੀਹ ਤੇ ਨਵੰਬਰ ਪੰਦਰ੍ਹਾਂ ਸੀ, ਪਹਿਲਾਂ ਹੋਈ ਚੋਣ ਪੰਜਾਂ ਪਿਆਰਿਆਂ ਦੀ,
ਤੇਜਾ ਸਿੰਘ, ਹਰਕ੍ਰਿਸ਼ਨ, ਜੋਧ ਸਿੰਘ ਐਮ. ਏ., ਬਲਵੰਤ ਸਿੰਘ, ਤੇਜਾ ਸਿੰਘ ਦੀਵਾਨ ਦੁਲਾਰਿਆਂ ਦੀ।
ਫਿਰ ਇਕ ਸੌ ਤੇ ਪੰਝੱਤਰ ਬਣੇ ਮੈਂਬਰ, ਸ਼੍ਰੋਮਣੀ ਕਮੇਟੀ ਦੀਆਂ ਨੀਂਹਾਂ ਗਈਆਂ ਬੰਨ੍ਹੀਆਂ ਨੇ।
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਸਭ ਤੋਂ ਪਹਿਲਾਂ ਇਹ ਸੋਚ ਵਿਚਾਰ ਕੀਤੀ, ਗੁਰਧਾਮ ਅਜ਼ਾਦ ਕਰਵਾਈਏ ਸਾਰੇ,
ਜਿਹੜੇ ਪਿਆਰ ਦੇ ਨਾਲ ਮਹੰਤ ਮੰਨਦੇ ਨਹੀਂ, ਉਨ੍ਹਾਂ ਨੱਕ ਨਕੇਲ ਰਲ ਪਾਈਏ ਸਾਰੇ।
ਛੱਡ ਦਿੱਤੇ ਜੈਕਾਰੇ ਮਤਾ ਪਾ ਦਿੱਤਾ, ਪੰਜਾਂ ਪਿਆਰਿਆਂ ਦੀਆਂ ਗੱਲਾਂ ਮੰਨੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਬੇਰ ਬਾਬੇ ਦੀ, ਤਖ਼ਤ, ਦਰਬਾਰ ਸਾਹਿਬ, ਗੁਰੂ ਖਾਲਸੇ ਜ਼ੋਰ ਪੈ ਗਿਆ ਸੀ,
ਚੁਮਾਲਾ ਸਾਹਿਬ, ਰਕਾਬਗੰਜ ’ਤੇ ਹੋਇਆ ਕਬਜ਼ਾ, ਡਰ ਦਿਲੋਂ ਹਕੂਮਤ ਦਾ ਲਹਿ ਗਿਆ ਸੀ।
ਰੋਹਬ ਦਾਅਬ ਵੇਖ ਸਿੰਘਾਂ ਦਾ ਮਹੰਤ ਭੱਜੇ, ਪਿੱਛੇ ਵੇਖਿਆ ਨਾਂ ਪੁਜਾਰੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਪੰਜਾਂ ਸਾਹਿਬ ਵਿਚ ਮਹੰਤਾਂ ਨੇ ਅੱਤ ਚੁੱਕੀ, ਆਪ ਹੁਦਰੀਆਂ ਬਹੁਤ ਚਲਾ ਰਹੇ ਸੀ,
ਕਰਤਾਰ ਸਿੰਘ ਝੱਬਰ ਲੈ ਕੇ ਸਿੰਘ ਪੁੱਜਾ, ਕਬਜ਼ਾ ਕੀਤਾ ਜੈਕਾਰੇ ਫਿਰ ਲਾ ਰਹੇ ਸੀ।
ਸਿੱਖ ਸਹਿਣ ਨਾ ਕਰੇ ਬੇਅਦਬੀ ਗੁਰੂ ਜੀ ਦੀ, ਤੇਗੀਂ ਨੱਚ ਕੇ ਮੌਤ ਮੂੰਹੋਂ ਮੰਗੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਤਰਨ ਤਾਰਨ ’ਤੇ ਮਹੰਤਾਂ ਨੇ ਜ਼ੁਲਮ ਕੀਤਾ, ਚੌਦਸ ਮੱਸਿਆ ’ਤੇ ਕੰਜਰੀ ਨਚਾ ਦਿੱਤੀ,
ਗ੍ਰੰਥੀ ਸਿੰਘ ਦੇ ਜਲ ਵਿਚ ਡੋਬ ਬੱਚੇ, ਅੱਗ ਕਹਿਰ ਵਾਲੀ ਬਰਸਾਅ ਦਿੱਤੀ।
ਹੁਕਮ ਸਿੰਘ ਹਜਾਰਾ ਸਿੰਘ ਸੀਸ ਦਿੱਤੇ, ਲਾਈਨਾਂ ਸ਼ਹੀਦਾਂ ਦੀਆਂ ਲਾ ਦਿੱਤੀਆਂ ਲੰਮੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਲਛਮਣ ਸਿੰਘ ਨੇ ਸਾਕਾ ਇਹ ਤੱਕਿਆ ਸੀ, ਕਹਿੰਦਾ ਅਜ਼ਾਦ ਨਨਕਾਣਾ ਕਰਾਊਂਗਾ ਮੈਂ,
ਲੈ ਕੇ ਸਿੰਘਾਂ ਨੂੰ ਸ਼ਾਂਤਮਈ ਚੱਲ ਪਏ, ਲੋੜ ਪਈ ਤਾਂ ਸ਼ਹੀਦੀਆਂ ਪਾਵਾਂਗਾ ਮੈਂ।
ਜਿਊਂਦੇ ਸੜ ਗਏ ਗੁਰਧਾਮ ਅਜ਼ਾਦ ਹੋਇਆ, ਸ਼ਰਤਾਂ ਸਭੇ ਸਰਕਾਰ ਨੇ ਮੰਨੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਬਾਗ ਗੁਰੂ ਕਾ, ਮੋਰਚਾ ਚਾਬੀਆਂ ਦਾ, ਭਾਈ ਫੇਰੂ ਤੇ ਜੈਤੋ ਨੂੰ ਮੱਲਿਆ ਏ,
ਗੋਡੇ ਟੇਕ ਦਿੱਤੇ ਸਿੰਘਾਂ ਦੇ ਜੋਸ਼ ਅੱਗੇ, ਅੰਗਰੇਜ਼ ਹਾਕਮ ਗਿਆ ਦਬੱਲਿਆ ਏ।
ਇੱਕੋ ਹੋ ਕੇ ਜਿਧਰ ਨੂੰ ਜਾਣ ਸੂਰੇ, ਚਾਅ ਚੜ੍ਹਦੇ ਤੇ ਭੁਲਦੀਆਂ ਗਮੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। 1925 ਨੂੰ ਐਕਟ ਪਾਸ ਹੋਇਆ, ਸ਼੍ਰੋਮਣੀ ਕਮੇਟੀ ਕੋਲ ਆਏ ਗੁਰਧਾਮ ਸਾਰੇ,
ਪਹਿਲੀ ਵਿਸ਼ਵ ਦੀ ਸੰਸਥਾ ਧਰਮ ਦੀ ਇਹ ਬਣ ਗਈ, ਸਿੱਖ ਪਏ ਖੁਸ਼ੀਆਂ ਮਨਾਉਣ ਸਾਰੇ।
ਪਹਿਲੇ ਪ੍ਰਧਾਨ ਬਣੇ ਸੁੰਦਰ ਸਿੰਘ ਮਜੀਠੀਆ ਜੀ, ਅਗਜੈਕਟਿਵ ਵਿਚ ਪਾਈਆਂ ਰੂਹਾਂ ਚੰਗੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। ਹੱਕ ਲੈਣ ਲਈ ਜਿਹੜੇ ਸ਼ਹੀਦ ਹੋਏ, ਸਿਜਦਾ ਮਲਕੀਤ ਸਿੰਘਾਂ ਉਨ੍ਹਾਂ ਨੂੰ ਕਰੀਦਾ ਏ।
ਜਿਊਂਦੀਆਂ ਕੌਮਾਂ ਵਿੱਚੋਂ ਹੁੰਦੇ ਸ਼ਹੀਦ ਪੈਦਾ, ਸੀਸ ਉਨ੍ਹਾਂ ਦੇ ਚਰਨਾਂ ਵਿਚ ਧਰੀਦਾ ਏ।
ਜਿਹੜੇ ਸਿੰਘਾਂ ਦੀਆਂ ਭੁੱਲੇ ਕੁਰਬਾਨੀਆਂ ਨੂੰ, ਮੈਲ ਈਰਖਾ ਦੀਆਂ ਦਿਲਾਂ ’ਤੇ ਜੰਮੀਆਂ ਨੇ,
ਸ਼੍ਰੋਮਣੀ ਕਮੇਟੀ ਦੀ ਹੋਂਦ ਬਣਾਉਣ ਖਾਤਰ, ਸਿੱਖਾਂ ਦਿੱਤੀਆਂ ਸਿਰਾਂ ਦੀਆਂ ਥੰਮ੍ਹੀਆਂ ਨੇ। |
