ਬਲੀ ਬਚਨ ਦਾ ਅਤੇ ਜਾਂਬਾਜ਼ ਯੋਧਾ,
ਜੇਤੂ ਰਣ ਦਾ ਅਖਵਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਹਰਿਦਾਸ ਸਿੰਘ ਦਾ ਪੋਤਰਾ, ਭਗਵਾਨ ਸਿੰਘ ਦਾ ਪੁੱਤ,
ਸੁੱਤੀ ਅਣਖ ਜਗਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਅੰਮ੍ਰਿਤਸਰ ਦੀ ਰਾਖੀ ਲਈ ਸੋਚ ਸੋਚੀ,
ਕਿਲ੍ਹਾ ਰਾਮਗੜ੍ਹ ਬਣਵਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਰਾਮਗੜ੍ਹੀਆ ਮਿਸਲ ਨੂੰ ਕਾਇਮ ਕੀਤਾ,
ਜਿਊਣਾ ਅਣਖ ਨਾਲ ਸਿਖਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਆਹਲੂਵਾਲੀਆ, ਬਘੇਲ ਸਿੰਘ ਨਾਲ ਰਲ ਕੇ,
ਜਿੱਤ ਦਿੱਲੀ ਜਤਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ
ਜਿਹੜੀ ਦਿੱਲੀ ਨੇ ਪਰਖਾਂ ਵਿਚ ਪਾਇਆ ਸਾਨੂੰ,
ਉਸ ਦਿੱਲੀ ਵਿਚ ਛਾਅ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਜਿਹੜੇ ਤਖਤ ਬਹਿ ਕੇ ਹੁਕਮ ਚਲਾਉਣ ਪਾਪੀ,
ਮੱਥਾ ਓਸ ਨਾਲ ਲਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਤਖਤ-ਏ-ਤਾਊਸ ਨੂੰ ਹਾਥੀਆਂ ਮਗਰ ਪਾ ਕੇ,
ਅੰਮ੍ਰਿਤਸਰ ਲਿਆ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਮਿਸਲ ਰਾਮਗੜ੍ਹੀਆ ਸਦਾ ਲਈ ਚਮਕਦੀ ਰਹੇ,
ਦੋ ਮੀਨਾਰ ਬਣਵਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਅੱਖ ਚੁੱਕ ਜੋ ਪੰਥ ਦੇ ਵੱਲ ਆਇਆ,
ਮਿੱਟੀ ਵਿਚ ਮਿਲਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਸੀਨਾ ਚੀਰ ਪਹਾੜਾਂ ਤੇ ਬੇਲਿਆਂ ਦਾ,
ਸਿੱਖੀ ਤਾਈਂ ਰੁਸ਼ਨਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।
ਮਲਕੀਤ ਸਿੰਘਾ ! ਨਈਂ ਕਦੇ ਵੀ ਭੁੱਲ ਸਕਦੀ,
ਜਿਹੜੀ ਤੇਗ ਚਲਾ ਗਿਆ ਜੱਸਾ ਸਿੰਘ ਰਾਮਗੜ੍ਹੀਆ।