ਸ਼੍ਰੋਮਣੀ ਕਮੇਟੀ ਆਪਣਾ ਫ਼ਰਜ਼ ਨਿਭਾਇਆ ਏ।
ਹੜ੍ਹ ਪੀੜਤ ਦੁਖੀਆਂ ਦਾ ਦਰਦ ਵੰਡਾਇਆ ਏ। ਭੂਚਾਲ, ਸੁਨਾਮੀ ਜਦੋਂ ਕਰੋਨਾ ਆਈ ਸੀ,
ਪੂਰੇ ਦੇਸ਼ ਵਿਚ ਮੱਚੀ ਹਾਲ ਦੁਹਾਈ ਸੀ,
ਲੋੜਵੰਦਾਂ ਲਈ ਰਾਸ਼ਨ ਘਰੀਂ ਪੁਚਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ ਫ਼ਰਜ਼ ਨਿਭਾਇਆ ਏ। ਆਈ ਕਰੋਪੀ ਬੰਨ੍ਹ ਪਾਣੀਆਂ ਤੋੜ੍ਹੇ ਨੇ,
ਪਿੰਡਾਂ ਦੇ ਪਿੰਡ ਕਹਿਰੀ ਹੜ੍ਹਾਂ ਨੇ ਰੋੜ੍ਹੇ ਨੇ,
ਮਹਿਲ ਮੁਨਾਰੇ ਵਾਲਿਆਂ ਨੀਰ ਵਹਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ ... ਸੇਵਾਦਾਰਾਂ ਜਾਨ ਜੋਖਮ ਵਿਚ ਪਾਈ ਏ,
ਰਾਤਾਂ ਦੀ ਉਹਨਾਂ ਆਪਣੀ ਨੀਂਦ ਗਵਾਈ ਏ,
ਲੋੜਵੰਦਾਂ ਲਈ ਹਰ ਥਾਂ ਲੰਗਰ ਚਲਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ ... ਜੋ ਸ਼੍ਰੋਮਣੀ ਕਮੇਟੀ ਉੱਤੇ ਉਂਗਲਾਂ ਚੁੱਕਦੇ ਨੇ
ਅੱਜ ਬਿਪਤਾ ਵੇਲੇ ਵਿਚ ਘਰਾਂ ਦੇ ਲੁੱਕਦੇ ਨੇ
ਸੱਚ ਨੇ ਝੂਠ ਨੂੰ ਪੈਰਾਂ ਹੇਠ ਦਬਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ ... ਕੀਤਾ ਨਾ ਕੋਈ ਹੀਲਾ ਜਦ ਸਰਕਾਰਾਂ ਨੇ
ਮੱਥਾ ਮੌਤ ਨਾਲ ਲਾਇਆ ਸੇਵਾਦਾਰਾਂ ਨੇ,
ਸਭ ਸੰਗਤ ਦੇ ਨਾਲ ਹੱਥ ਵਟਾਇਆ ਏ
ਸ਼੍ਰੋਮਣੀ ਕਮੇਟੀ ਆਪਣਾ... ਸੜਕਾਂ ਉੱਤੇ ਮਾਲਕ ਰੁਲੇ ਕਰੋੜਾਂ ਦੇ
ਰੈਣ ਬਸੇਰਾ ਕੀਤਾ ਉੱਪਰ ਰੋੜਾਂ ਦੇ,
ਵਿਚ ਸਰਾਂਵਾਂ ਉਨ੍ਹਾਂ ਨੂੰ ਠਹਿਰਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ... ਖੁੱਲ੍ਹੇ ਦਰ ਗੁਰੂ-ਘਰਾਂ ਦੇ ਬੇਸਹਾਰਿਆਂ ਲਈ,
ਮੈਡੀਕਲ ਦੇ ਕੈਂਪ ਲਾਏ ਦੁਖਿਆਰਿਆਂ ਲਈ,
ਰੋਂਦੇ ਤੇ ਕੁਰਲਾਉਂਦਿਆਂ ਨੂੰ ਗਲ਼ ਲਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ... ਇੱਕ ਮਾੜੇ ਲਈ ਸਭ ਨੂੰ ਮੰਦਾ ਕਹੀਏ ਨਾ
ਚੰਗੇ ਕੰਮ ਲਈ ਸਿਫਤ ਕਰਨ ਤੋਂ ਰਹੀਏ ਨਾ,
ਅਣਗਿਣਤ ਲੋਕਾਂ ਨੂੰ ਮੌਤ ਦੇ ਮੂੰਹੋਂ ਬਚਾਇਆ ਏ,
ਸ਼੍ਰੋਮਣੀ ਕਮੇਟੀ ਆਪਣਾ... ਸੰਸਥਾ ਉੱਤੇ ਸਿੱਖ ਕੌਮ ਨੂੰ ਮਾਣ ਰਹੇ ਸਿੱਖ
ਪੰਥ ਦੀ ਸਦਾ ਹੀ ਉੱਚੀ ਸ਼ਾਨ ਰਹੇ,
ਮਲਕੀਤ ਸਿੰਘ ਵਰਪਾਲੀਏ ਸੱਚ ਸੁਣਾਇਆ ਏ
ਸ਼੍ਰੋਮਣੀ ਕਮੇਟੀ ਆਪਣਾ ਫ਼ਰਜ਼ ਨਿਭਾਇਆ ਏ। | 
