ਤੇਰੀ ਮਿਹਰ ਬਿਨਾਂ ਨਹੀਓਂ ਪੱਤਾ ਹਿਲਦਾ,
ਬਾਗ਼ਾਂ ਵਿਚ ਕਦੇ ਨਹੀਓਂ ਫੁੱਲ ਖਿਲਦਾ।
ਨਵੀਆਂ ਬਹਾਰਾਂ ਨੂੰ ਲਿਆਈਂ ਦਾਤਿਆ,
ਹੜ੍ਹਾਂ ਵਾਲੀ ਮਾਰ ਤੋਂ ਬਚਾਈਂ ਦਾਤਿਆ। ਪਲਾਂ ਵਿਚ ਢੈ ਗਏ ਮਹਿਲ ਤੇ ਮੁਨਾਰੇ ਜੀ,
ਕਰੋੜਾਂ ਵਾਲੇ ਮਿੱਟੀ ਹੋ ਗਏ ਨੇ ਚੁਬਾਰੇ ਜੀ।
ਦੇਂਦੇ ਅੱਜ ਦੁਖੀਏ ਦੁਹਾਈ ਦਾਤਿਆ,
ਹੜ੍ਹਾਂ ਵਾਲੀ... ਤੇਰੇ ਹੱਥ ਡੋਰ ਸਾਰੀ ਕਾਇਨਾਤ ਦੀ,
ਹੁਕਮਾਂ 'ਚ ਬੱਝੇ ਹੋਏ ਦਿਨ ਰਾਤ ਜੀ।
ਬੱਸ ਕਰ ਰਹਿਮ ਵਰਤਾਈਂ ਦਾਤਿਆ,
ਹੜ੍ਹਾਂ ਵਾਲੀ... ਕੁਦਰਤ ਰਾਣੀ ਕਹਿਰ ਵਰਸਾਇਆ ਏ,
ਵੱਡੇ ਵੱਡੇ ਪੁਲ਼ਾਂ ਨੂੰ ਪਲ਼ਾਂ 'ਚ ਢਾਇਆ ਏ।
ਡੁੱਬ ਰਹੀ ਬੇੜੀ ਬੰਨੇ ਲਾਈਂ ਦਾਤਿਆ,
ਹੜਾਂ ਵਾਲੀ... ਸੋਨਾ ਮਿੱਟੀ ਵਿਚ ਕਿਰਤੀਆਂ ਉਗਾਇਆ ਸੀ,
ਰਾਤੋ ਰਾਤ ਪਾਣੀ ਭਸਮ ਬਣਾਇਆ ਸੀ।
ਸਿਦਕਾਂ ਦੀ ਭੱਠੀ ਨਾ ਤੂੰ ਪਾਈਂ ਦਾਤਿਆ,
ਹੜ੍ਹਾਂ ਵਾਲੀ... ਤਰਸ ਬੇਜੁਬਾਨਾਂ ਉੱਤੇ ਬੜਾ ਆਉਂਦਾ ਏ,
ਬਿਪਤਾ ’ਚ ਫਸੇ ਤੱਕ ਦਿਲ ਰੋਂਦਾ ਏ।
ਫ਼ੌਜੀਆਂ ਵੀ ਘਾਲ ਹੈ ਘੁਮਾਈ ਦਾਤਿਆ,
ਹੜਾਂ ਵਾਲੀ... ਵੇਖ ਨਹੀਓਂ ਹੁੰਦੀਆਂ ਮਾਤਾਵਾਂ ਰੋਂਦੀਆਂ,
ਬੇਘਰ ਹੋਈਆਂ ਭੈਣਾਂ ਕੁਰਲੌਂਦੀਆਂ...
ਜਾਂਦੇ ਨੀਰ ਪੱਥਰ ਵਹਾਈ ਦਾਤਿਆ,
ਹੜ੍ਹਾਂ ਵਾਲੀ... ਕੱਖੋਂ ਹੌਲੇ ਹੋ ਗਏ ਕਿੱਲਿਆਂ ਦੇ ਮਾਲਕ,
ਤੇਰਾ ਭਾਣਾ ਮੀਠਾ ਕਹਿੰਦੇ ਪ੍ਰਿਤਪਾਲਕ।
ਤੇਰੇ ਬਿਨਾ ਕੋਈ ਨਾ ਸਹਾਈ ਦਾਤਿਆ,
ਹੜ੍ਹਾਂ ਵਾਲੀ... ਲੋਟੂ ਟੋਲੇ ਅੱਜ ਨਜ਼ਰ ਨਾ ਆਉਂਦੇ ਨੇਂ,
ਬਿਆਨਾਂ ਰਾਹੀਂ ਲੂਣ ਜ਼ਖ਼ਮਾਂ ’ਤੇ ਲਾਉਂਦੇ ਨੇ।
ਸਿੰਘਾਂ ਨੇ ਸੇਵਾ ਹੈ ਨਿਭਾਈ ਦਾਤਿਆ,
ਹੜ੍ਹਾਂ ਵਾਲੀ... ਮਿਹਰ ਕਰੇਂ ਪਿੰਗਲੇ ਪਹਾੜ ਚਾੜ੍ਹਦੇਂ,
ਮਲਕੀਤ ਸਿੰਘ ਘਾਹ ਸ਼ੇਰਾਂ ਨੂੰ ਖਵਾਲਦੇਂ।
ਵਰਪਾਲ ਦੀ ਅਰਜ਼ ਬੰਨੇ ਲਾਈਂ ਦਾਤਿਆ,
ਹੜ੍ਹਾਂ ਵਾਲੀ ਤੋਂ ਬਚਾਈਂ ਦਾਤਿਆ। | 
