ਸਦੀਆਂ ਤੋਂ ਲੁੱਟਿਆਂ ਲਿਤਾੜਿਆਂ ਨੂੰ ਉਠਾਉਣ ਆਇਆ ਨਾਨਕ,
ਕਿਰਤ ਕਰੋ, ਨਾਮ ਜਪੋ, ਵੰਡ ਛਕੋ ਸਿਧਾਂਤ ਸਿਖਾਉਣ ਆਇਆ ਨਾਨਕ।

ਸੱਚ ’ਤੇ ਚੱਲਣ ਵਾਲੇ ਪਾਂਧੀ ਬਣਾਉਣ ਆਇਆ ਨਾਨਕ,
ਮਨੁੱਖੀ ਜੀਵਨ ਨੂੰ ਰੁਸ਼ਨਾਉਣ ਆਇਆ ਨਾਨਕ।

ਸਾਰੀ ਮਨੁੱਖਤਾ ਦਾ ਪਹਿਰੇਦਾਰ ਅਖਵਾਉਣ ਆਇਆ ਨਾਨਕ,
‘ਨ ਕੋਈ ਹਿੰਦੂ ਨ ਮੁਸਲਮਾਨ’ ਦਾ ਹੋਕਾ ਸੁਣਾਉਣ ਆਇਆ ਨਾਨਕ।

ਮਨੁੱਖੀ ਅਧਿਕਾਰਾਂ ਦੇ ਆਲੰਬਰਦਾਰ ਦਰਸਾਉਣ ਆਇਆ ਨਾਨਕ,
‘ਸਚੁ ਸੁਣਾਇਸੀ ਸਚ ਕੀ ਬੇਲਾ’ ਗਰਜ ਫੁਰਮਾਉਣ ਆਇਆ ਨਾਨਕ।

ਸੁੰਨ ਸਮਾਧੀ ਤੋਂ ਜਗਤ ਦਾ ਪਸਾਰ ਵਿਖਾਉਣ ਆਇਆ ਨਾਨਕ,
‘ਕੀਤਾ ਪਸਾਉ ਏਕੋ ਕਵਾਉ’ ਰਹੱਸ ਸਮਝਾਉਣ ਆਇਆ ਨਾਨਕ।

ਦਸਾਂ ਨਹੁੰਆਂ ਦੀ ਕਿਰਤ ਵਡਿਆਉਣ ਆਇਆ ਨਾਨਕ,
ਗ੍ਰਿਹਸਥ ਧਰਮ ਨੂੰ ਉਚਾਈਆਂ ਬਖ਼ਸ਼ਾਉਣ ਆਇਆ ਨਾਨਕ।

ਲੋੜਵੰਦ, ਗ਼ਰੀਬਾਂ ਦੇ ਮਦਦਗਾਰ ਕਹਾਉਣ ਆਇਆ ਨਾਨਕ,
ਰਾਜਾ ਰੰਕ ਸਭ ਬਰਾਬਰ ਮੁੱਖੋਂ ਬੁਲਾਉਣ ਆਇਆ ਨਾਨਕ।