ਸਿੱਖ ਚੜ੍ਹਦੀ ਕਲਾ ਵਿਚ ਰਹਿੰਦੇ, ਜ਼ਾਲਮ ਕੋਲੋਂ ਨਾ ਡਰਦੇ।
ਢਹਿੰਦੀ ਕਲਾ ਵਿਚ ਨਾ ਰਹਿੰਦੇ, ਹੱਸ-ਹੱਸ ਦੁਖੜੇ ਜਰਦੇ।
ਮਿੱਠਾ ਕਰ ਕੇ ਮੰਨਦੇ ਭਾਣਾ, ਰਜ਼ਾ ਵਿਚ ਰਾਜ਼ੀ ਰਹਿੰਦੇ।
ਨਾ ਦੁੱਖ ਦਿੰਦੇ ਕਿਸੇ ਨੂੰ, ਨਾ ਦੁੱਖ ਕਿਸੇ ਦਾ ਸਹਿੰਦੇ।
ਨਾਲ ਹੌਂਸਲੇ ਜਿਊਂਦੇ, ਰੋ-ਰੋ ਨਾ ਹੌਕੇ ਭਰਦੇ।
ਸਿੱਖ ਚੜ੍ਹਦੀ ਕਲਾ ਵਿਚ ਰਹਿੰਦੇ।

ਮੁਕਾਇਆਂ ਮੁੱਕੇ ਨਾ ਇਹ, ਮੁੱਕ ਗਈਆਂ ਸਰਕਾਰਾਂ।
ਸਿੰਘ ਝੁਕਾਇਆਂ ਝੁਕਦੇ ਨਾ, ਥੱਕ ਗਈਆਂ ਜਾਬਰ ਸਰਕਾਰਾਂ।
ਡਰਾਉਂਦੇ ਨਾ ਸਿੰਘ ਕਿਸੇ ਨੂੰ, ਕਿਸੇ ਕੋਲੋਂ ਨਾ ਡਰਦੇ।
ਸਿੱਖ ਚੜ੍ਹਦੀ ਕਲਾ ਵਿਚ ਰਹਿੰਦੇ।

ਦੇਸ਼ ਵਿਦੇਸ਼ ਅੰਦਰ ਇਨ੍ਹਾਂ, ਹਰ ਖੇਤਰ ਵਿਚ ਮੱਲ ਮਾਰੀ।
ਵੱਖਰੀ ਪਹਿਚਾਣ ਇਨ੍ਹਾਂ ਦੀ, ਜਾਣਦੀ ਦੁਨੀਆਂ ਸਾਰੀ।
ਜੰਗਲ ਵਿਚ ਮੰਗਲ ਕਰ ਦਿੰਦੇ, ਪੈਰ ਜਿੱਥੇ ਵੀ ਧਰਦੇ।
ਸਿੱਖ ਚੜ੍ਹਦੀ ਕਲਾ ਵਿਚ ਰਹਿੰਦੇ।

ਨਿੱਤ ਅਰਦਾਸਾਂ ਕਰਦੇ, ਭਲਾ ਸਰਬੱਤ ਦਾ ਮੰਗਦੇ।
ਪ੍ਰਭੂ ਦੇ ਰੰਗਾਂ ਅੰਦਰ, ਜਿੰਦ ਆਪਣੀ ਰੰਗਦੇ।
ਦੁਖ-ਸੁਖ ਵਿਚ ਹਮੇਸ਼ਾਂ, ਸ਼ੁਕਰਾਨਾ ਗੁਰੂ ਦਾ ਕਰਦੇ।
ਸਿੱਖ ਚੜ੍ਹਦੀ ਕਲਾ ਵਿਚ ਰਹਿੰਦੇ।