ਕਰੋੜਾਂ ਬ੍ਰਹਿਮੰਡਾਂ ਦੇ ਮਾਲਕ ਸੁਆਮੀ,
ਤੂੰ ਸਾਰੀ ਸ੍ਰਿਸ਼ਟੀ ਦਾ ਸਿਰਜਣਹਾਰ ਬਾਬਾ !
ਤੂੰ ਦਇਆ ਦਾ ਸਾਗਰ ਤੂੰ ਪਤਿਤ ਪਾਵਨ,
ਮੇਰੇ ਉੱਪਰ ਵੀ ਕਰ ਉਪਕਾਰ ਬਾਬਾ !
ਐ ਮੇਹਰਾਂ ਦੇ ਸਾਈਂ, ਸੁਣ ਅਰਜ਼ ਮੇਰੀ,
ਮੈਨੂੰ ਤਾਰ ਬਾਬਾ ! ਮੈਨੂੰ ਤਾਰ ਬਾਬਾ !!

ਲੋਭ (ਵਿਕਾਰਾਂ) ਦੀਆਂ ਲਹਿਰਾਂ ਹਰ ਪਲ ਵੱਜਣ,
ਮਹਾ ਭਇਆਨ ਭਉਜਲ ਸੰਸਾਰ ਬਾਬਾ !
ਮੋਹ ਦੇ ਚਿੱਕੜ 'ਚ ਪੈਰ ਨਾ ਹਿਲਦੇ,
ਫ਼ਸਿਆ ਹਾਂ ਵਿਚ ਮੰਝਧਾਰ ਬਾਬਾ !
ਸਿਰ ਪਾਪਾਂ ਦੀ ਪੰਡ ਗਲ ਹਉਂਮੈਂ ਦੇ ਪੱਥਰ,
ਮੈਨੂੰ ਤਾਰ ਬਾਬਾ ! ਮੈਨੂੰ ਤਾਰ ਬਾਬਾ ! !

ਨਾ ਦਇਆ, ਧਰਮ ਨਾ ਸਿਮਰਨ ਦੀ ਬੇੜੀ,
ਨਾ ਸੇਵਾ ਦੀ ਹੀ ਕੋਈ ਪਤਵਾਰ ਬਾਬਾ !
ਕਰ ਤਰਸ ਤੇ ਬਖਸ਼ ਲੈ ਐਸ ਵਾਰੀ,
ਤੂੰ ਬਖਸੰਦ ਹੈਂ ਬਖਸ਼ਣਹਾਰ ਬਾਬਾ !
ਤੂੰ ਹੀ ਮੇਰੀ ਕਸ਼ਤੀ, ਚੱਪੂ, ਤੂੰ ਹੀ ਖੇਵਟ,
ਮੈਨੂੰ ਤਾਰ ਬਾਬਾ ! ਮੈਨੂੰ ਤਾਰ ਬਾਬਾ !!

ਠੱਗਾਂ ਤੇ ਚੋਰਾਂ ਨੂੰ ਤੂੰ ਰਾਹੇ ਪਾਇਆ,
ਆਣ ਢੱਠਾਂ ਹਾਂ ਤੇਰੇ ਦੁਆਰ ਬਾਬਾ !
ਮੈਂ ਜਨਮਾਂ ਦਾ ਰੋਗੀ, ਤੂੰ ਵੈਦ ਸੁਜਾਨ ਹੈਂ,
ਕਰ ਮੇਰਾ ਵੀ ਤੂੰ ਉਪਚਾਰ ਬਾਬਾ !
ਮੈਂ ਪਾਪੀ,ਅਪਰਾਧੀ ਹਾਂ, ਗੁਨਾਹਗਾਰ ਹਾਂ ਮੈਂ,
ਮੈਨੂੰ ਤਾਰ ਬਾਬਾ ! ਮੈਨੂੰ ਤਾਰ ਬਾਬਾ ! !

ਜੈਸਾ ਵੀ ਹਾਂ ਮੈਂ ਤੇਰਾ ਹਾਂ ਸਤਿਗੁਰ,
ਨਾ ਅਵਗੁਣ ਮੇਰੇ ਤੂੰ ਚਿਤਾਰ ਬਾਬਾ !
ਤੇਰੇ ਬਿਨਾਂ ਮੇਰਾ ਕੋਈ ਨਹੀਂ ਸਤਿਗੁਰ,
ਬਖਸ਼ ਲੈ ਅਬ ਕੀ ਬਾਰ ਬਾਬਾ !
ਮੁੜ-ਮੁੜ ਪਿਆ ਕਹਿਨਾ,
ਮੈਨੂੰ ਤਰਨਾ ਨਹੀਂ ਆਉਂਦਾ,
ਮੈਨੂੰ ਤਾਰ ਬਾਬਾ ! ਮੈਨੂੰ ਤਾਰ ਬਾਬਾ ! !