ਸਾਰਾਗੜ੍ਹੀ ਦੀ ਗੱਲ ਸੁਣਾਵਾਂ ਸੁਣਿਓ ਨਾਲ ਧਿਆਨ।
ਚਾਰ ਸਿੱਖ ਦੇ ਵੀਰ ਜਵਾਨਾਂ ਜਿਸ ਲਈ ਵਾਰੀ ਜਾਨ।
ਹੌਲਦਾਰ ਈਸ਼ਰ ਸਿੰਘ ਜੀ ਉਨ੍ਹਾਂ ਦਾ ਸਰਦਾਰ।
ਆਖੇ ਸਿਰ ਧੜ ਬਾਜੀ ਲਾ ਦਿਓ ਜੇ ਪਲਟਨ ਨਾਲ ਪਿਆਰ।
ਸਿੰਘ ਅਸੀਂ ਗੁਰੂ ਗੋਬਿੰਦ ਸਿੰਘ ਦੇ ਮਰਾਂਗੇ ਵਿਚ ਮੈਦਾਨ।
ਐਸੀ ਲੜੀਏ ਅਸੀਂ ਲੜਾਈ ਰੱਖੇ ਯਾਦ ਜਹਾਨ।
21 ਸਿੱਖ, ਦੁਸ਼ਮਣ ਹਜ਼ਾਰਾਂ, ਕੰਮ ਸੀ ਡਾਢਾ ਔਖਾ।
ਸਿੱਖੀ ਸ਼ਾਨ ਵਧਾਉਣ ਦੇ ਲਈ ਮਿਲਿਆ ਸੀ ਇਹ ਮੌਕਾ।
ਦੁਸ਼ਮਣ ਆਖੇ ਹਾਰ ਮੰਨ ਲਓ ਬਖ਼ਸ਼ ਦਿਆਂਗੇ ਜਾਨ।
ਛੱਡ ਦਿਓ ਇਸ ਪੋਸਟ ਤਾਈਂ ਰਹਿਣਾ ਅਗਰ ਜਹਾਨ।
ਈਸ਼ਰ ਸਿੰਘ ਨੇ ਡੱਟ ਕੇ ਆਖਿਆ ਅਸੀਂ ਹਾਂ ਸਰਦਾਰ।
ਵਿਚ ਜੰਗ ਦੇ ਲੜ ਮਰਾਂਗੇ ਇਹ ਸਾਡਾ ਕਿਰਦਾਰ।
ਜੰਗ ਵਿਚ ਕੁੱਦੇ ਸਿੰਘ ਸੂਰਮੇ ਕਹਿ ਬੋਲੇ ਸੋ ਨਿਹਾਲ।
ਸਿੰਘ ਸ਼ਹੀਦੀਆਂ ਪਾ ਰਹੇ ਸਨ ਲੜਦਿਆਂ ਦੁਸ਼ਮਣ ਨਾਲ।
ਦਸਮ ਪਿਤਾ ਦੇ ਸੂਰਮਿਆਂ ਨੇ ਸਿਰ ਧੜ੍ਹ ਬਾਜੀ ਲਾਈ।
ਤੋਬਾ ਕਰਦਾ ਦੁਸ਼ਮਣ ਭੱਜਾ ਮੱਚੀ ਸੀ ਹਾਲ ਦੁਹਾਈ।
ਗੁਰਮੁਖ ਸਿੰਘ ਨੇ ਸਿਗਨਲ ਭੇਜੇ ਸਾਰੀ ਕਥਾ ਸੁਣਾਈ।
ਇਕ-ਇਕ ਸੂਰੇ ਬਾਬਤ ਦੱਸਿਆ ਕਿਵੇਂ ਸ਼ਹੀਦੀ ਪਾਈ।
ਇੰਗਲੈਂਡ ਦੀ ਸੰਸਦ ਅੰਦਰ ਪੇਸ਼ ਹੋਈ ਕੁਰਬਾਨੀ।
ਸਾਰਿਆਂ ਉੱਠ ਕੇ ਵਾਹ-ਵਾਹ ਕੀਤੀ ਕੋਈ ਨ ਇਸ ਦਾ ਸਾਨੀ।
ਲੜੇ ਸਿੰਘ ਸੂਰਮੇ ਡੱਟ ਕੇ ਅਜਬ ਸ਼ਹੀਦੀ ਪਾਈ।
ਇੰਡੀਅਨ ਆਰਡਰ ਆਫ ਮੈਰਿਟ ਮਿਲਿਆ, ਪਲਟਨ ਦੀ ਸ਼ਾਨ ਵਧਾਈ।
21 ਸਿੰਘਾਂ ਦੀ ਸ਼ਹੀਦੀ ਧੁੰਮਾਂ ਪਈਆਂ ਸਾਰੇ।
ਪੁਰਜਾ-ਪੁਰਜਾ ਕੱਟ ਮਰੇ ਧਰਮੋਂ ਮੂਲ ਨ ਹਾਰੇ।
ਵਿਚ ਫਰਾਂਸ ਸਕੂਲਾਂ ਅੰਦਰ ਇਹ ਸਾਕਾ ਜਾਏ ਪੜਾਇਆ।
ਕਿੱਦਾਂ ਇਕ-ਇਕ ਸੂਰਾ ਆਪਣੀ ਪਲਟਨ ਦੇ ਕੰਮ ਆਇਆ।
ਚਾਰ ਸਿੱਖ ਦੇ ਵੀਰ ਸ਼ਹੀਦਾਂ ਨੂੰ ਮੇਰਾ ਪ੍ਰਣਾਮ।
ਪ੍ਰਤਾਪ ਸਿੰਘਾ ਰਹੇਗੀ ਜਦ ਤਕ ਦੁਨੀਆ ਰਹੂ ਉਨ੍ਹਾਂ ਦਾ ਨਾਮ।