ਏਸ ਜਗ ਦਾ ਤੂੰ ਕਰ ਕੇ ਵੇਖ ਭਲਾ ਬੰਦਿਆ
ਤੈਨੂੰ ਲੱਭਦਾ ਫਿਰੇਗਾ ਆਪ ਖ਼ੁਦਾ ਬੰਦਿਆ

ਲੋਕਾਂ ਦੀ ਸੇਵਾ ਵਿਚ ਰੱਬ ਦੀ ਸੇਵਾ ਹੈ
ਕਰ ਕੇ ਸੇਵਾ ਮਿੱਠੜਾ ਮੇਵਾ ਖਾ ਬੰਦਿਆ

ਕੌੜਾ ਬੋਲ ਨਾ ਬੋਲੀਂ ਰੱਬ ਦੇ ਬੰਦਿਆਂ ਨੂੰ
ਮਿੱਠਾ ਬੋਲ ਕੇ ਸਭ ਦੀਆਂ ਅਸੀਸਾਂ ਪਾ ਬੰਦਿਆ

ਚੰਗਾ ਜੇਕਰ ਕਿਸੇ ਦਾ ਕਰ ਸਕਦਾ ਨਹੀਂ ਤੂੰ
ਮਾੜਾ ਕਾਹਤੋਂ ਕਰਦੈਂ ਹੋਸ਼ ’ਚ ਆ ਬੰਦਿਆ

ਜੋ ਬੀਜੇਂਗਾ ਤੈਨੂੰ ਵੱਢਣਾ ਪੈਣਾ ਏ
ਵੱਢ ਕੇ ਅੰਬ ਤੂੰ ਕਿੱਕਰਾਂ ਨਾ ਹੁਣ ਲਾ ਬੰਦਿਆ

ਮੇਰਾ ਮੇਰਾ ਕਰ ਕੇ ਖਾਲੀ ਹੱਥ ਤੁਰ ਗਏ
ਤੇਰਾ ਕਹਿ ਕੇ ਸਭ ਕੁਝ ਪੱਲੇ ਪਾ ਬੰਦਿਆ

ਜਿਹੜੇ ਕੰਮ ਨੂੰ ਆਇਆ ਉਹ ਵੀ ਕਰ ਲੈ ਤੂੰ
ਇਹ ਬੜਾ ਕੀਮਤੀ ਵਕਤ ਨਾ ਵਕਤ ਗਵਾ ਬੰਦਿਆ

ਰੱਬ ਨੇ ਜਾਤ ਬਣਾਈ ਇੱਕੋ ਬੰਦੇ ਦੀ
ਵਿਚ ਬੰਦਿਆਂ ਦੇ ਵੰਡੀਆਂ ਨਾ ਤੂੰ ਪਾ ਬੰਦਿਆ

ਤਨ ਤੇ ਧਨ ਸਭ ਕੁਟੰਬ ਕਬੀਲੇ ਛੁਟ ਜਾਣੇ
ਕਰ ਲੈ ਸਿਮਰਨ ਰੱਬ ਦਾ ਨਾਮ ਧਿਆ ਬੰਦਿਆ

ਇਕ ਦਿਨ ਰੌਣਕ ਛੱਡ ਕੇ ਹੈ ਚਲੇ ਜਾਣਾ
ਜਗ ਦੇ ਸੰਗ ਨਾ ਮੋਹ ਦੇ ਜਾਲ ਵਧਾ ਬੰਦਿਆ