ਗਲਵਕੜੀ ’ਚ ਲੈਕੇ ਦਾਦੀ ਪੋਤਿਆਂ ਨੂੰ ਕਹਿੰਦੀ,
ਸਾਹਵੇਂ ਮੁਗ਼ਲਾਂ ਦੇ ਸੀਸ ਨਾ ਝੁਕਾਇਓ ਬੱਚਿਓ!
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!

ਉਹਦੀ ਮੰਨਣੀ ਨਾ ਕੋਈ ਤੁਸਾਂ ਬਾਤ ਮੇਰੇ ਸ਼ੇਰੋ,
ਸੂਬਾ ਹੂਰਾਂ ਦੀ ਵੀ ਦੇਵੇ ਜੇ ਸੌਗਾਤ ਮੇਰੇ ਸ਼ੇਰੋ,
ਇੰਜ ਗੱਜਣਾ ਕਚਹਿਰੀ ਜੜ੍ਹੋਂ ਹਿੱਲ ਜਾਵੇ ਵੈਰੀ,
ਪੱਗ ਦਾਦੇ ਦੀ ਨੂੰ ਦਾਗ਼ ਨਾ ਲਗਾਇਓ ਬੱਚਿਓ!
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!

ਲੱਖਾਂ ਲਾਲਚਾਂ ਦੇ ਨਾਲ ਭਰਮਾਉਣਾ ਜ਼ਾਲਮਾਂ ਨੇ,
ਤੱਤੀ ਤਵੀ ਚੌਂਕ ਚਾਂਦਨੀ ਚਿਤਾਉਣਾ ਜ਼ਾਲਮਾਂ ਨੇ,
ਜ਼ੋਰਾਵਰ ਫਤਿਹ ਸਿੰਘ! ਸੂਬਾ ਪਾਊ ਵੱਲ ਵਿੰਗ,
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!
ਨਾ ਹੀ ਡੋਲਿਓ ਨਾ ਜ਼ਰਾ ਘਬਰਾਇਓ ਬੱਚਿਓ!!

ਤੱਤੀ ਤਵੀ ’ਤੇ ਬਿਠਾਵੇ ਭਾਵੇਂ ਦੇਗ ’ਚ ਉਬਾਲੇ,
ਬੰਦ ਬੰਦ ਕੱਟ ਦੇਵੇ ਭਾਵੇਂ ਨੇਜ਼ੇ ’ਤੇ ਉਛਾਲੇ,
ਵੀਰ ਅਜੀਤ ਤੇ ਜੁਝਾਰ, ਵਾਂਗੂੰ ਲੈਣੀ ਬਾਜ਼ੀ ਮਾਰ,
ਤੇਰਾ ਭਾਣਾ ਮੀਠਾ ਲਾਗੇ ਫੁਰਮਾਇਓ ਬੱਚਿਓ!
ਫਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!

ਵੈਰੀ ਜ਼ੁਲਮ ਕਮਾਵੇ ਆਰੇ ਨਾਲ ਚਿਰਵਾਵੇ,
ਮੇਰੇ ਲਾਲਾਂ ਦਿਆਂ ਨੈਣਾਂ ’ਚ ਨਾ ਨੀਰ ਭਰ ਆਵੇ,
ਸਿੱਖੀ ਹੋਜੂ ਬਲਵਾਨ ਸੋਭਾ ਕਰੂਗਾ ਜਹਾਨ,
ਝੰਡਾ ਸਿੱਖੀ ਵਾਲਾ ਫ਼ਤਹ ਲਈ ਝੁਲਾਇਓ ਬੱਚਿਓ!
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!

ਮੇਰੇ ਗੋਬਿੰਦ ਦੇ ਲਾਲ, ਨੌਵੇਂ ਪਾਤਸ਼ਾਹ ਦੇ ਪੋਤੇ,
ਵਿਚ ਸੂਬੇ ਦੀ ਕਚਹਿਰੀ, ਵੇਖੋ ਡਟ ਕੇ ਖਲੋਤੇ,
ਥੋਡੀ ਬਿਰਥੀ ਨਾ ਜਾਣੀ ਕੁਰਬਾਨੀ ਇਹ ਲਾਸਾਨੀ,
ਗੱਲ ਹੋਰ ਨਾ ਕੋਈ ਦਿਲ ’ਚ ਲਿਆਇਓ ਬੱਚਿਓ!
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!

ਮੋਤੀ ਮਹਿਰੇ ਦੀ ਸੇਵਾ ਨੂੰ ਜਗ ਵਡਿਆਵੇਗਾ,
ਗੰਗੂ ਲਾਹਨਤੀ ਨੂੰ ਲਾਹਨਤਾਂ ਜਹਾਨ ਸਾਰਾ ਪਾਵੇਗਾ,
ਹੋਵੇ ਵਿਚ ਸਰਹੰਦ ਇਕਬਾਲ ਜੋ ਬੁਲੰਦ,
ਲਾੜੀ ਮੌਤ ਨੂੰ ਵੀ ਹੱਸ ਪ੍ਰਨਾਇਓ ਬੱਚਿਓ!
ਫ਼ਤਹ ਜ਼ਾਲਮਾਂ ਨੂੰ ਗੱਜ ਕੇ ਬੁਲਾਇਓ ਬੱਚਿਓ!!