ਹੋਈ ਜ਼ੁਲਮ ਦੀ ਦੇਖੋ ਇੰਤਹਾ ਏਨੀ,
ਧੀ ਜੰਮਣ ਤੋਂ ਕਰਨ ਇਨਕਾਰ ਲੋਕੀਂ। ਪਤਾ ਲੱਗ ਜਾਏ ਜੇ ਗਰਭ ’ਚ ਹੈ ਲੜਕੀ,
ਗਰਭ ਅੰਦਰ ਹੀ ਦੇਂਦੇ ਨੇ ਮਾਰ ਲੋਕੀਂ। ਬਿਨਾਂ ਲੜਕੀ ਤੋਂ ਵੰਸ਼ ਚਲਾਉਣਾ ਚਾਹੁੰਦੇ,
ਭਰੂਣ ਟੈਸਟ ਨੂੰ ਰਹਿਣ ਤਿਆਰ ਲੋਕੀਂ ਜੇਕਰ ਲੜਕੀ ਹੀ ਵੰਸ਼ ’ਚ ਨਾ ਹੋਈ ਪੈਦਾ,
ਚਲੇ ਵੰਸ਼ ਕਿਵੇਂ? ਨਾ ਕਰਨ ਵਿਚਾਰ ਲੋਕੀਂ। ਜਦੋਂ ਕਿਸੇ ਘਰ ਧੀ ਦਾ ਜਨਮ ਹੁੰਦਾ,
ਚਿਹਰਾ ਉਨ੍ਹਾਂ ਦਾ ਕਿਉਂ ਮੁਰਝਾ ਜਾਂਦਾ?
ਜਿਵੇਂ ਡਿੱਗ ਗਿਆ ਕੋਈ ਪਹਾੜ ਹੋਵੇ,
ਸਾਰਾ ਪਰਵਾਰ ਹੀ ਹੌਂਸਲਾ ਢਾਹ ਜਾਂਦਾ।
ਪਰ ਇਹ ਕਦੇ ਵੀ ਕਿਸੇ ਨੇ ਸੋਚਿਆ ਨਹੀਂ,
ਕਿ ਇਸਤਰੀ ਜਨਮਦਾਤੀ ਸਾਰੇ ਜਹਾਨ ਦੀ ਏ। ਅਣਜੰਮੀਆਂ ਹੀ ਗਰਭ ’ਚ ਮਾਰ ਦੇਣਾ,
ਇਹ ਤਾਂ ਨਿਰੀ ਹੀ ਮੱਤ ਸ਼ੈਤਾਨ ਦੀ ਏ।
ਭੁੱਲ ਗਏ ਨੇ ਇਹ ਤਾਂ ਉਹ ਕੁੱਖ ਹੈ,
ਜਿਨ੍ਹੇਂ ਯੋਧੇ ਬਲਵਾਨਾਂ ਨੂੰ ਜਨਮ ਦਿੱਤਾ।
ਰੱਖਿਆ ਦੇਸ਼ ਦੀ ਕੀਤੀ ਜਿਨ੍ਹਾਂ ਸੂਰਬੀਰਾਂ,
ਅਜਿਹੇ ਸਿਰਲੱਥ ਜਵਾਨਾਂ ਨੂੰ ਜਨਮ ਦਿੱਤਾ। ਇਕ ਸਮਾਂ ਪਹਿਲਾਂ ਵੀ ਆਇਆ ਸੀ ਅਜਿਹਾ,
ਬਾਬੇ ਨਾਨਕ ਨੇ ਮਾਰੀ ਸੀ ਹਾਅ ਉਦੋਂ,
ਇਹ ਤਾਂ ਰਾਜਿਆਂ ਤਾਂਈਂ ਜਨਮ ਦੇਵੇ,
ਨਾਅਰਾ ਹੱਕ ਵਿਚ ਲਾਇਆ ਸੀ ਤਾਂ ਉਦੋਂ। ਹੱਕ ਖੋਹ ਕੇ ਧੀ ਤੋਂ ਲੋਰੀਆਂ ਦਾ,
ਭਲਾ ਆਪਣਾ ਕਿਵੇਂ ਮਨਾਉਗੇ ਤੁਸੀਂ?
ਭੈਣ ਭਾਈ ਦਾ ਰਿਸ਼ਤਾ ਖ਼ਤਮ ਹੋ ਜਾਊ,
ਨੂੰਹ ਲੱਭ ਕੇ ਕਿੱਥੋਂ ਲਿਆਉਗੇ ਤੁਸੀਂ? ਜਿੰਦ ਮਾਸੂਮ ’ਤੇ ਜ਼ਰਾ ਕੁ ਤਰਸ ਕਰੋ,
ਐਵੇਂ ਬਹੁਤਾ ਨਾ ਜ਼ੁਲਮ ਕਮਾਓ ਲੋਕੋ!
ਜਿਹੜੀ ਕੁੱਖ ਦੇ ਵਿਚ ਹੁਣ ਆ ਗਈ ਏ,
ਉਸ ਨੂੰ ਜੀਵਨ ਦਾ ਪੰਧ ਦਿਖਾਓ ਲੋਕੋ!
ਧੀ ਧਿਆਣੀ ਦੇ ਐਵੇਂ ਨਾ ਬਣੋ ਦੁਸ਼ਮਣ,
ਆਖ਼ਿਰ ਧੀ ਹੀ ਵੇਲਾ ਸੰਭਾਲਦੀ ਏ! ਪੁੱਤਰ ਓੜਕ ਨੂੰ ਮੂੰਹ ਹੈ ਫੇਰ ਲੈਂਦਾ,
ਪਰ ਧੀ ਕਦੇ ਨਾ ਸੇਵਾ ਤੋਂ ਹਾਰਦੀ ਏ!
ਔਸਤ ਕੁੜੀਆਂ ਦੀ ਮੁੰਡਿਆਂ ਤੋਂ ਘੱਟ ਰਹਿ ਗਈ,
ਪਰ ਹਰ ਕੰਮ ਵਿਚ ਇਸਤਰੀ ਅਗਾਂਹ ਰਹਿੰਦੀ,
ਕੰਮ ਕਰਦੀ ਮੌਢੇ ਨਾਲ ਜੋੜ ਮੋਢਾ,
ਫਿਰ ਵੀ ਪੁੱਤਰਾਂ ’ਤੇ ਕਿਉਂ ਨਿਗਾਹ ਰਹਿੰਦੀ? ਜੇਕਰ ਇਸ ਰੁਝਾਨ ਨੂੰ ਬਦਲਿਆ ਨਾ,
ਤਾਂ ਫਿਰ ਸਮਾਂ ਇਕ ਦਿਨ ਐਸਾ ਆ ਜਾਣਾ,
ਨਾ ਹੀ ਮਾਂ ਰਹਿਣੀ ਨਾ ਹੀ ਭੈਣ ਰਹਿਣੀ,
ਮਨੁੱਖੀ ਨਸਲ ਨੇ ਮੁੱਕ ਮੁਕਾ ਜਾਣਾ। ਇੱਜ਼ਤ ਇਸਤਰੀ ਦੀ ਕਰੋ ਬਹਾਲ ਫਿਰ ਤੋਂ,
ਕਰੋ ਸਾਇੰਸ ਦਾ ਨਾ ਦੁਰਉਪਯੋਗ ਲੋਕੋ!
ਭਰੂਣ ਟੈਸਟ ਨੂੰ "ਦੀਪ" ਪਾਬੰਦ ਕਰ ਕੇ,
ਨਰੋਏ ਸਮਾਜ ਨੂੰ ਦੇਵੋ ਸਹਿਯੋਗ ਲੋਕੋ!
ਨਰੋਏ ਸਮਾਜ ਨੂੰ ਦੇਵੋ ਸਹਿਯੋਗ ਲੋਕੋ! | 
