ਨਹੀਂ ਭੁਲਾਇਆਂ ਭੁੱਲ ਸਕਦੀ ਕਦੇ ਤੁਹਾਡੀ ਕਾਰਗੁਜ਼ਾਰੀ।
ਸਾਰਾਗੜ੍ਹੀ ਦੇ ਸ਼ਹੀਦੋ ਤੁਹਾਨੂੰ ਨਮਸਕਾਰ ਲੱਖ ਵਾਰੀ।
ਉੱਤਰ ਪੱਛਮ ਸਰਹੱਦ ’ਤੇ ਵੱਸਦੇ ਮੁਸਲਿਮ ਕਈ ਕਬੀਲੇ,
ਭਾਰਤ ਉੱਤੇ ਕਬਜ਼ਾ ਕਰਨ ਦੇ ਕਰਦੇ ਸਨ ਜੋ ਹੀਲੇ,
ਧੱਕੇ ਦੇ ਨਾਲ ਕਾਇਮ ਰੱਖਣੀ ਚਾਹੁੰਦੇ ਸਨ ਸਰਦਾਰੀ।
ਸਰਾਗੜ੍ਹੀ ਦੇ ਸ਼ਹੀਦੋ...

ਅਠਾਰ੍ਹਾਂ ਸੌ ਸਤਾਨਵੇਂ ਸੰਨ ਅਤੇ ਦਿਨ ਸਤੰਬਰ ਬਾਰਾਂ,
ਵੱਧਦੀਆਂ ਆਵਣ ਵੱਲ ਗੜ੍ਹੀ ਦੇ ਕਈ ਪਠਾਣੀ ਡਾਰਾਂ,
ਦੁਸ਼ਮਣ ਦੇ ਦਸਤੇ ਦੀ ਗਿਣਤੀ ਹੈ ਸੀ ਕਈ ਹਜ਼ਾਰੀ।
ਸਰਾਗੜ੍ਹੀ ਦੇ ਸ਼ਹੀਦੋ...

ਛੱਤੀ ਨੰਬਰ ਰੈਜੀਮੈਂਟ ਦਾ, ਜਵਾਨ ਫ਼ੌਜ ਦੇ ਸਨ ਇੱਕੀ,
ਦੇਸ਼ ਪਿਆਰ ਦੀ ਰੰਗਤ ਪਈ ਨਾ, ਪਰ ਭੋਰਾ ਵੀ ਫਿੱਕੀ,
ਇਸ ਰੰਗਤ ਦੇ ਸਦਕਾ ਲੜਦੇ ਰਹੇ ਸਭ ਵਾਰੋ ਵਾਰੀ।
ਸਾਰਾਗੜ੍ਹੀ ਦੇ ਸ਼ਹੀਦੋ...

ਕਰਕੇ ਹੌਂਸਲਾ ਜਦੋਂ ਪਠਾਣਾਂ ਪਾੜ੍ਹ ਗੜ੍ਹੀ ਵਿਚ ਪਾਇਆ,
ਤੋੜ ਸੁਰੱਖਿਆ ਘੇਰਾ ਅੱਗੇ ਵੱਲ ਨੂੰ ਕਦਮ ਵਧਾਇਆ,
ਮੋੜ ਦਿੱਤੇ ਸੀ ਕਦਮ ਪਿਛਾਂਹ ਨੂੰ ਵਰਤ ਪੂਰੀ ਹੁਸ਼ਿਆਰੀ।
ਸਾਰਾਗੜ੍ਹੀ ਦੇ ਸ਼ਹੀਦੋ...

ਸਵਾ ਲੱਖ ਨਾਲ ਲੜ੍ਹਦੇ ਰਹੇ ਜਿਨ੍ਹਾਂ ਦੇ ਵੱਡ ਵਡੇਰੇ,
ਵੈਰੀਆਂ ਦੇ ਨਾਲ ਰਹੇ ਜੂਝਦੇ ਕਰਕੇ ਤੱਕੜੇ ਜੇਰੇ,
ਜਾਨ ਤਲੀ ’ਤੇ ਧਰਨੀ ਦੱਸਦੀ ਸਿੱਖੀ ਸੋਚ ਨਿਆਰੀ।
ਸਾਰਾਗੜ੍ਹੀ ਦੇ ਸ਼ਹੀਦੋ...

ਰੱਖੇ ਅਹਿਮ ਸਥਾਨ ਇਤਿਹਾਸ ‘ਚ ਸਾਰਾਗੜ੍ਹੀ ਦਾ ਸਾਕਾ,
ਜਿਸ ਦੇ ਪੰਨਿਆਂ ਵਿੱਚੋਂ ਪੈਂਦਾ ਸਿੱਖੀ ਸਿਦਕ ਦਾ ਝਾਕਾ,
ਇਸ ਸਿਦਕ ਦੀ ਭਰੇ ਗਵਾਹੀ ‘ਚੋਹਲੇ’ ਦਾ ਲਿਖਾਰੀ।
ਸਾਰਾਗੜ੍ਹੀ ਦੇ ਸ਼ਹੀਦੋ ਤੁਹਾਨੂੰ ਨਮਸਕਾਰ ਲੱਖ ਵਾਰੀ।