ਜਦ ਸੀ ਜੁਲਮਾਂ ਅੱਤ ਮਚਾਈ, ਮੱਚੀ ਘਰ ਘਰ ਹਾਲ ਦੁਹਾਈ,
ਧਰਤੀ ਜਾ ਕੇ ਸੀ ਕੁਰਲਾਈ, ਕੋਈ ਨਾ ਸੁਣੇ ਪੁਕਾਰਾਂ ਨੇ,
ਚੜ੍ਹਿਆ ਚੰਨ ਤਲਵੰਡੀ ਸੋਹਣਾ ਹੋਈਆਂ ਜੈ ਜੈ ਕਾਰਾਂ ਨੇ। ਜੋਤ ਅਕਾਲ ਪੁਰਖ ਦੀ ਆਈ, ਹੋ ਗਈ ਸਾਰੇ ਜਗ ਰੁਸ਼ਨਾਈ,
ਅਰਸ਼ੋਂ ਝੜੀ ਫੁੱਲਾਂ ਦੀ ਲਾਈ, ਖੁਸ਼ੀਆਂ ਦੂਣ ਸਵਾਈਆਂ ਜੀ,
550ਵਾਂ ਸਾਲ ਗੁਰਾਂ ਦਾ ਸਭ ਨੂੰ ਹੋਣ ਵਧਾਈਆਂ ਜੀ। ਆਪ ਨਾਰਾਇਣ ਕਲਾ ਧਰ ਆਏ, ਵਿਚ ਨਨਕਾਣੇ ਭਾਗ ਲਗਾਏ,
ਮਾਤਾ ਤ੍ਰਿਪਤਾ ਜੀ ਦੇ ਜਾਏ, ਗਈਆਂ ਖਿੜ ਗੁਲਜ਼ਾਰਾਂ ਨੇ,
ਚੜ੍ਹਿਆ ਚੰਨ ਤਲਵੰਡੀ ਸੋਹਣਾ ਹੋਈਆਂ ਜੈ ਜੈ ਕਾਰਾਂ ਨੇ। ਮਿਟੀ ਧੁੰਦ ਜਗ ਚਾਨਣ ਹੋਇਆ, ਤਾਰੇ ਛਪੇ ਅੰਧੇਰ ਪਲੋਆ,
ਜਿਨ੍ਹਾਂ ਗਰੀਬਾਂ ਦਾ ਹੱਕ ਖੋਹਿਆ, ਹੋਣਗੀਆਂ ਸਖਤ ਸਜਾਈਆਂ ਜੀ
550ਵਾਂ ਸਾਲ ਗੁਰਾਂ ਦਾ ਸਭ ਨੂੰ ਹੋਣ ਵਧਾਈਆਂ ਜੀ। ਖੁਸ਼ੀਆਂ ਵਿਚ ਨਾਨਕੀ ਗਾਵੇ, ਸਖੀਆਂ ਨਾਲ ਪਈ ਸ਼ਗਨ ਮਨਾਵੇ,
ਵਾਰੀ ਸਦਕੇ ਵੀਰ ਤੋਂ ਜਾਵੇ, ਹੋਈਆਂ ਅਜਬ ਨੁਹਾਰਾਂ ਨੇ,
ਚੜ੍ਹਿਆ ਚੰਨ ਤਲਵੰਡੀ ਸੋਹਣਾ ਹੋਈਆਂ ਜੈ ਜੈ ਕਾਰਾਂ ਨੇ। ਹੋ ਗਈ ਧੰਨ ਦੌਲਤਾਂ ਦਾਈ, ਖੁਸ਼ੀ ਮਨਾਵਣ ਮਾਈ ਭਾਈ,
ਜਿਹੜੀ ਜੁਲਮ ਘਟਾ ਸੀ ਛਾਈ, ਸਤਿਗੁਰ ਆਣ ਹਟਾਈਆਂ ਜੀ,
550ਵਾਂ ਸਾਲ ਗੁਰਾਂ ਦਾ ਸਭ ਨੂੰ ਹੋਣ ਵਧਾਈਆਂ ਜੀ। ਜਿਹੜੇ ਅੱਖੀਂ ਦਰਸ਼ਨ ਕਰ ਗਏ, ਉਹ ਨੇ ਭਵਸਾਗਰ ਤੋਂ ਤਰ ਗਏ,
ਪਾਪੀ ਜਾਲਮ ਸਭੇ ਡਰ ਗਏ, ਮੰਨੀਆਂ ਜਬਰ ਨੇ ਹਾਰਾਂ ਨੇ,
ਚੜ੍ਹਿਆ ਚੰਨ ਤਲਵੰਡੀ ਸੋਹਣਾ ਹੋਈਆਂ ਜੈ ਜੈ ਕਾਰਾਂ ਨੇ। ਲਿਖ ਉਸਤਾਦ ਸੰਗਤ ਵਿਚ ਗਾਵੇ, ਐਸਾ ਦਿਨ ਵਡਭਾਗੀ ਆਵੇ,
ਸਭ ਨੂੰ ਸੱਚੋ ਸੱਚ ਸੁਣਾਵੇ ਸਿਫਤਾਂ ਆਪ ਲਿਖਾਈਆਂ ਜੀ,
550ਵਾਂ ਸਾਲ ਗੁਰਾਂ ਦਾ ਸਭ ਨੂੰ ਹੋਣ ਵਧਾਈਆਂ ਜੀ। |
