ਪੰਥ ਖਾਲਸਾ ਸਾਜ ਗੁਰੂ ਜੀ, ਤੰਬੂ ਵਿੱਚੋਂ ਬਾਹਰ ਆਏ।
ਪੰਜ ਪਿਆਰੇ ਨਾਲ ਉਨ੍ਹਾਂ ਦੇ, ਜੋ ਸੰਗਤਾਂ ਨੂੰ ਬੜੇ ਹੀ ਭਾਏ।
ਬੋਲੇ ਸਭ ਦੇ ਸਾਹਵੇਂ ਹੋ ਕੇ, ਦੇਣਾ ਜ਼ਰਾ ਧਿਆਨ ਖਾਲਸਾ!
ਸਿੱਖ ਪੰਥ ਲਈ ਅੱਜ ਤੋਂ ਜਾਰੀ, ਮੇਰਾ ਇਹ ਫਰਮਾਨ ਖਾਲਸਾ!
ਕੀ ਕਰਨਾ ਹੈ, ਕੀ ਨਹੀਂ ਕਰਨਾ, ਸੁਣਿਓ ਕਰ ਕੇ ਗੌਰ ਖਾਲਸਾ!
ਆਪਣੇ ਨਾਂ ਨਾਲ ਸਿੰਘ ਲਗਾਇਓ, ਤੇ ਔਰਤ ਨਾਲ ਕੌਰ ਖਾਲਸਾ!
ਕਿਸੇ ਕਿਸਮ ਦਾ ਨਸ਼ਾ ਨਹੀਂ ਕਰਨਾ, ਰੱਖਣਾ ਹੈ ਪ੍ਰਹੇਜ਼ ਖਾਲਸਾ!
ਦੂਜੇ ਦੀ ਨਿੰਦਾ ਚੁਗਲੀ ਤੋਂ, ਕਰਨਾ ਸਦਾ ਗੁਰੇਜ਼ ਖਾਲਸਾ!
ਸਿੱਖ ਦੇ ਨਾਲੋਂ ਵੱਧ ਹੈ ਮੈਨੂੰ, ਸਿੱਖੀ ਨਾਲ ਪਿਆਰ ਖਾਲਸਾ!
ਰੋਮਾਂ ਦੀ ਬੇਅਦਬੀ ਮੈਥੋਂ, ਹੋਣੀ ਨਹੀਂ ਸਹਾਰ ਖਾਲਸਾ!
ਪਰ-ਨਾਰੀ ਤੇ ਪਰ-ਪੁਰਸ਼ ਦਾ, ਭੁੱਲ ਕੇ ਵੀ ਕਦੇ ਸੰਗ ਨਾ ਕਰਿਓ!
ਐਵੇਂ ਵਿਚ ਹੰਕਾਰ ਦੇ ਫਸ ਕੇ, ਗਊ ਗਰੀਬ ਨੂੰ ਤੰਗ ਨਾ ਕਰਿਓ!
ਹੱਥਾਂ ਦੀਆਂ ਲਕੀਰਾਂ ਆਪਣੀ, ਮਿਹਨਤ ਦੇ ਨਾਲ ਘੜਨਾ ਸਿੱਖਿਓ!
ਹੱਕ-ਸੱਚ ’ਤੇ ਪਹਿਰਾ ਦੇਣਾ, ਸੱਚੇ ਦੇ ਨਾਲ ਖੜ੍ਹਨਾ ਸਿੱਖਿਓ!
ਜ਼ੁਲਮ ਨਾ ਸਹਿਣਾ ਨਾ ਕਰਨਾ ਹੈ, ਪਾਲਣਾ ਇਹ ਅਸੂਲ ਖਾਲਸਾ!
ਦੇਹਧਾਰੀ ਗੁਰੂਆਂ ਦੇ ਪਿੱਛੇ, ਲੱਗਣਾ ਨਹੀਂ ਫਜ਼ੂਲ ਖਾਲਸਾ!
ਫੋਕੇ ਨਹੀਂ ਆਡੰਬਰ ਕਰਨੇ, ਮੜ੍ਹੀ ਮਸਾਣੀ ਨਹੀਂ ਪੂਜਣਾ।
ਜਦ ਸਾਰੇ ਹੀਲੇ ਮੁੱਕ ਜਾਵਣ, ਫੜ ਕੇ ਫਿਰ ਤੇਗ ਜੂਝਣਾ।
ਸਿੰਘੋ ਮੇਰਾ ਬਣ ਕੇ ਰਹਿਣਾ, ਜਾਨ ਤੋਂ ਵੱਧ ਪਿਆਰਾਂਗਾ ਮੈਂ।
ਦੇਖਣ ਲਈ ਤੁਹਾਨੂੰ ਜੀਵਤ, ਸਭ ਕੁਝ ਆਪਣਾ ਵਾਰਾਂਗਾ ਮੈਂ।
ਚਾਰੇ ਪੁੱਤ ਵਾਰ ਕੇ ਆਪਣੇ, ਥੋਨੂੰ ਪੁੱਤ ਬਣਾਵਾਂਗਾ ਮੈਂ।
ਸਿੱਖੀ ਦੇ ਬੂਟੇ ਦੀ ਜੜ੍ਹ ਵਿਚ, ਪਾਣੀ ਥਾਂ ਲਹੂ ਪਾਵਾਂਗਾ ਮੈਂ।
ਆਪਣਾ ਪਿਆਰਾ ਪਿਤਾ ਵਾਰਿਆ, ਅੱਗੇ ਮਾਂ ਗੁਜਰੀ ਦੀ ਵਾਰੀ।
ਕੁਝ ਵੀ ਨਹੀਂ ਸਾਂਭ ਕੇ ਰੱਖੀ, ਤੁਹਾਥੋਂ ਵੱਧ ਕੋਈ ਵਸਤ ਪਿਆਰੀ।
ਰੱਖਣਾ ਇਹਨੂੰ ਸਦਾ ਬਚਾ ਕੇ, ਬੂਟਾ ਇਹ ਕੁਮਲਾ ਨਾ ਜਾਵੇ।
ਬਣ ਕੇ ਫੇਰ ਮਸੰਦ ਕਮੀਣਾ, ਤੇਲ ਜੜ੍ਹੀਂ ਕੋਈ ਪਾ ਨਾ ਜਾਵੇ।
ਜਦ ਤਕ ਰਹਿਣੀ ਵਿਚ ਰਹੇਗਾ, ਮੇਰਾ ਇਹ ਪਰਵਾਰ ਖਾਲਸਾ!
ਇਕ ਦੂਜੇ ਨੂੰ ਸਾਰਿਆਂ ਵਿੱਚੋਂ, ਮੇਰਾ ਹੋਊ ਦੀਦਾਰ ਖਾਲਸਾ!
ਪਰ ਜੇ ਫੜ ਲਏ ਉਲਟੇ ਚਾਲੇ, ਹੋਏਗਾ ਡਾਢਾ ਦੁੱਖ ਖਾਲਸਾ!
ਫੇਰ ਤੁਹਾਡੇ ਵੱਲੋਂ ਮੈਨੂੰ, ਪਊ ਮੋੜਨਾ ਮੁੱਖ ਖਾਲਸਾ।
ਥੋਨੂੰ ਹੈ ਇਹ ਬਾਗ ਸੌਂਪਿਆ, ਅੱਜ ਤੋਂ ਤੁਸੀਂ ਏਸ ਦੇ ਮਾਲੀ।
ਆਪਣੀ ਜਾਨ ਵਾਰ ਕੇ ਸਿੰਘੋ, ਕਰਨੀ ਹੈ ਇਸ ਦੀ ਰਖਵਾਲੀ।
ਸਭ ਸਿੱਖਾਂ ਨੂੰ ਹੁਕਮ ਹੈ ਮੇਰਾ, ਰਹਿਬਰ ਗੁਰੂ ਗ੍ਰੰਥ ਤੁਹਾਡਾ।
ਇਕ ਦੂਜੇ ਵਿਚ ਫਰਕ ਨਾ ਕੋਈ, ਤੁਸੀਂ ਪੰਥ ਦੇ, ਪੰਥ ਤੁਹਾਡਾ।