ਜੀਹਦੇ ਸਿਰ ਉੱਤੇ ਸੋਂਹਦੀ, ਬੰਨ੍ਹੀ ਹੋਈ ਪੱਗ ਹੈ।
ਝੁਕ ਝੁਕ ਕਰਦਾ ਸਲਾਮਾਂ, ਉਹਨੂੰ ਜੱਗ ਹੈ।
ਮਿਲਦਾ ਹਰੇਕ ਥਾਂ ਤੋਂ ਮਾਨ ਸਨਮਾਨ ਹੈ।
ਪੱਗ ਤਾਂ ਪੰਜਾਬੀਆਂ ਦੀ ਸਦਾ ਜਿੰਦ ਜਾਨ ਹੈ।

ਦੁਨੀਆ ਦੀ ਹੋਰ ਕੋਈ ਚੀਜ ਇਹਦੇ ਤੁੱਲ ਨਾ।
ਬੜੀ ਵਡਮੁੱਲੀ ਇਹ ਤਾਂ ਕੋਈ ਇਹਦਾ ਮੁੱਲ ਨਾ।
ਏਸ ਦੇ ਹੀ ਨਾਲ ਸਾਡੀ ਉੱਚੀ ਹੰਦੀ ਸ਼ਾਨ ਹੈ।
ਪੱਗ ਤਾਂ ਪੰਜਾਬੀਆਂ ਦੀ ਸਦਾ ਜਿੰਦ ਜਾਨ ਹੈ।

ਸਾਡੀ ਏਸ ਪੱਗ ਤਾਂਈ ਜੀਹਨੇ ਹੱਥ ਪਾਇਆ ਹੈ।
ਦੁਨੀਆ ਦੇ ਉੱਤੋਂ ਉਹਦਾ ਹੋ ਗਿਆ ਸਫਾਇਆ ਹੈ।
ਸਦਾ ਲਈ ਮੇਟ ਦਿੱਤਾ ਵੈਰੀ ਦਾ ਨਿਸ਼ਾਨ ਹੈ।
ਪੱਗ ਤਾਂ ਪੰਜਾਬੀਆਂ ਦੀ ਸਦਾ ਜਿੰਦ ਜਾਨ ਹੈ।

ਇਸਦਾ ਅਪਮਾਨ ਅਸੀਂ ਸਕਦੇ ਸਹਾਰ ਨਾ।
ਪੱਗ ਲਈ ਸਭ ਕੁਝ ਸਿੱਖਿਆ ਹੈ ਵਾਰਨਾ।
ਸਿੱਖ ਲਈ ਪੱਗ ਉਹਦਾ ਦੀਨ ਤੇ ਈਮਾਨ ਹੈ।
ਪੱਗ ਤਾਂ ਪੰਜਾਬੀਆਂ ਦੀ ਸਦਾ ਜਿੰਦ ਜਾਨ ਹੈ।

ਬਖ਼ਸ਼ੀ ਹੋਈ ਦਾਤ ਸਾਨੂੰ ਗੁਰੂ ਦਸ਼ਮੇਸ਼ ਦੀ।
ਦਾਤੇ ਕੋਲੋਂ ਮੰਗਦੇ ਹਾਂ ਸਦਾ ਸੁੱਖ ਏਸ ਦੀ।
ਹਰ ਸਮੇਂ ਰਹਿੰਦਾ ਇਹਦੇ ਵੱਲ ਹੀ ਧਿਆਨ ਹੈ।
ਪੱਗ ਤਾਂ ਪੰਜਾਬੀਆਂ ਦੀ ਸਦਾ ਜਿੰਦ ਜਾਨ ਹੈ।