ਕੇਸ ਕੰਘਾ ਕੜਾ ਕੱਛ ਕਿਰਪਾਨ ਜੀ!
ਇਹ ਨੇ ਸਾਰੇ ਪੱਕੇ ਸਿੱਖੀ ਦੇ ਨਿਸ਼ਾਨ ਜੀ!
ਇਨ੍ਹਾਂ ਨੂੰ ਤੂੰ ਰੱਖ ਸਦਾ ਪਾ ਕੇ ਵੀਰਨਾ!
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!

ਉੱਠ ਕੇ ਸਵੇਰੇ ਨਿੱਤਨੇਮ ਕਰਨਾ,
ਕਿਸੇ ਦੇਹਧਾਰੀ ਕੋਲੋਂ ਨਹੀਓਂ ਡਰਨਾ।
ਮੱਥਾ ਟੇਕਣਾ ਨਾ ਕਿਤੇ ਜਾ ਕੇ ਵੀਰਨਾ?
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!

ਹੱਕ ਤੂੰ ਪਰਾਇਆ ਨਾ ਕਦੇ ਵੀ ਖਾਣਾ ਏ,
ਮਿੱਠਾ ਕਰ ਮੰਨਣਾ ਗੁਰੂ ਦਾ ਭਾਣਾ ਏ।
ਗਲ਼ ਵਿਚ ਸਦਾ ਪੱਲਾ ਪਾ ਕੇ ਵੀਰਨਾ!
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!

ਮੜ੍ਹੀਆਂ-ਮਸਾਣੀਆਂ ਨੂੰ ਨਹੀਂ ਪੂਜਣਾ,
ਫੜ ਤਲਵਾਰ ਹੱਕ ਲਈ ਜੂਝਣਾ।
ਜਿਊਣਾ ਸਦਾ ਸਿਰ ਨੂੰ ਉਠਾ ਕੇ ਵੀਰਨਾ!
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!

‘ਸਿੰਘ’ ਅਤੇ ‘ਕੌਰ’ ਨਾਉਂ ਦੇ ਨਾਲ ਲਾ ਲਿਓ,
ਔਖੇ ਵੇਲੇ ਸਦਾ ਗੁਰੂ ਨੂੰ ਧਿਆ ਲਿਓ।
ਦੇਖ ਲੈਣਾ ਕਦੇ ਅਜ਼ਮਾ ਕੇ ਵੀਰਨਾ!
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!

ਇੱਕੋ ਥੋਡਾ ਆਸਰਾ ਗੁਰੂ ਗ੍ਰੰਥ ਹੈ,
ਲੜ ਲਾਇਆ ਓਸ ਦੇ ਹੀ ਸਾਰਾ ਪੰਥ ਹੈ।
ਸਾਜਿਆ ਜੋ ਸਿਰਾਂ ਨੂੰ ਕਟਾ ਕੇ ਵੀਰਨਾ!
ਰੱਖਿਆ ਕਰੇਗਾ ਗੁਰੂ ਆ ਕੇ ਵੀਰਨਾ!