ਭਾਈ ਰੇਸ਼ਮ ਸਿੰਘ ਸੁਖਮਨੀ ਸੇਵਾ ਵਾਲੇ ਪਿਆਰਿਓ, ਸਿੱਖ ਧਰਮ ਵਿਚ ਇਸਤਰੀ ਦਾ ਰੁਤਬਾ ਬਹੁਤ ਹੀ ਉੱਚਾ ਮੰਨਿਆ ਗਿਆ ਹੈ।ਇਸਤਰੀ ਦਾ ਸਨਮਾਨ ਕਰਨਾ, ਰੱਬ ਦੀ ਖੁਸ਼ੀ ਲੈਣ ਦੇ ਤੁਲ ਹੁੰਦਾ ਹੈ। ਇਸੇ ਕਰਕੇ ਹੀ ਧੰਨ-ਧੰਨ ਸਾਹਿਬ ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਪਾਵਨ ਗੁਰਬਾਣੀ ਵਿਚ ਇਸਤਰੀ ਜਾਤੀ ਦਾ ਵੱਡਾ ਸਨਮਾਨ ਕਰਦੇ ਹੋਏ ਫੁਰਮਾਨ ਕੀਤਾ ਹੈ ਕਿ:

ਸੋ ਕਿਉ ਮੰਦਾ ਆਖੀਐ ਜਿਤੁ ਜੰਮਹਿ ਰਾਜਾਨ ॥ (ਸ੍ਰੀ ਗੁਰੂ ਗ੍ਰੰਥ ਸਾਹਿਬ, 473)

ਸਤਿਗੁਰੂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਪਾਵਨ ਗੁਰਬਾਣੀ ਰਾਹੀਂ ਫੁਰਮਾਇਆ ਹੈ ਕਿ ਐ, ਦੁਨੀਆ ਦੇ ਲੋਕੋ, ਇਸਤਰੀ ਦਾ ਸਾਰੇ ਜਗਤ ਵਿਚ ਰੁਤਬਾ ਇਸੇ ਕਰਕੇ ਹੀ ਮਹਾਨ ਹੈ ਕਿ ਇਸ ਇਸਤਰੀ ਦੀ ਕੁੱਖ ਵਿੱਚੋਂ ਹੀ ਗੁਰੂ ਸਾਹਿਬਾਨ, ਪੀਰਾਂ-ਪੈਗੰਬਰਾਂ, ਸੰਤਾਂ, ਭਗਤਾਂ ਅਤੇ ਸ਼ਹੀਦ ਸਿੰਘ ਸੂਰਮਿਆਂ ਨੇ ਜਨਮ ਲਿਆ ਹੈ। ਜੇ ਇਹ ਵੀ ਕਹਿ ਲਈਏ ਕਿ ਜੇ ਇਸਤਰੀ ਨਾ ਹੁੰਦੀ ਤਾਂ ਸੰਸਾਰ ਵਿਚ ਮਨੁੱਖਾਂ ਦੀ ਪੈਦਾਇਸ਼ ਹੀ ਨਹੀਂ ਸੀ ਹੋਣੀ, ਇਸ ਵਿਚ ਕੋਈ ਅਤਿ ਕਥਨੀ ਨਹੀਂ ਹੈ। ਪਰ ਅੱਜ ਦੇ ਸਿੱਖ ਜਗਤ ਵੱਲ ਬਹੁਤ ਹੀ ਗਹੁ ਨਾਲ ਝਾਤ ਮਾਰ ਕੇ ਵੇਖੀਏ ਤਾਂ ਅੱਜ ਸਾਡੀ ਸਿੱਖ ਬੀਬੀ ਆਪਣੇ ਸਿੱਖੀ ਸਰੂਪ ਤੋਂ ਬਹੁਤ ਹੱਦ ਤਕ ਮੂੰਹ ਮੋੜਦੀ ਜਾ ਰਹੀ ਹੈ। ਮੇਰੀਉ ਪਿਆਰੀਓ ਭੈਣੋ ! ਆਪਣੇ ਸਿੱਖ ਇਤਿਹਾਸ ਦੇ ਪੁਰਾਣੇ ਪੰਨੇ ਫੋਲ ਕੇ ਤਾਂ ਵੇਖੋ ਕਿ ਉਹ ਵੀ ਮਹਾਨ ਸਿੱਖ ਬੀਬੀਆਂ ਹੋਈਆਂ ਹਨ ਜਿਨ੍ਹਾਂ ਨੇ ਆਪਣੇ ਸਿੱਖੀ ਸਰੂਪ ਨੂੰ ਕਾਇਮ ਰੱਖਦਿਆਂ ਹੋਇਆਂ ਆਪਣੇ ਰੱਬ ਵਰਗੇ ਸਿਰਾਂ ਦੇ ਸਾਈਆਂ(ਪਤੀਆਂ) ਨੂੰ ਸ਼ਹੀਦ ਕਰਵਾ ਦਿੱਤਾ, ਆਪਣੇ ਪੁੱਤਰਾਂ ਦੇ ਟੋਟੇ-ਟੋਟੇ ਕਰਵਾ ਕੇ ਆਪਣੇ ਗਲਾਂ ਵਿਚ ਹਾਰ ਪੁਆ ਲਏ ਅਤੇ ਦੁਸ਼ਟ ਮੀਰ ਮੰਨੂੰ ਦੀ ਜੇਲ੍ਹ ਵਿਚ ਸਵਾ-ਸਵਾ ਮਣ ਦੇ ਪੀਸਣੇ ਪੀਸ ਕੇ, ਇਨ੍ਹਾਂ ਮਹਾਨ ਸਿੱਖ ਬੀਬੀਆਂ ਨੇ ਆਪਣੇ ਸਿੱਖੀ ਦੇ ਸੁਨਹਿਰੀ ਇਤਿਹਾਸ ਨੂੰ ਬੜੇ ਹੀ ਫ਼ਖ਼ਰ ਨਾਲ ਕਾਇਮ ਰੱਖਿਆ, ਪਰ ਅੱਜ ਜਦੋਂ ਗੁਰੂ-ਘਰਾਂ ਵਿਚ ਬਹੁਤ ਹੀ ਸ਼ਰਧਾ ਨਾਲ ਮੱਥਾ ਟੇਕਣ ਜਾਈਦਾ ਹੈ ਤਾਂ ਬੜਾ ਹੀ ਭਾਰੀ ਦੁੱਖ ਹੁੰਦਾ ਹੈ ਕਿ ਅੱਜ ਸਿੱਖ ਧਰਮ ਦੀਆਂ ਕਈ ਬੀਬੀਆਂ ਆਪਣੇ ਭਰਵੱਟੇ ਅਤੇ ਕੇਸਾਂ ਦੀ ਘੋਰ ਬੇਅਦਬੀ ਕਰ ਕੇ ਆਪਣੇ ਸਿੱਖੀ ਦੇ ਅਸਲ ਰੂਪ ਬਹੁਤ ਹੀ ਕਰੂਪ ਹੋਈਆਂ ਫਿਰਦੀਆਂ ਹਨ। ਦਾਸ ਨੂੰ ਕੁਝ ਚਿਰ ਪਹਿਲਾਂ ਇਕ ਬਹੁਤ ਹੀ ਜ਼ਿੰਮੇਵਾਰ ਸਿੱਖ ਨੇ ਸੁਆਲ ਕੀਤਾ ਕਿ ਵੀਰ ਜੀ, ਅੱਜ ਸਿੱਖਾਂ ਦੇ ਨੌਜਵਾਨ ਤੋਂ ਵੱਡੀ ਗਿਣਤੀ ਵਿਚ ਪਤਿਤ ਹੋ ਗਏ ਹਨ। ਤੁਸੀਂ ਸਿੱਖ ਨੌਜਵਾਨਾਂ ਦੇ ਪਤਿਤਪੁਣੇ ’ਤੇ ਜ਼ਰੂਰ ਲਿਖੋ ਤਾਂ ਦਾਸ ਨੇ ਉਸ ਪਿਆਰੇ ਸਿੱਖ ਨੂੰ ਬੜੇ ਹੀ ਪਿਆਰ ਵਿਚ ਉੱਤਰ ਦਿੱਤਾ ਕਿ ਵੀਰ ਜੀ, ਮੈਨੂੰ ਮੁਆਫ ਕਰਨਾ, ਅੱਜ ਸਿੱਖ ਨੌਜਵਾਨ ਪਤਿਤ ਨਹੀਂ ਹੋਇਆ, ਇਨ੍ਹਾਂ ਸਿੱਖ ਨੌਜਵਾਨਾਂ ਦੀਆਂ ਜ਼ਿਆਦਾਤਰ ਮਾਵਾਂ ਪਤਿਤ ਹੋ ਗਈਆਂ ਹਨ, ਜਿਹੜੀ ਮਾਂ ਸਵੇਰੇ ਉੱਠ ਕੇ ਆਪਣੇ ਘਰ ਵਿਚ ਟੀ.ਵੀ ਲਗਾ ਕੇ ਆਪ ਗੰਦੇ ਸੀਰੀਅਲ ਜਾਂ ਹੋਰ ਭੈੜੇ-ਭੈੜੇ ਨਾਟਕ ਵੇਖਦੀ ਹੋਵੇ, ਉਹ ਆਪਣੇ ਧੀ ਜਾਂ ਪੁੱਤ ਨੂੰ ਕਿਵੇਂ ਆਖ ਸਕਦੀ ਹੈ ਕਿ ਪੁੱਤਰ ਉੱਠ ਅਤੇ ਜਪੁਜੀ ਸਾਹਿਬ ਦਾ ਪਾਠ ਕਰ। ਇਸੇ ਤਰਾਂ ਜਿਹੜੀਆਂ ਮਾਵਾਂ ਤਿਆਰ ਹੋ ਕੇ ਆਪ ਕਿੱਟੀ ਪਾਰਟੀ ਆਦਿ ਵਿਚ ਚਲੀਆਂ ਜਾਂਦੀਆਂ ਹਨ ਉਹ ਮਾਂ ਆਪਣੇ ਧੀ-ਪੁੱਤ ਨੂੰ ਕਿਵੇਂ ਆਖ ਸਕਦੀ ਹੈ ਕਿ ਪੁੱਤ ਜਾਹ, ਗੁਰੂ-ਘਰ ਜਾ ਕੇ ਮੱਥਾ ਟੇਕ ਕੇ ਆ।

ਸੋ ਜੇ ਅੱਜ ਬਹੁਤ ਹੀ ਗਹੁ ਨਾਲ ਵੀਚਾਰੀਏ ਤਾਂ ਇਹ ਗੱਲ ਸਾਹਮਣੇ ਆ ਰਹੀ ਹੈ ਕਿ ਅੱਜ ਨੌਜਵਾਨ ਬੱਚੇ ਨਹੀਂ, ਇਨ੍ਹਾਂ ਨੌਜਵਾਨ ਬੱਚਿਆਂ ਦੀਆਂ ਜ਼ਿਆਦਾਤਰ ਪਹਿਲਾਂ ਮਾਵਾਂ ਪਤਿਤ ਹੋ ਗਈਆਂ ਹਨ, ਬਹੁਤ ਘੱਟ ਵੇਖਣ ਨੂੰ ਮਿਲਦਾ ਹੈ ਕਿ ਕਿਸੇ ਸਿੱਖ ਬੀਬੀ ਦਾ ਬੱਚਾ ਪਤਿਤ ਹੋਇਆ ਹੋਵੇ।

ਸੋ ਪਿਆਰਿਓ, ਅੱਜ ਤੋਂ ਤਕਰੀਬਨ ਕੁਝ ਸਾਲ ਪਹਿਲਾਂ ਟ੍ਰਿਬਿਊਨ ਅਖ਼ਬਾਰ ਦੇ ਪੱਤਰਕਾਰਾਂ ਨੇ ਦਾਸ ਦੀ ਪਤਿਤਪੁਣੇ ਸੰਬੰਧੀ ਇੰਟਰਵਿਊ ਲੈ ਕੇ ਅਖ਼ਬਾਰ ਵਿਚ ਛਾਪੀ ਸੀ, ਉਨ੍ਹਾਂ ਨੇ ਦਾਸ ਨੂੰ ਸਵਾਲ ਕੀਤਾ ਸੀ ਕਿ ਭਾਈ ਸਾਹਿਬ ਅੱਜ ਸਿੱਖ ਜਗਤ ਵਿਚ ਨੌਜਵਾਨ ਧੀਆਂ-ਪੁੱਤਰਾਂ ਵਿਚ ਪਤਿਤਪੁਣਾ ਬਹੁਤ ਹੀ ਵਧ ਗਿਆ ਹੈ, ਇਸ ਬਾਰੇ ਤੁਹਾਡੀ ਕੀ ਰਾਇ ਹੈ? ਤਾਂ ਦਾਸ ਨੇ ਉਸ ਅਖ਼ਬਾਰ ਦੇ ਪੱਤਰਕਾਰ ਨੂੰ ਬੇਨਤੀ ਕੀਤੀ ਕਿ ਵੀਰ ਜੀ, ਮੈਂ ਦੱਸ ਦਿੰਦਾ ਹਾਂ, ਪਰ ਤੁਸੀਂ ਦਾਸ ਦੀ ਇਹ ਇੰਟਰਵਿਊ ਇਸੇ ਤਰ੍ਹਾਂ ਹੀ ਛਾਪ ਦਿਉ ਤਾਂ ਉਸ ਪੱਤਰਕਾਰ ਨੇ ਕਿਹਾ ਕਿ ਵੀਰ ਜੀ, ਅਸੀਂ ਇੰਨਬਿੰਨ ਤੁਹਾਡੀ ਇੰਟਰਵਿਊ ਛਾਪਾਂਗੇ ਤਾਂ ਦਾਸ ਨੇ ਉਸ ਇੰਟਰਵਿਊ ਵਿਚ ਕਿਹਾ ਕਿ ਵੀਰ ਜੀ, ਦਾਸ ਦਾ ਵੱਡਾ ਤਜ਼ਰਬਾ ਹੈ ਕਿਉਂਕਿ ਦਾਸ ਦੇਸ਼ਾਂ-ਵਿਦੇਸ਼ਾਂ ਅਤੇ ਬਹੁਤ ਜਗ੍ਹਾ ’ਤੇ ਜਾ ਕੇ ਆਪਣੇ ਦੁਆਰਾ ਗੁਰਮਤਿ ਦੀਆਂ ਲਿਖੀਆਂ ਕਿਤਾਬਾਂ ਭੇਟਾ-ਰਹਿਤ ਅਤੇ ਨਿਸ਼ਕਾਮ ਤੌਰ ਤੇ ਵੰਡ ਕੇ ਸਤਿਗੁਰੂ ਜੀ ਦੀਆਂ ਪਿਆਰੀਆਂ ਖੁਸ਼ੀਆਂ ਲੈ ਰਿਹਾ ਹੈ। ਅੱਜ ਜ਼ਿਆਦਾਤਰ ਘਰਾਂ ਵਿਚ ਮਾਂ-ਪਿਉ ਆਪ ਪਤਿਤ ਹੋ ਗਏ ਹਨ, ਜੇ ਘਰ ਵਿਚ ਇਕ ਪਿਤਾ ਨੇ ਆਪ ਕੇ ਜਾਂ ਦਾਹੜੀ ਕਟਵਾਈ ਹੋਈ ਹੋਵੇ ਜਾਂ ਉਸ ਬੱਚਿਆਂ ਦੀ ਮਾਂ ਨੇ ਆਪ ਭਰਵੱਟੇ ਮੁੰਨਾਏ ਹੋਏ ਹੋਣ ਤਾਂ ਯਾਦ ਰੱਖਿਉ, ਉਹ ਬੱਚੇ ਆਪਣੇ ਮਾਂ-ਪਿਉ ਵੱਲ ਵੇਖ ਕੇ ਅਤੇ ਘਰ ਦਾ ਵਾਤਾਵਰਨ ਵੇਖਦੇ ਹੋਏ ਉਹੋ ਜਿਹੇ ਹੀ ਹੋ ਜਾਂਦੇ ਹਨ। ਯਾਦ ਰੱਖੀਏ, ਅੱਜ ਵਿਗੜਿਆ ਮਾਂ-ਪਿਉ ਹੈ, ਅਸੀਂ ਪ੍ਰਚਾਰ ਨੌਜਵਾਨਾਂ ’ਤੇ ਸ਼ੁਰੂ ਕਰ ਦਿੱਤਾ ਹੈ, ਸਾਨੂੰ ਬਿਮਾਰੀ ਦੀ ਅਸਲ ਜੜ੍ਹ ਨੂੰ ਫੜਨਾ ਚਾਹੀਦਾ ਹੈ, ਸੋ ਜੇ ਇਕ ਮਾਂ ਜਾਂ ਪਿਉ ਜਨਮ ਤੋਂ ਹੀ ਬੱਚੇ ਨੂੰ ਸਿੱਖੀ ਸਰੂਪ ਵਿਚ ਰੱਖ ਕੇ ਅਤੇ ਬਾਣੀ ਨਾਲ ਜੋੜ ਕੇ ਰੱਖਣ ਤਾਂ ਉਹ ਬੱਚਾ ਕਦੇ ਵੀ ਸਿੱਖੀ ਸਕਦਾ। ਦਾਸ ਕੋਲ ਇਕ ਸਿੱਖ ਬੀਬੀ ਨੇ ਬੇਨਤੀ ਕੀਤੀ ਕਿ ਵੀਰ ਜੀ, ਆ ਮੇਰਾ ਪੁੱਤ 20 ਸਾਲ ਦਾ ਹੋ ਗਿਆ ਹੈ, ਪਤਿਤ ਹੋ ਗਿਆ ਹੈ, ਕੋਈ ਉਪਾਅ ਦੱਸੋ ਕਿ ਮੇਰਾ ਬੱਚਾ ਨਸ਼ਿਆਂ ਵਿਚ ਨਾ ਚਲਿਆ ਜਾਵੇ ਜਾਂ ਪਤਿਤ ਹੋਣ ਤੋਂ ਬਚ ਸਕੇ ਤਾਂ ਦਾਸ ਨੇ ਬੇਨਤੀ ਕੀਤੀ ਕਿ ਧੀਏ, ਜਦੋਂ ਰੁੱਖ ਦੇ ਬੂਟੇ ਦੀ ਟਾਹਣੀ ਅਜੇ ਬਹੁਤ ਪਤਲੀ ਅਤੇ ਨਾਜ਼ੁਕ ਸੀ, ਉਸਨੂੰ ਜਿਸ ਪਾਸੇ ਮਰਜ਼ੀ ਮੋੜ ਸਕੀਦੀ ਮੈਂ ਪਰ ਜੇ ਉਸ ਰੁੱਖ ਦਾ ਟਾਹਣਾ ਮੋਟਾ ਹੋ ਗਿਆ ਤਾਂ ਉਹ ਟੁੱਟ ਤਾਂ ਜਾਵੇਗਾ ਪਰ ਮੁੜੇਗਾ ਨਹੀਂ, ਸੋ ਮੇਰੀਏ ਭੈਣੇ, ਜਦੋਂ ਤੇਰਾ ਪੁੱਤਰ ਬਹੁਤ ਛੋਟਾ ਉਸ ਰੁੱਖ ਦੀ ਟਾਹਣੀ ਵਾਂਗੂੰ ਨਾਜ਼ੁਕ ਸੀ, ਤੂੰ ਆਪ ਸੁਧਰਦੀ ਅਤੇ ਇਸਨੂੰ ਵੀ ਮੋੜ ਸਕਦੀ ਸੀ । ਹੁਣ ਜਦੋਂ ਤੂੰ ਇਸ ਦੇ ਬਚਪਨ ਵਿਚ ਆਪ ਫ਼ਰਜ਼ ਅਦਾ ਨਹੀਂ ਕੀਤਾ, ਇਹ ਹੁਣ ਤੈਨੂੰ ਆਪਣੀ ਗ਼ਲਤੀ ਦਾ ਖਮਿਆਜ਼ਾ ਭੁਗਤਣਾ ਹੀ ਪਵੇਗਾ।

ਦਾਸ ਨੇ 2-3 ਸਾਲ ਪਹਿਲਾਂ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਸ੍ਰੀ ਦਰਬਾਰ ਸਾਹਿਬ ਜੀ ਦੀਆਂ ਪਰਕਰਮਾ ਵਿਚ ਇੱਕ ਭੈਣ ਵੇਖੀ, ਜਿਸਨੇ ਆਪਣੇ ਸਿਰ ’ਤੇ ਕਾਲਾ ਪਟਕਾ ਬੰਨ੍ਹਿਆ ਹੋਇਆ ਸੀ ਅਤੇ ਗਲੇ ਵਿਚ ਕਿਰਪਾਨ ਪਾਈ ਹੋਈ ਸੀ। ਮੈਂ ਉਸ ਭੈਣ ਨੂੰ ਬੇਨਤੀ ਕੀਤੀ ਕਿ ਭੈਣ ਜੀ ਤੁਸੀਂ ਖੰਡੇ-ਬਾਟੇ ਦਾ ਅੰਮ੍ਰਿਤ ਛਕਿਆ ਹੋਇਆ ਹੈ ਅਤੇ ਤੁਸੀਂ ਆਪਣੇ ਭਰਵੱਟੇ ਵੀ ਮੁੰਨਾਏ ਹੋਏ ਹਨ ਤਾਂ ਉਸ ਨੇ ਕਿਹਾ ਕਿ ਵੀਰ ਜੀ ਮੈਂ ਭਰਵੱਟੇ ਕੱਟਦੀ ਨਹੀਂ, ਪੁੱਟਦੀ ਹਾਂ ! ਤਾਂ ਦਾਸ ਨੇ ਉਸ ਭੈਣ ਨੂੰ ਅੱਗੋਂ ਕਿਹਾ ਕਿ ਭਰਵੱਟੇ ਕੱਟਣੇ ਤਾਂ ਇੱਕ ਬੱਜਰ ਪਾਪ ਹੈ ਪਰ ਭਰਵੱਟਿਆਂ ਨੂੰ ਜੜੋਂ ਹੀ ਪੁੱਟ ਸੁੱਟਣਾ ਇੱਕ ਵੱਡਾ ਅਪਰਾਧ ਹੈ ਕਿਉਂਕਿ ਭਰਵੱਟੇ ਪੁੱਟਣ ਨਾਲ ਤੂੰ ਸਿੱਖੀ ਨੂੰ ਜੜ੍ਹੋਂ ਹੀ ਪੁੱਟ ਸੁੱਟਿਆ ਹੈ। ਭੈਣ, ਤੂੰ ਇੱਕ ਅੰਮ੍ਰਿਤਧਾਰੀ ਬੀਬੀ ਹੈਂ! ਇਸ ਤਰ੍ਹਾਂ ਸਿੱਖੀ ਦਾ ਜਨਾਜ਼ਾ ਨਾ ਕੱਢੋ ਤਾਂ ਉਸ ਭੈਣ ਨੇ ਮੈਨੂੰ ਕਿਹਾ ਕਿ ਵੀਰ ਜੀ, ਮੈਨੂੰ ਪਤਾ ਨਹੀਂ ਸੀ, ਅੱਜ ਤੋਂ ਬਾਅਦ ਮੈਂ ਕਦੇ ਵੀ ਆਪਣੇ ਭਰਵੱਟੇ ਨਾ ਕੱਟਾਂਗੀ ਅਤੇ ਨਾ ਹੀ ਪੁੱਟਾਂਗੀ !

ਸੋ ਮੇਰੀਓ ਭੈਣੋ, ਸਾਡੀਆਂ ਪਿਛਲੀਆਂ ਮਾਵਾਂ-ਦਾਦੀਆਂ ਅਤੇ ਨਾਨੀਆਂ ਐਸੀਆਂ ਗੁਰਮੁਖ ਹੁੰਦੀਆਂ ਸਨ, ਉਹ ਰਾਤ ਨੂੰ ਸੌਣ ਵੇਲੇ ਆਪਣੇ ਛੋਟੇ-ਛੋਟੇ ਧੀਆਂਪੁੱਤਰਾਂ ਅਤੇ ਬੱਚਿਆਂ ਨੂੰ ਛੋਟੇ ਸਾਹਿਬਜ਼ਾਦਿਆਂ, ਬਾਬਾ ਦੀਪ ਸਿੰਘ ਜੀ ਸ਼ਹੀਦ, ਭਾਈ ਤਾਰੂ ਸਿੰਘ ਜੀ ਸ਼ਹੀਦ ਜਾਂ ਹੋਰ ਸ਼ਹੀਦ ਸਿੰਘਾਂ ਸੂਰਮਿਆਂ ਦੀਆਂ ਸਾਥੀਆਂ ਸੁਣਾ ਕੇ, ਉਨ੍ਹਾਂ ਨੂੰ ਬਚਪਨ ਵਿਚ ਹੀ ਸਿੱਖੀ ਦੀ ਗੁੜ੍ਹਤੀ ਦੇ ਦਿੰਦੀਆਂ ਸਨ। ਅੱਜ ਵੀ ਬਹੁਤ ਸਿੱਖ ਬੀਬੀਆਂ ਹਨ ਜਿਨ੍ਹਾਂ ਨੇ ਆਪ ਤਾਂ ਸਿੱਖੀ ਸਰੂਪ ਨੂੰ ਮੁੱਢ ਤੋਂ ਹੀ ਸਾਂਭ ਕੇ ਰੱਖਿਆ ਹੈ ਅਤੇ ਉਨ੍ਹਾਂ ਨੇ ਆਪਣੇ ਬੱਚਿਆਂ ਨੂੰ ਵੀ ਸਿੱਖੀ ਨਾਲ ਜੋੜ ਕੇ, ਗੁਰੂ-ਘਰ ਦੀਆਂ ਮਹਾਨ ਖੁਸ਼ੀਆਂ ਲਈਆਂ ਹੋਈਆਂ ਹਨ, ਬਹੁਤ ਹੀ ਧੰਨਤਾ ਦੇ ਯੋਗ ਹਨ ਉਹ ਸਿੱਖ ਬੀਬੀਆਂ। ਦੁਨੀਆ ਵਿਚ ਇੱਕ ਆਮ ਹੀ ਧਾਰਨਾ ਹੈ ਕਿ ਇਕ ਮਾਂ ਹੀ ਆਪਣੇ ਪੁੱਤਰ ਨੂੰ ਵੱਡਾ ਠੱਗ, ਚੋਰ ਜਾਂ ਡਾਕੂ ਬਣਾ ਸਕਦੀ ਹੈ ਅਤੇ ਇੱਕ ਮਾਂ ਹੀ ਆਪਣੇ ਪੁੱਤਰ ਨੂੰ ਸੰਤ, ਭਗਤ ਜਾਂ ਸੂਰਮਾ ਬਣਾ ਸਕਦੀ ਹੈ।

ਸੋ ਮੇਰੀਓ ਸਤਿਕਾਰਯੋਗ ਭੈਣੋ, ਤੁਸੀਂ ਉਸ ਮਾਂ ਗੁਜਰੀ ਦੀ ਧੀਆਂ ਹੋ, ਜਿਸ ਸਾਡੀ ਪਿਆਰੀ ਮਾਂ ਨੇ ਇਸ ਸਿੱਖੀ ਦੀ ਖਾਤਰ ਆਪਣਾ ਪਿਆਰਾ ਪਤੀ ਚਾਂਦਨੀ ਚੌਂਕ ਵਿਚ ਸ਼ਹੀਦ ਕਰਵਾ ਦਿੱਤਾ, ਆਪਣਾ ਸੋਹਣਾ ਅਤੇ ਪਿਆਰਾ ਇੱਕੋ ਇੱਕ ਸਪੁੱਤਰ ਸਿੱਖ ਜਗਤ ਉੱਤੋਂ ਕੁਰਬਾਨ ਕਰ ਦਿੱਤਾ, ਆਪਣੇ ਜਾਨ ਤੋਂ ਵੀ ਪਿਆਰੇ ਚਾਰੇ ਲਾਡਲੇ ਪੋਤਰੇ ਸਿੱਖੀ ਤੋਂ ਸ਼ਹੀਦ ਕਰਵਾ ਦਿੱਤੇ ਅਤੇ ਸਿੱਖੀ ਦੇ ਬੂਟੇ ਨੂੰ ਪਾਣੀ ਪਾਉਂਦੀ ਹੋਈ ਆਪ ਵੀ ਸਰਹੰਦ ਦੇ ਠੰਡੇ ਬੁਰਜ ਵਿਚ ਸ਼ਹੀਦ ਹੋ ਗਈ।

ਸੋ ਮੇਰੀਓ ਭੈਣੋ, ਆਪਣੇ ਸਿੱਖੀ ਸਰੂਪ ਨੂੰ ਸੰਭਾਲੋ ! ਅੱਜ ਤੋਂ ਪਹਿਲਾਂ ਜੇ ਮੇਰੀ ਸਿੱਖ ਭੈਣ ਜਾਂ ਬੀਬੀ ਆਪਣੇ ਸਿੱਖੀ ਦੇ ਸਰੂਪ ਨੂੰ ਵਿਗਾੜ ਕੇ ਆਪਣੇ ਭਰਵੱਟੇ ਮੁੰਨਾ ਕੇ ਸਿੱਖੀ ਤੋਂ ਕਰੂਪ ਹੋਈ ਹੋਵੇ ਜਾਂ ਆਪਣੇ ਹੋਰ ਰੋਮਾਂ ਦੀ ਬੇਅਦਬੀ ਕਰਦੀ ਹੋਵੇ, ਉਹ ਅੱਜ ਧੰਨ ਧੰਨ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਜੋ ਸਾਡੇ ਜਾਗਦੀ ਜੋਤ ਸ਼ਬਦ-ਗੁਰੂ ਹਨ, ਉਨ੍ਹਾਂ ਦੇ ਚਰਨਾਂ ਵਿਚ ਅਰਦਾਸ ਕਰੇ ਕਿ ਸਤਿਗੁਰੂ ਜੀ, ਮੈਂ ਤੁਹਾਡੀ ਨਿਮਾਣੀ ਧੀ ਹਾਂ, ਮੈਂ ਆਪਣੇ ਭਰਵੱਟੇ ਮੁੰਨਾ ਕੇ ਜਾਂ ਰੋਮਾਂ ਦੀ ਬੇਅਦਬੀ ਕਰ ਕੇ ਸਿੱਖੀ ਤੋਂ ਮੁਨਕਰ ਹੋਈ ਫਿਰਦੀ ਸੀ, ਅੱਜ ਮੈਨੂੰ ਆਪਣੀ ਧੀ ਜਾਣ ਕੇ ਮੁਆਫ ਕਰ ਦਿਓ, ਅੱਜ ਤੋਂ ਬਾਅਦ ਮੈਂ ਨਾ ਆਪਣੇ ਭਰਵੱਟੇ ਕੱਟਾਂਗੀ ਅਤੇ ਨਾ ਹੀ ਆਪਣੇ ਕਿਸੇ ਹੋਰ ਰੋਮਾਂ ਦੀ ਬੇਅਦਬੀ ਕਰ ਕੇ ਸਤਿਗੁਰੂ ਜੀ ਤੋਂ ਬੇਮੁਖ ਹੋਵਾਂਗੀ ਅਤੇ ਅੱਜ ਤੋਂ ਬਾਅਦ ਮੈਂ ਆਪਣੇ ਪਰਿਵਾਰ ਵਿਚ ਸਿੱਖੀ ਸਰੂਪ ਦਾ ਬੂਟਾ ਲਗਾ ਕੇ, ਖੰਡੇ-ਬਾਟੇ ਦਾ ਅੰਮ੍ਰਿਤ ਛਕ ਕੇ ਆਪਣੇ ਪਤੀ ਅਤੇ ਬੱਚਿਆਂ ਨੂੰ ਸਿੱਖੀ ਨਾਲ ਜੋੜਨ ਦਾ ਆਪ ਵੱਡਾ ਉਪਰਾਲਾ ਕਰਾਂਗੀ।

ਸੋ ਮੇਰੀਓ ਸਤਿਕਾਰਯੋਗ ਭੈਣੋ, ਜਿਹੜੀ ਵੀ ਮੇਰੀ ਪਿਆਰੀ ਧੀ ਜਾਂ ਭੈਣ ਆਪਣੇ ਪਿਛਲੇ ਕੀਤੇ ਹੋਏ ਰੋਮਾਂ ਦੀ ਬੇਅਦਬੀ ਦੇ ਗੁਨਾਹ ਨੂੰ ਬਖ਼ਸ਼ਾ ਕੇ ਆਪਣੇ ਸਤਿਗੁਰੂ ਜੀ ਦੀਆਂ ਵੱਡੀਆਂ ਖੁਸ਼ੀਆਂ ਲਵੇਗੀ, ਐਸੀ ਮੇਰੀ ਗੁਰਮੁਖ ਧੀ-ਭੈਣ ਦੇ ਘਰ ਧੰਨ ਧੰਨ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਸਦਾ-ਸਦਾ ਲਈ ਸੁਖਾਂ ਦੇ ਭੰਡਾਰੇ ਭਰ ਕੇ, ਉਸ ਸਿੱਖ ਬੀਬੀ ਨੂੰ ਆਪਣੀ ਪਿਆਰੀ ਧੀ ਬਣਾ ਲੈਣਗੇ।