ਮਾਰੂਥਲ ਟਿੱਬਿਆਂ ਦਾ, ਰਾਹੀ ਗੁਰੂ ਨਾਨਕ!
ਧਰਤੀ ’ਤੇ ਸੱਚ ਦੀ, ਗਵਾਹੀ ਗੁਰੂ ਨਾਨਕ!

ਪਾਖੰਡਾਂ ਤੇ ਵਹਿਮਾਂ ਦਾ, ਸੰਘਾਰ ਗੁਰੂ ਨਾਨਕ!
ਗ਼ਰੀਬਾਂ ਤੇ ਦੁਖੀਆਂ ਦੀ, ਪੁਕਾਰ ਗੁਰੂ ਨਾਨਕ!

ਸ਼ਬਦ ਤੇ ਸੰਗੀਤ ਦਾ, ਮੇਲ ਗੁਰੂ ਨਾਨਕ!
ਰਾਗ ਤੇ ਬਾਣੀ ਦਾ, ਸੁਮੇਲ ਗੁਰੂ ਨਾਨਕ!

ਖਿਮਾ ਮਿਹਰ ਪਿਆਰ ਦਾ, ਰੂਪ ਗੁਰੂ ਨਾਨਕ!
ਬਿਰਹੋਂ ਦੇ ਗੀਤ ਦੀ, ਕੂਕ ਗੁਰੂ ਨਾਨਕ!

ਸੱਜਣਾਂ ਤੇ ਠੱਗਾਂ ਦਾ, ਉੱਧਾਰ ਗੁਰੂ ਨਾਨਕ!
ਜ਼ਬਰ ਤੇ ਜ਼ੁਲਮ ਨੂੰ, ਦੁਰਕਾਰ ਗੁਰੂ ਨਾਨਕ!

ਇਲਾਹੀ ਪਾਕ ਨਾਦ ਦੀ, ਧੁਨਕਾਰ ਗੁਰੂ ਨਾਨਕ!
ਸ਼ਬਦ ਵਾਲੀ ਚੋਟ, ਦਿੰਦਾ ਮਾਰ ਗੁਰੂ ਨਾਨਕ!

ਦੁਖੀਆ ਤੇ ਦੀਨਾਂ ਦਾ, ਦਰ ਗੁਰੂ ਨਾਨਕ!
ਦਇਆ ਤੇ ਮਿਹਰ ਦਾ, ਘਰ ਗੁਰੂ ਨਾਨਕ!

ਪਤਿਤ ਤੇ ਪਾਵਨਾਂ ਦੀ, ਆਸ ਗੁਰੂ ਨਾਨਕ!
ਪਿਆਰ ਤੇ ਮਿਠਾਸ ਦਾ, ਅਵਾਸ ਗੁਰੂ ਨਾਨਕ!

ਨਾਮ ਸੱਚੀ ਕਿਰਤ ਦਾ, ਬਸੀਠ ਗੁਰੂ ਨਾਨਕ!
ਨਿਥਾਵਿਆਂ, ਨਿਓਟਿਆਂ ਦੀ, ਅਸੀਸ ਗੁਰੂ ਨਾਨਕ!

ਰਾਜਿਆਂ ਤੇ ਰੰਕਾਂ ਦੀ, ਅਰਦਾਸ ਗੁਰੂ ਨਾਨਕ!
ਨਿਮਰ ਹਲੀਮੀ ਦਾ, ਗੁਣਤਾਸ ਗੁਰੂ ਨਾਨਕ!

ਤੌਹੀਦ ਭਾਈਚਾਰੇ ਦੀ, ਪੁਕਾਰ ਗੁਰੂ ਨਾਨਕ!
ਜਾਤਾਂ ਤੇ ਵੰਡੀਆਂ, ਦਿੰਦਾ ਨਕਾਰ ਗੁਰੂ ਨਾਨਕ!

ਰੰਗ ਭੇਦ ਨਸਲਾਂ ਤੋਂ, ਅਜ਼ਾਦ ਗੁਰੂ ਨਾਨਕ!
ਹਰ ਇਕ ਦੀ ਸੁਣਦਾ, ਫਰਿਆਦ ਗੁਰੂ ਨਾਨਕ!

ਭੇਖਾਂ ਤੇ ਮਜ਼ਹਬਾਂ ਤੋਂ, ਨਿਆਰਾ ਗੁਰੂ ਨਾਨਕ!
ਕੁਲ ਕਾਇਨਾਤ ਦਾ, ਪਿਆਰਾ ਗੁਰੂ ਨਾਨਕ!