ਪਰਵਾਰ ਵਾਰ ਕੇ ਤੇ ਮਾਲਵੇ ਚਰਨ ਗੁਰਾਂ ਨੇ ਪਾਏ,
ਮੱਲੀ ਢਾਬ ਖਿਦਰਾਣੇ ਦੀ ਡੇਰੇ ਸਿੰਘਾਂ ਉਸ ਥਾਂ ਲਾਏ।
ਮਾਤਾ ਭਾਗੋ ਮਹਾਂ ਸਿੰਘ ਨੇ ਕੀਤੇ ਬਚਨ ਸਿੰਘਾਂ ਨਾਲ ਖੁੱਲ੍ਹੇ,
ਉਹ ਖ਼ੂਨ ਪਵਿੱਤ੍ਰ ਹੋਊ ਜਿਹੜਾ ਦੇਸ਼ ਧਰਮ ਲਈ ਡੁੱਲ੍ਹੇ। ਕਰਦਾ ਭਾਲ ਸਤਿਗੁਰਾਂ ਦੀ ਵਜੀਰ ਖਾਨ ਵੀ ਮਗਰੇ ਆਇਆ,
ਪਾਣੀ ਮਿਲਦਾ ਨਾ ਸੀ ਕਿਧਰੇ ਉੱਡਦੀ ਧੂੜ ਵੇਖ ਘਬਰਾਇਆ।
ਅੱਗੇ ਸਿੰਘ ਮਝੈਲ ਡਟੇ ਨੇ ਨਾਲ ਨਿਸ਼ਾਨ ਕੇਸਰੀ ਝੁੱਲ੍ਹੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਸੂਰਮੇ ਮਹਾਂ ਸਿੰਘ ਨੇ ਆਖਿਆ ਸਿੰਘੋ ਕਰੋ ਦਲੇਰੀ,
ਦੁਸ਼ਮਣ ਦੀਆਂ ਫੌਜਾਂ ਨੂੰ ਆਪਾਂ ਮਾਰ ਕਰ ਦੇਈਏ ਢੇਰੀ।
ਟੁੱਟ ਗਏ ਸਾਂ ਸਤਿਗੁਰਾਂ ਤੋਂ ਲੁੱਟ ਲਉ ਅੱਜ ਸ਼ਹੀਦੀ ਬੁੱਲ੍ਹੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਤੇਗਾਂ ਸੂਤ ਕੇ ਸਿੰਘਾਂ ਨੇ ਮੁੱਖੋਂ ਅਕਾਲ ਅਕਾਲ ਗਜਾਇਆ,
ਮੱਚ ਗਈ ਤਰਥੱਲੀ ਸੀ ਵੈਰੀ ਦਲ ਬੜਾ ਘਬਰਾਇਆ।
ਉੱਚੀ ਟਿੱਬੀ ਤੋਂ ਤੱਕਦੇ ਸਿੰਘ ਅਸਾਡੇ ਭੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਗਈ ਪੇਸ਼ ਨਾ ਸੂਬੇ ਦੀ ਸਿੰਘ ਵੇਖ ਪਿੱਛੇ ਨੂੰ ਹੱਟਿਆ,
ਪਾਣੀ ਬਿਨ ਤੜਫ ਰਹੇ ਕਹਿੰਦੇ ਕੀ ਅਸਾਂ ਨੇ ਖੱਟਿਆ।
ਘੜੀ ਆਈ ਮੁਸੀਬਤ ਦੀ ਸਾਨੂੰ ਰੱਖ ਲੈ ਨਬੀ ਰਸੁਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਓਧਰ ਮਾਤਾ ਭਾਗੋ ਨੇ ਵੈਰੀ ਬਹੁਤੇ ਮਾਰ ਮੁਕਾਏ,
ਸਿੰਘ ਹੋਣ ਸ਼ਹੀਦ ਜਿਹੜੇ ਕਹਿੰਦੇ ਗੁਰੂ ਜੀ ਹੋ ਸਹਾਏ।
ਅੱਜ ਦਿਨ ਵਡਭਾਗਾ ਹੈ ਲੁੱਟ ਲਉ ਤੁਸੀਂ ਖੁਸ਼ੇ ਅਣਮੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਮਹਾਂ ਸਿਘ ਸੂਰਮੇ ਨੇ ਦੁਸ਼ਮਣ ਵੱਢ ਕੇ ਕਰਤੇ ਢੇਰੀ,
ਦੁਸ਼ਮਣ ਦਾ ਫੱਟ ਖਾ ਕੇ ਡਿੱਗਾ ਧਰਤ ਜਿਉ ਪੱਤੇ ਬੇਰੀ।
ਸੁਣ ਖੜਕਾ ਤੇਗਾਂ ਦਾ ਬਹੁਤੇ ਮੁਗ਼ਲ ਮਿੱਟੀ ਵਿਚ ਰੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਨਕਸ਼ਾ ਜੰਗ ਦਾ ਤੱਕ ਕੇ ਤੇ ਕਹਿੰਦੇ ਮੇਰੇ ਸਿੰਘ ਦੀਦਾਰੀ,
ਮੁੱਖੜੇ ਪੂੰਝਦੇ ਸਿੰਘਾਂ ਦੇ ਕਹਿੰਦੇ ਮੇਰਾ ਦਸ ਹਜ਼ਾਰੀ।
ਜਿਹੜੇ ਸਿੰਘ ਸ਼ਹੀਦ ਹੋਏ ਸਾਰੇ ਕਰੋ ਅਗਨ ਦੇ ਚੁੱਲ੍ਹੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਮੁੱਖੜਾ ਪੂੰਝਦੇ ਮਹਾਂ ਸਿੰਘ ਦਾ ਕਹਿੰਦੇ ਸਿੰਘਾਂ ਮਰਦ ਦਲੇਰਾ,
ਬੀਜ ਬੀਜਿਆ ਧਰਮ ਦਾ ਤੂੰ ਸਿੰਘਾਂ ਦਿਲ ਮੋਹ ਲਿਆ ਮੇਰਾ।
ਜੋ ਮੰਗਣਾ ਮੰਗ ਲੈ ਤੂੰ ਨਾਨਕ ਗੁਰੂ ਦੇ ਦਰ ਨੇ ਖੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਮਹਾਂ ਸਿੰਘ ਇਉਂ ਕਹਿਣ ਲੱਗਾ ਜੇਕਰ ਤੁੱਠੇ ਬੇਦਾਵਾ ਪਾੜੋ,
ਅਸੀਂ ਭੁੱਲੇ ਭਟਕੇ ਹਾਂ ਸਾਨੂੰ ਰੰਗ ਨਾਮ ਦਾ ਚਾੜ੍ਹੋ।
ਸਿੱਖੀਉਂ ਖਾਰਜ ਹੋਈਏ ਨਾ ਬਣੀਏ ਪੁੱਤਰ ਤੁਸਾਂ ਦੇ ਦੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਗੁਰਾਂ ਪਾੜ ਬੇਦਾਵੇ ਨੂੰ ਸਿੰਘ ਨੂੰ ਛਾਤੀ ਦੇ ਨਾਲ ਲਾਇਆ,
ਸਿੱਖੀ ਟੁੱਟੀ ਗੰਢ ਲਈ ਤੂੰ ਮੁੱਖੋਂ ਬਚਨ ਗੁਰਾਂ ਫ਼ਰਮਾਇਆ।
ਬਣਿਆ ਥਾਨ ਸੁਹਾਵਾ ਹੈ ਕੋਈ ਨਹੀਂ ਹੈ ਇਸ ਦੇ ਤੁੱਲੇ,
ਉਹ ਖ਼ੂਨ ਪਵਿੱਤ੍ਰ ਹੋਊ... ਖਿਦਰਾਣੇ ਦੀ ਢਾਬ ਜਿਹੜੀ ਗਈ ਹੈ ਦੁਨੀਆ ਵਿਚ ਸਤਿਕਾਰੀ,
ਉਹ ਵਸਤੂ ਮਿਲਦੀ ਹੈ ਜੋ ਵੀ ਕਿਸੇ ਨੇ ਦਿਲ ਵਿਚ ਧਾਰੀ।
ਮੁਕਤਸਰ ਦੀ ਧਰਤੀ ’ਤੇ ‘ਭੌਰਾ’ ਝੰਡੇ ਇਨ੍ਹਾਂ ਦੇ ਝੁੱਲ੍ਹੇ,
ਉਹ ਖ਼ੂਨ ਪਵਿੱਤ੍ਰ ਹੋਊ ਜਿਹੜਾ ਦੇਸ਼ ਧਰਮ ਲਈ ਡੁੱਲ੍ਹੇ। | 
