ਏਕਤਾ ਦਾ ਪੱਤਾ ਲੈ ਕੇ ਹੌਂਸਲੇ ਦੀ ਹਰੜ ਪਾਉ,
ਭਰੋਸੇ ਦੇ ਬਹੇੜੇ ਨਾਲ ਕਰੋ ਚੂਰਨ ਤਿਆਰ ਜੀ।
ਧੀਰਜ ਦਾ ਔਲਾ ਤੇ ਮਿਠਾਸ ਦੀ ਮਿਲਾ ਕੇ ਸੌਂਫ,
ਭਗਤੀ ਦੀ ਕੁੰਡੀ ਦੇ ਰੱਖੋ ਵਿਚਕਾਰ ਜੀ।
ਸਬਰ ਦੇ ਵੱਟੇ ਨਾਲ ਪੀਸੋ ਕਸਵੱਟੀ ਲਾ ਕੇ,
ਪਿਆਰ ਵਾਲੀ ਛਾਨਣੀ ਨਾ ਛਾਣ ਲਉ ਵਿਚਾਰ ਜੀ।
ਤਿਆਗ ਦੀ ਹਾਂਡੀ ਤੇ ਵੈਰਾਗ ਦੇ ਚੁਲ੍ਹੇ ਉੱਤੇ
ਗਿਆਨ ਦੀ ਅਗਨੀ ਜਲਾਉ ਹੋ ਕੇ ਹੁਸ਼ਿਆਰ ਸੀ।
ਅਧਿਆਤਮਿਕ ਮਜੂਨ ਚੰਗੀ ਤਰ੍ਹਾਂ ਭੁੱਜ ਜਾਵੇ,
ਅਭਿਆਸ ਵਾਲੇ ਭਾਂਡੇ ਵਿਚ ਰੱਖ ਲਉ ਸੰਭਾਲ ਜੀ।
ਪ੍ਰੇਮ ਵਾਲੇ ਪਾਣੀ ਨਾਲ ਸਵੇਰੇ ਅਤੇ ਸ਼ਾਮ ਵਰਤੋ,
ਸਾਰੀਆਂ ਬਿਮਾਰੀਆਂ ਤੇ ‘ਭੌਰ’ ਨੁਸਖਾ ਕਮਾਲ ਜੀ।

ਪ੍ਰਹੇਜ਼ ਬਹੁਤ ਜ਼ਰੂਰੀ ਹੈ

ਥੋੜਾ ਜਿਹਾ ਪ੍ਰਹੇਜ਼ ਇਹਦਾ ਦੱਸਣਾ ਜ਼ਰੂਰ ਚਾਹਵਾਂ,
ਚੁਗਲੀ ਦੀ ਖਟਾਈ ਕਦੇ ਭੁੱਲ ਕੇ ਵੀ ਖਾਇਓ ਨਾ।
ਨਿੰਦਾ ਦੀ ਮਠਿਆਈ ਵਿਚ ਜ਼ਹਿਰ ਦੀਆਂ ਗੰਦਲਾਂ ਨੇ,
ਇਹਦੇ ਤਾਈਂ ਹੱਥ ਭੁੱਲ ਕੇ ਲਗਾਇਓ ਨਾ।
ਹੱਕ ਜੋ ਪਰਾਏ ਵਾਲਾ ਨਮਕ ਕਦੇ ਵਰਤੀਏ ਨਾ,
ਨੁਸਖੇ ਦੇ ਵਿਚ ਇਸ ਨੂੰ ਰਲਾਇਓ ਨਾ।
ਸਾਰੀਆਂ ਬੀਮਾਰੀਆਂ 'ਤੇ ਚੂਰਨ ਇਹ ਕੰਮ ਆਉਂਦਾ,
ਭੌਰ ਕਹੇ ਪ੍ਰਹੇਜ਼ ਇਹਦਾ ਦਿਲ ਤੋਂ ਭੁਲਾਇਓ ਨਾ।