ਸ੍ਰੀ ਹਰਿਕ੍ਰਿਸ਼ਨ ਜੀ ਦੀ ਮਹਿਮਾ ਅਪਰੰਪਾਰ,
ਜਾਣੇ ਕੁੱਲ ਸੰਸਾਰ ਸੰਗਤੇ, ਜਾਣੇ ਸਭ ਸੰਸਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ, ਬੇੜਾ ਹੋਵੇ ਪਾਰ।
ਸੰਗਤੇ! ਬੇੜਾ ਹੋਵੇ ਪਾਰ।

ਛੋਟੀ ਉਮਰੇ ਵੱਡੀ ਬਖ਼ਸ਼ਿਸ਼, ਸਤਿਗੁਰ ਸੱਚੇ ਪਾਈ,
ਜੋਤ ਜੁਗਤਿ ਗੁਰੂ ਨਾਨਕ ਵਾਲੀ, ਦਾਤ ਅਮੋਲਕ ਪਾਈ।
ਨਾਨਕ ਦੀ ਗੁਰਗੱਦੀ ਦੇ ਵਾਰਸ, ਜੱਗ ਦਾ ਤਾਰਨਹਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ...

ਪੰਡਤ ਲਾਲ ਚੰਦ ਦਾ ਹੰਕਾਰ ਟੁੱਟਿਆ, ਉਸ ਨੇ ਸੋਝੀ ਪਾਈ,
ਛੱਜੂ ਦੇ ਭਾਗ ਜਾਗ ਪਏ, ਜਦੋਂ ਸਿਰ ’ਤੇ ਛੜੀ ਲਗਾਈ।
ਸ਼ਹਿਰ ਪੰਜੋਖਰਾ ਤੀਰਥ ਬਣਿਆ, ਵਗ ਪਈ ਅੰਮ੍ਰਿਤ ਧਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ...

ਬਾਲਾ ਗੁਰੂ ਦਿਬ ਦ੍ਰਿਸ਼ਟੀ ਕੀਤੀ, ਚੋਰਾਂ ਸਾਧੂ ਬਿਰਤੀ ਪਾਈ,
ਕੁੜੀਮਾਰ ਦੀ ਬਿਰਤੀ ਬਦਲੀ, ਕੀਤੀ ਨਾਰੀ ਦੀ ਵਡਿਆਈ।
ਇੱਛਾ ਪੂਰਕ ਸਰਬ ਸੁਖ ਦਾਤਾ, ਜੱਗ ਦਾ ਪਾਲਨਹਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ...

ਉਨ੍ਹੀਂ ਦਿਨੀਂ ਦਿੱਲੀ ਦੇ ਲੋਕਾਂ ਨੇ, ਚੇਚਕ ਦੀ ਵਬਾ ਪਾਈ,
ਉਸ ਨਿਰੰਕਾਰੀ ਜੋਤ ਨੇ, ਰੋਗਾਂ ਤੋਂ ਮੁਕਤੀ ਦਿਵਾਈ।
ਜਿਸ ਵੀ ਬਾਲਾ ਗੁਰੂ ਧਿਆਇਆ, ਉਹ ਤਰਿਆ ਸੰਸਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ...

ਦਿੱਲੀ, ਰਾਜਾ ਜੈ ਸਿੰਘ ਨੇ ਬੰਗਲੇ ਵਿਚ, ਝਲਕ ਗੁਰਾਂ ਦੀ ਪਾਈ,
ਉਸ ਨੇ ਬੰਗਲਾ ਅਰਪਨ ਕੀਤਾ, ਸਤਿਗੁਰ ਦੀ ਰਹਿਮਤ ਪਾਈ।
ਬੰਗਲਾ, ਬੰਗਲਾ ਸਾਹਿਬ ਬਣਿਆ, ਝੁਕੇ ਸਭ ਸੰਸਾਰ।
ਨਾਨਕ ਦੀ ਅਠਵੀਂ ਜੋਤ ਧਿਆਓ...