ਅਕਾਲ ਪੁਰਖ ਦੇ ਹੁਕਮ ਨੂੰ ਸਾਕਾਰ ਹੈ ਕਰਨਾ।
ਪੰਥ ਖਾਲਸਾ ਸਾਜਣ ਤੋਂ ਬਗੈਰ ਨਾ ਸਰਨਾ।
ਜ਼ਾਲਮ ਤੋਂ ਮਜ਼ਲੂਮ ਨੂੰ ਦਸਮੇਸ਼ ਬਚਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਮੁਗ਼ਲ ਰਾਜ ਦੇ ਜਾਬਰ ਸੀ ਮਨਮਾਨੀਆਂ ਕਰਦੇ।
ਲੋਕ ਨਾ ਫਿਰ ਵੀ ਬੋਲਦੇ ਲੱਖ ਦੁੱਖੜੇ ਜ਼ਰਦੇ।
ਸ਼ਰਮ, ਧਰਮ ਨਾ ਇੱਜ਼ਤਾਂ ਸਭ ਖੇਹ ਰਲਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਸੋਲ੍ਹਾਂ ਸੌ ਨੜਿੰਨਵੇਂ ਦੀ ਵੈਸਾਖੀ ਆਈ।
ਲਿੱਖ ਲਿੱਖ ਪੱਤ੍ਰਿਕਾ ਆਇਆ ਸਭ ਆਓ ਭਾਈ!
ਅਨੰਦ ਪੁਰੀ ਵਿਚ ਸੰਗਤਾਂ ਦਾ ਹੜ੍ਹ ਸੀ ਆਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਕਲਗੀਧਰ ਜੀ ਸ੍ਰੀ ਸਾਹਿਬ ਹੱਥ ਨੰਗੀ ਫੜ ਕੇ।
ਇਕ ਸੀਸ ਹੈ ਚਾਹੀਦਾ ਸਤਿਗੁਰੂ ਜੀ ਕੜਕੇ।
ਸਭ ਤੋਂ ਪਹਿਲਾਂ ਦਇਆ ਰਾਮ ਨੇ ਸੀਸ ਝੁਕਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਦਇਆ ਤੋਂ ਮਗਰੋਂ ਧਰਮ ਨੇ ਆ ਧੌਣ ਝੁਕਾਈ।
ਤੈਨੂੰ ਆਪਾ ਅਰਪਿਆ ਕਰ ਲਓ ਮਨ ਆਈ।
ਸੀਸ ਭੇਟ ਕਰ ਧਰਮ ਚੰਦ ਅੱਜ ਲੇਖੇ ਲਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਦਇਆ ਧਰਮ ਤੋਂ ਬਾਅਦ ਹੁਣ ਹਿੰਮਤ ਦੀ ਵਾਰੀ।
ਸੀਸ ਕਰੋ ਪ੍ਰਵਾਨ ਮੈਂ ਜਾਵਾਂ ਬਲਿਹਾਰੀ।
ਇਉਂ ਸੂਰਮੇ ਆਪਣਾ ਸਿਰ ਭੇਟ ਚੜ੍ਹਾਇਆ।
ਛਕਾਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਦਇਆ, ਧਰਮ ਤੇ ਹਿੰਮਤ ਨੇ ਕੀ ਰੰਗ ਲਿਆਂਦੇ।
ਮੁਹਕਮ ਚੰਦ ਵੀ ਗੁਰਾਂ ਨੂੰ ਆ ਸੀਸ ਝੁਕਾਂਦੇ।
ਤੇਰਾ ਤੈਨੂੰ ਸੌਂਪਿਆ, ਨਾ ਰਿਹਾ ਪਰਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਦਇਆ, ਧਰਮ ਤੇ ਹਿੰਮਤ ਨੇ ਵਿਚ ਹੁਕਮ ਰਲਾ ਕੇ,
ਸਾਹਿਬ ਚੰਦ ਵੀ ਖੜ੍ਹ ਗਿਆ ਸਤਿਗੁਰ ਕੋਲ ਆ ਕੇ।
ਸੀਸ ਵਾਰ ਕੇ ਗੁਰਾਂ ਨੂੰ ਲੱਖ ਸ਼ੁਕਰ ਮਨਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਖੱਤਰੀ, ਛੀਂਬਾ, ਨਾਈ, ਝਿਉਰ ਤੇ ਜੱਟ ਰਲਾ ਕੇ।
ਇਕ ਬਣਾਇਆ ਖਾਲਸਾ, ਸਭ ਭੇਦ ਮਿਟਾ ਕੇ।
ਦਿੱਲੀ, ਬਿਦਰ, ਦਵਾਰਕਾ, ਲਾਹੌਰ ਮਿਲਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। ਅੰਮ੍ਰਿਤ ਛਕਾ ਕੇ ਸਿੰਘਾਂ ਨੂੰ, ਜਦ ਬਾਹਰ ਲਿਆਏ।
‘ਖਾਲਸਾ ਮੇਰੋ ਰੂਪ ਹੈ’ ਸਤਿਗੁਰ ਫ਼ਰਮਾਏ।
ਸਵਾ ਲੱਖ ਨਾਲ ‘ਜਾਚਕਾ’, ਇੱਕ ਸਿੰਘ ਲੜਾਇਆ।
ਛਕਾ ਕੇ ਅੰਮ੍ਰਿਤ ਗਿੱਦੜਾਂ ਤੋਂ ਸ਼ੇਰ ਬਣਾਇਆ। | 
