ਡੰਡਾਉਤ ਮੇਰੀ ਬੰਦਨਾ!
ਡੰਡਾਉਤ ਮੇਰੀ ਭਾਵਨਾ!
ਡੰਡਾਉਤ ਹੈ ਅਰਾਧਨਾ!

ਉਸ ਬਾਦਸ਼ਾਹ ਦਰਵੇਸ਼ ਨੂੰ!
ਉਸ ਜੁਗੋ ਜੁਗ ਹਮੇਸ਼ ਨੂੰ!
ਉਸ ਜੁਗਾਂ ਦੇ ਹਾਣ ਵਰੇਸ ਨੂੰ!

ਉਸ ਸ਼ਹਾਦਤਾਂ ਦੀ ਰਾਸ ਨੂੰ!
ਉਸ ਤਵਾਰੀਖ ਦੀ ਬਾਸ ਨੂੰ!
ਉਸ ਕਰਮ ਪੂਰਣ ਇਤਿਹਾਸ ਨੂੰ!

ਉਸ ਅੰਮ੍ਰਿਤ ਦੇ ਦਾਤਾਰ ਨੂੰ!
ਉਸ ਖਾਲਸਾ ਸਿਰਜਣਹਾਰ ਨੂੰ!
ਉਸ ਦੁਖੀਆਂ ਦੇ ਉਦਹਾਰ ਨੂੰ!

ਉਸ ਸ਼ਕਤੀ ਦੇ ਅਵਤਾਰ ਨੂੰ!
ਉਸ ਭਗਤੀ ਪਰਉਪਕਾਰ ਨੂੰ!
ਉਹ ਜਜ਼ਬਾਤ ਦੇ ਉਦਗਾਰ ਨੂੰ!

ਉਸ ਕਾਮਲ ਕਲਮਕਾਰ ਨੂੰ!
ਉਸ ਕਲਮ ਦੇ ਸਤਿਕਾਰ ਨੂੰ!
ਉਸ ਵਿਰਵਿਆਂ ਦੀ ਵਾਰ ਨੂੰ!

ਉਸ ਲਿਸ਼ਕਦੀ ਤਲਵਾਰ ਨੂੰ!
ਉਸ ਯੋਧੇ ਅਪਰੰਪਾਰ ਨੂੰ!
ਰਣਖੇਤ ਦੇ ਸ਼ਾਹਸਵਾਰ ਨੂੰ!

ਉਸ ਸੱਚ ਦੀ ਸਰਕਾਰ ਨੂੰ!
ਉਸ ਟੁੱਟੀ ਗੰਢਣਹਾਰ ਨੂੰ!
ਉਸ ਭੁੱਲਿਆਂ ਦੇ ਬਖ਼ਸ਼ਣਹਾਰ ਨੂੰ!

ਉਸ ਮੁਕਤੇ ਸਾਜਣਹਾਰ ਨੂੰ!
ਮੁਖ ਮਹਾਂ ਸਿੰਘ ਦਾ ਪੂੰਝ ਕੇ!
ਉਸ ਦਿੱਤੇ ਗਏ ਪਿਆਰ ਨੂੰ!

ਉਸ ਚੜ੍ਹਦੀ ਕਲਾ-ਉਭਾਰ ਨੂੰ!
ਉਸ ਨਿਤਾਣਿਆਂ ਬਲਧਾਰ ਨੂੰ!
ਉਸ ਕਾਇਆ ਕਲਪ ਇਕਰਾਰ ਨੂੰ!

ਡੰਡਾਉਤ ਮੇਰੀ ਬੰਦਨਾ!
ਡੰਡਾਉਤ ਮੇਰੀ ਭਾਵਨਾ!
ਡੰਡਾਉਤ ਹੈ ਅਰਾਧਨਾ!